ادىلەتتىلىك, زاڭ مەن ءتارتىپ, ەكونوميكالىق تۇراقتىلىق جانە حالىقتىڭ ءوپتيميزمى – مەملەكەتىمىزدىڭ تۇراقتى دامۋىنىڭ نەگىزى. بۇل جولعى جولداۋدا ەلدىڭ كادرلىق الەۋەتىن ارتتىرۋعا ەرەكشە ءمان بەرىلگەن. مەملەكەت باسشىسى ەكونوميكانى بىلىكتى ماماندارمەن قامتاماسىز ەتۋ قاجەتتىگىن اتاپ ءوتىپ, سۋ, ەنەرگەتيكا, قۇرىلىس جانە باسقا دا سالالارداعى كادر تاپشىلىعىن جويۋدى ماڭىزدى مىندەت رەتىندە جۇكتەدى.
پرەزيدەنت ۇكىمەتكە جوعارى ءبىلىم بەرۋ سالاسىن حالىقارالىق ءبىلىم بەرۋ كەڭىستىگىمەن ىقپالداستىرۋ جۇمىسىن جالعاستىرۋدى تاپسىردى. قازىر ەلىمىزدە شەتەلدىك 23 جوعارى وقۋ ورنى قىزمەتىن باستاعانىن, ولارعا قولداۋ كورسەتۋ كەرەكتىگىن جانە مەملەكەتتىك تاپسىرىستى ارتتىرۋ قاجەتتىگىن ايتتى. سونىمەن بىرگە گرانتتاردىڭ ساپالى ءبىلىم بەرۋگە ىقپال ەتۋگە ءتيىس ەكەنىن, ال قارجىنى دۇرىس ءارى ماقساتتى تۇردە جۇمساۋ كەرەكتىگىن ەسكەرتتى. ءبىلىم بەرۋ سالاسىندا باسەكە بولعان جەردە مىقتى مامانداردى دايارلاۋعا, وقۋ ۇدەرىسىنىڭ ساپالى بولۋىنا, ەڭ ماڭىزدىسى, اتا-انالار تاراپىنان دا تاڭداۋ جاساۋىنا مۇمكىندىك بولارى انىق.
سونداي-اق يننوۆاتسيالىق ساياساتتى عىلىمي-تەحنولوگيالىق باسىمدىقتارمەن ۇيلەستىرۋ قاجەتتىلىگى دە كوتەرىلدى. بۇل قادام ءار سالانىڭ يننوۆاتسيالارىن دامىتۋعا سەرپىن بەرىپ, قولدانبالى عىلىمنىڭ الەۋەتىن ارتتىرۋعا جول اشارى حاق. پرەزيدەنت تەحنيكالىق جانە كاسىپتىك ءبىلىم بەرۋ مەكەمەلەرىنىڭ دە بىلىكتى كادرلار دايارلاۋداعى ءرولىن اتاپ ءوتتى. ۇكىمەتكە كوللەدج تۇلەكتەرىن مەملەكەتتىك قىزمەتكە قابىلداۋ مۇمكىندىگىن قاراستىرۋدى تاپسىردى.
مەملەكەت باسشىسىنىڭ كاسىپتىك ءبىلىم سالاسىنا رەفورمالار جاساۋ تۋرالى ايتقان ويلارى ەلىمىزدىڭ ەكونوميكالىق دامۋى مەن الەۋمەتتىك تۇراقتىلىعىن نىعايتۋدا ۇلكەن مانگە يە. پرەزيدەنت 2025 جىلدى جۇمىسشى ماماندىقتارى جىلى دەپ جاريالاي وتىرىپ, وسى سالاداعى رەفورمالار ارقىلى قوعامدا ەڭبەكقورلىق پەن كاسىبيلىكتى دارىپتەۋ قاجەتتىگىن ەرەكشە اتاپ ءوتتى. سەبەبى ءوز ءىسىنىڭ ماماندارى دارىپتەلگەن قوعامدا ىسىنە شەكسىز بەرىلگەن ناعىز پاتريوت ادامدار سانى ارتارى تۇسىنىكتى.
ەڭبەك ادامىنىڭ مارتەبەسىن كوتەرۋ – بۇل تەك ەكونوميكانى دامىتۋعا عانا ەمەس, سونىمەن قاتار قوعامدا ادال ەڭبەككە دەگەن قۇرمەتتى قالىپتاستىرۋعا باعىتتالعان ماڭىزدى قادام. مەملەكەت باسشىسىنىڭ «ادال ازامات – ادال ەڭبەك – ادال تابىس» قاعيداتى ءبىزدىڭ بولاشاعىمىزدى انىقتايتىن نەگىزگى ۇستانىم بولۋعا ءتيىس. ءوز ءىسىن جەتىك مەڭگەرگەن, جاۋاپكەرشىلىكتى تەرەڭ سەزىنگەن ماماندار عانا ەلدىڭ دامۋىندا ماڭىزدى ءرول اتقارا الادى.
پرەزيدەنتتىڭ مۇعالىمدەرگە, دارىگەرلەرگە, مادەنيەت قايراتكەرلەرىنە قۇرمەتتى اتاقتار بەرۋ تۋرالى باستاماسى دا قوعامدا ەڭبەككە دەگەن وڭ كوزقاراستى قالىپتاستىرۋعا ىقپال ەتەدى. بۇل باستامانىڭ اياسىن كەڭەيتۋ – ءبىزدىڭ قوعامىمىزدا ەڭبەكقورلىق پەن كاسىبيلىكتى جوعارى باعالاۋدىڭ ماڭىزدى قادامى.
كەز كەلگەن ەڭبەك قادىرلى بولۋعا ءتيىس. ءاربىر ادام ءوز ىسىنە ادال, كاسىبي جانە جاۋاپتى بولۋى ارقىلى عانا ەلدىڭ تۇراقتى دامۋىنا ۇلەس قوسا الادى. بۇل – ءبىزدىڭ قوعامىمىزدىڭ باستى ۇستانىمى بولۋى قاجەت.
ەلىمىزدە ەنەرگيا تاپشىلىعىنىڭ كۇشەيىپ كەلە جاتقانىن, سەنىمدى جانە ەكولوگيالىق تازا قۋات كوزدەرىنىڭ قاجەتتىلىگىن ەرەكشە اتاپ ءوتتى. وسى ورايدا, اتوم ەنەرگەتيكاسىن دامىتۋ ماسەلەسى كۇن تارتىبىنە قويىلدى. پرەزيدەنتتىڭ ايتۋىنشا, ەكونوميكانىڭ قارقىندى دامۋى ەنەرگياعا دەگەن سۇرانىستى ارتتىرادى, ال مۇنداي سۇرانىستى تەك اتوم ەنەرگەتيكاسى قاناعاتتاندىرا الادى. قازىرگى ۋاقىتتا الەمنىڭ 30-دان استام ەلىندە 200-گە جۋىق اتوم ەلەكتر ستانساسى جۇمىس ىستەپ تۇر, بۇل ولاردىڭ تيىمدىلىگىن كورسەتەدى.
ەلىمىزدىڭ ۇلتتىق مۇددەلەرى مەن ۇزاقمەرزىمدى دامۋ جوسپارلارىن ەسكەرە وتىرىپ, ءبىز دە وسى باعىتتا العا قاراي جىلجۋىمىز قاجەت. پرەزيدەنت اتوم ەلەكتر ستانساسىن سالۋ تۋرالى شەشىمدى بايىپپەن قابىلداۋ قاجەتتىگىن, مۇنداي ستراتەگيالىق ماڭىزدى قادامداردى قوعامدا كەڭىنەن تالقىلاۋدىڭ وزەكتىلىگى تۋرالى بىرنەشە رەت اتاپ ءوتتى.
ەل ومىرىندەگى ءاربىر ماڭىزدى شەشىم, سونىڭ ىشىندە اتوم ەلەكتر ستانساسىن سالۋ ماسەلەسى, جۇرتشىلىقتىڭ قاتىسۋىمەن قابىلدانۋعا ءتيىس. وسىعان وراي پرەزيدەنت اتوم ەلەكتر ستانساسىن سالۋ تۋرالى جالپىۇلتتىق رەفەرەندۋم وتكىزۋگە شەشىم قابىلداعانىن مالىمدەدى. بۇل رەفەرەندۋم 2024 جىلدىڭ 6 قازانىندا وتەتىن بولدى. رەفەرەندۋم قوعامداعى كەڭ اۋقىمدى ديالوگتىڭ ايقىن كورىنىسى بولماق جانە «حالىق ۇنىنە قۇلاق اساتىن مەملەكەت» قاعيداتىن جۇزەگە اسىرۋدىڭ تاعى ءبىر قادامىنا اينالادى. مۇنداي قادامدار ارقىلى ەلىمىزدە جاڭا قوعامدىق-ساياسي مادەنيەت قالىپتاسادى جانە ماڭىزدى مەملەكەتتىك شەشىمدەر قابىلداۋدىڭ جاڭا ۇلگىسى جاسالادى. پرەزيدەنتتىڭ بۇل باستاماسى قوعامدى ورتاق ماقساتتارعا جەتەلەيتىن ماڭىزدى ديالوگتىڭ نەگىزى.
جۇلدىز سۇلەيمەنوۆا,
ءماجىلىس دەپۋتاتى
