ءبىلىم مەن عىلىم سالاسىنىڭ وكىلى رەتىندە, وسى باعىتتاعى باستامالارعا توقتالۋدى ءجون كوردىك.
بىرىنشىدەن, مەملەكەت باسشىسىنىڭ 2025 جىلدى جۇمىسشى ماماندىقتارى جىلى دەپ جاريالاۋ باستاماسى كوپتىڭ كوڭىلىنەن شىقتى. تەحنيكالىق جانە كاسىبي ءبىلىم بەرۋ جۇيەسىن رەفورمالاۋ – ماڭىزدى ماسەلە. جۇمىسشى ماماندىقتارىن دارىپتەۋ ارقىلى قوعامدا ەڭبەكقور جانە ناعىز مامان بولۋ يدەياسىن ناسيحاتتاۋعا مول مۇمكىندىك تۋاتىنىن ءسوز ەتكەن مەملەكەت باسشىسى ادال ءارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى, سىيلى بولۋى كەرەكتىگىنە نازار اۋداردى.
ۇلتتىق قۇرىلتايدىڭ اتىراۋدا وتكەن وتىرىسىندا قۇندىلىقتار قاتارىندا قامتىلعان ەڭبەكقورلىق پەن كاسىبيلىك سياقتى قاسيەتتەر وتە جوعارى باعالانۋعا ءتيىس ەكەنىن, ونىڭ ۇلتتىڭ ساپاسىن جاڭا دەڭگەيگە ارتتىرىرۋدا دا ايتارلىقتاي سەپتىگى بار ەكەنىن اتاپ ءوتىپ, ەڭبەك ادامىنىڭ مارتەبەسىن كوتەرۋگە ءمان بەرۋ كەرەكتىگىن جەتكىزدى. ءيا, جاس ۇرپاقتى جاستايىنان ادال ازامات بولۋعا بەيىمدەپ, ادال ەڭبەكتىڭ قادىرىن ارتتىرىپ, ادال تابىس تابۋعا تاربيەلەۋ – اعا بۋىن وكىلدەرىنىڭ پارىزى. مەملەكەت باسشىسىنىڭ: «كاسىبىنە ادال ءارى جاۋاپكەرشىلىكپەن قاراعان ادام قاشاندا لايىقتى باعاسىن الادى. بۇل تۇسىنىكتى قوعام ساناسىنا ءسىڭىرۋ قاجەت» دەگەن ءسوزىن دە اعا بۋىنعا ارتقان سەنىمى دەپ قابىلداعانىمىز ابزال.
ەكىنشىدەن, ورتا ءبىلىم مەن مەكتەپكە دەيىنگى ءبىلىم بەرۋ ۇيىمدارىنىڭ مىندەتتەرىنە قاتىستى كوكەيكەستى ماسەلەلەرگە توقتالعاندا, مۇعالىمدەردىڭ بىلىكتىلىگىن ارتتىرۋعا جانە الەۋمەتتىك مارتەبەسىن كوتەرۋگە كوڭىل ءبولۋ كەرەكتىگى باياندالدى. ۇزدىك وقۋ باعدارلاماسى, زاماناۋي مەكتەپتەر, وزىق باسقارۋ جۇيەسى بولسا دا, ۇستاز بىلىكتى بولماسا, ونىڭ ءبارى بەكەر ەكەنىنە ەكپىن تۇسىرە ايتقان پرەزيدەنت پەداگوگيكالىق جوعارى وقۋ ورىندارىنا تالاپتى, قابىلەتتى جاستاردى قابىلداۋعا باسا ءمان بەرۋ كەرەكتىگىن تاپسىردى. رەتى كەلگەندە, ءبىلىم ساپاسىن قامتاماسىز ەتۋ بويىنشا تاۋەلسىز ساراپشىلار توبىنىڭ باسشىسى رەتىندە, ەلىمىزدە پەداگوگ-مامان دايارلايتىن جوعارى وقۋ ورىندارىنا قويىلاتىن تالاپتاردى ودان ءارى جەتىلدىرە ءتۇسۋ ءجون بولار ەدى دەگەن ساراپتامالىق پىكىرىمىزدى دە ايتا كەتۋدى ءجون كوردىك.
بالالاردى مەكتەپكە دايارلاۋ ماسەلەسىنە ايرىقشا نازار اۋدارۋ, مەكتەپكە دەيىنگى تاربيە بەرۋ جانە وقىتۋ ىسىندە مەملەكەتپەن قاتار اتا-انالار دا جاۋاپتىلىعىن ارتتىرۋ مەملەكەتتىك ءمانى مول ماسەلەلەر قاتارىندا ەكەنىن قاپەردە ۇستاۋعا ۇندەگەن مەملەكەت باسشىسى ءبىلىم بەرۋ جۇيەسىن ودان ءارى جەتىلدىرۋ ارقىلى ۇلتتىڭ جاڭا ساپاسىن قالىپتاستىرۋعا داڭعىل جول اشىلاتىنىن اتاپ كورسەتتى.
ۇشىنشىدەن, جولداۋدا جوعارى ءبىلىمدى كادرلار دايارلاۋ ماسەلەسى كوتەرىلدى. اتاپ ايتساق, سۋ, ەنەرگەتيكا, قۇرىلىس جانە باسقا دا سالالاردا قاتتى بايقالىپ وتىرعان كادر تاپشىلىعىن جويۋ قاجەتتىگى مەن بولاشاقتا سۇرانىسقا يە بولاتىن كاسىپتەر ءۇشىن بىلىكتى ماماندار دايارلاۋ كەرەكتىگى تۋرالى تاپسىرمالار جۇكتەلدى.
جوعارى ءبىلىمدى ينتەرناتسيونالداندىرۋ بويىنشا جۇيەلى جۇمىس جۇرگىزىلىپ جاتقانىنىنا وڭ باعا بەرگەن مەملەكەت باسشىسى ەلىمىزدە اشىلعان شەتەلدىڭ بەلگىلى 23 جوعارى وقۋ ورنىنا مەيلىنشە قولداۋ كورسەتىپ, مامان دايارلاۋعا بەرىلەتىن مەملەكەتتىك تاپسىرىستى بىرتىندەپ كوبەيتكەن ءجون ەكەنىن جانە ءبىلىم باعدارلاماسى زامان تالابىنا ساي كەلەتىن ءوز وقۋ ورىندارىمىزعا دا قولدانۋعا وسىنداي مۇمكىندىكتەر تۋعىزۋ كەرەكتىگىن تىلگە تيەك ەتتى. ۇزدىك ۋنيۆەرسيتەتتەردىڭ ناقتى سەكتورمەن بايلانىسىن نىعايتۋعا كوڭىل ءبولۋ كەرەكتىگىن تاپسىردى.
تورتىنشىدەن, ەلىمىزدىڭ الەۋمەتتىك-ەكونوميكالىق دامۋىنا عىلىمنىڭ ۇلەسىن ودان ءارى ارتتىرۋ ماقساتىندا يننوۆاتسيالىق ساياساتتى ەلىمىزدىڭ عىلىمي-تەحنولوگيالىق باسىمدىقتارىمەن ۇيلەستىرۋ قاجەتتىگىن, جوعارى وقۋ ورىندارىنداعى قولدانبالى عىلىمنىڭ الەۋەتىن ارتتىرۋدى جانە قازاقستان جاساندى ينتەللەكتىنى كەڭىنەن قولداناتىن جانە تسيفرلىق تەحنولوگيالاردى دامىتىپ جاتقان ەلگە اينالۋعا ءتيىس ەكەنىن مىندەتتەپ, كەلەسى جىلى استانادا جاساندى ينتەللەكت ۇلتتىق ورتالىعىن ىسكە قوسۋدى تاپسىردى. بۇل تاپسىرمالاردى ورىنداۋعا اتسالىسۋ – بارشامىزدىڭ پارىزىمىز.
كارىمبەك قۇرماناليەۆ,
ۇلتتىق قۇرىلتاي مۇشەسى, ۇعا اكادەميگى
