سۋرەت: اشىق دەرەككوزدەن
وبلىستىق جەر قاتىناستارى باسقارماسى باسشىسىنىڭ ورىنباسارى الىبەك ەرمەكقاليدىڭ ايتۋىنشا, جەر كودەكسىنە ەنگىزىلگەن وزگەرتۋلەرگە سايكەس ەندى جەر تەلىمىنىڭ 50 پايىزى پايدالانىلماسا, مەملەكەت مەنشىگىنە قايتارىلادى. بيىل مۇنايلى وڭىردە يگەرىلمەگەن 90 مىڭ گەكتار جەر ۋچاسكەسىن مەملەكەت مەنشىگىنە قايتارۋ جوسپارلانىپتى.
«قازىر وبلىس اۋماعىندا پايدالانۋ مەرزىمى وتكەن جەر تەلىمدەرى ءالى بار. سونداي جەر ۋچاسكەلەرى عارىشتىق مونيتورينگ ارقىلى انىقتالادى. وسىعان وراي مونيتورينگتىك توپ مۇشەلەرى يەلەرىنە پايدالانۋ مەرزىمى ءوتىپ كەتكەن جەر تەلىمدەرىن ءوز ەركىمەن قايتارۋ جونىندە ءتۇسىندىرۋ جۇمىسىن جۇرگىزۋدى قولعا الدى. سونىڭ ناتيجەسىندە تۇرعىندار جەر تەلىمدەرىنىڭ كوپ بولىگىن ءوز ەركىمەن قايتاردى. ەندى ولارعا قايتادان كونكۋرسقا قاتىسىپ, جەر تەلىمىن يەلەنۋ مۇمكىندىگى بەرىلەدى», دەيدى ءا.ەرمەكقالي. ونىڭ دەرەگىنە سۇيەنسەك, 2022–2023 جىلدارى 400 مىڭ گەكتاردان استام جەر تەلىمى مەملەكەتتىڭ يەلىگىنە قايتارىلعان. بىلتىر 275 جەر تەلىمى مەملەكەت مەنشىگىنە وتكىزىلگەن.
«مەملەكەت مەنشىگىنە قايتارىلعان جەر تەلىمدەرى ءۇشىن قايتادان كونكۋرس وتكىزىلەدى. بيىل جەتى ايدا 87 جەر ۋچاسكەسى كونكۋرس ارقىلى قايتادان جەر پايدالانۋشىلارعا بەرىلدى», دەپ مالىمدەدى ءا.ەرمەكقالي.
اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتىنىڭ توراعاسى مۇرات تەمىرجانوۆتىڭ مالىمەتىنە جۇگىنسەك, اتىراۋ وبلىسىندا جەر تەلىمىنە نەمقۇرايدى قاراۋ دەرەگى كەزدەسەدى. سونداي دەرەك جەردى ءبۇلدىرۋ جانە جەر ۋچاسكەلەرىن نىسانالى ماقساتىنا ساي پايدالانباۋعا بايلانىستى انىقتالعان.
«اتىراۋ وبلىستىق جەر رەسۋرستارىن باسقارۋ دەپارتامەنتىنىڭ قىزمەتكەرلەرى توپىراقتىڭ قۇنارلى قاباتىن زاڭسىز سىدىرىپ الۋ جانە جويۋ فاكتىسى بويىنشا اكىمشىلىك قۇقىق بۇزۋشىلىق تۋرالى كودەكستىڭ 337-بابىنىڭ 1-بولىگىمەن «اسسانادورستروي» جشس-عا نۇسقاما بەرىپ, 1 ملن 292 مىڭ 200 تەڭگە كولەمىندە ايىپپۇل سالىندى. قازىر دەپارتامەنتتىڭ نۇسقاماسى نەگىزىندە اتالعان جەر ۋچاسكەسى قالپىنا كەلتىرىلدى», دەپ حابارلادى م.تەمىرجانوۆ.
ماقات اۋدانىندا كاسىپكەرلىكتى دامىتۋ ءۇشىن بەرىلگەن جالپى كولەمى 130 گەكتاردى قۇرايتىن 3 جەر ۋچاسكەسى نىسانالى ماقساتىنا ساي يگەرىلمەگەن. وسىعان بايلانىستى وڭىرلىك دەپارتامەنت ماماندارى جەر يەلەرىنە 1 جىل مەرزىم ىشىندە نىسانالى ماقساتىنا ساي يگەرۋ قاجەتتىگى تۋرالى نۇسقاما بەرگەن ەكەن. ماقات اۋدانىنىڭ سوتى دەپارتامەنتتىڭ جەر كودەكسىنىڭ 94-بابىنا سايكەس جەر ۋچاسكەلەرىن ماجۇرلەپ الىپ قويۋ تۋرالى تالاپ-ارىزىن قاناعاتتاندىردى. جەر ۋچاسكەلەرى مەملەكەت مەنشىگىنە ءوتتى.
اتىراۋ وبلىسى
