فوتو: ارمان مۇقاتوۆ
تامارا دۇيسەنوۆا بايانداماسىندا ەلىمىزدە فيليالدارىن اشقان شەتەلدىك جوعارى وقۋ ورىندارىنا بىرىڭعاي تالاپ قويىلاتىنىن مالىمدەدى. مۇنداي تالاپقا وقۋ باعدارلامالارىنىڭ حالىقارالىق ستاندارتتارىن, وقىتۋ تەحنولوگياسىن جانە ستۋدەنتتەردىڭ ءبىلىمى مەن بىلىكتىلىگىن باعالاۋ مەحانيزمدەرىن ترانسفەرلەۋ شارالارى ەنگىزىلەدى. مۇنداي شارتتار قازان ايىنىڭ سوڭىنا دەيىن ازىرلەنەدى.
جوو-لاردىڭ ءبىلىم بەرۋ سالاسىنداعى باسەكەگە قابىلەتتىلىگىن كۇشەيتۋ ماقساتىندا كەلەر جىلدىڭ 1 ساۋىرىنە دەيىن جوعارى وقۋ ورىندارىنىڭ ءبىلىم ساپاسىن تاۋەلسىز باعالاۋ ۇيىمداستىرىلادى.
پرەمەر-ءمينيستردىڭ ءورىنباسارى بىلىم بەرۋ گرانتتارىنا قاتىستى وزگەرىستەر بولاتىنىن قوسا جەتكىزدى.
«الداعى جىلداردا گرانتتار جوعارى وقۋ ورىندارىنىڭ كىرەتىن ليگاسىنا قاراي جانە ۇلتتىق بىرىڭعاي تەستىلەۋدە جوعارى بالل العان, بىراق كونكۋرس اياسىندا وتە الماي قالعان تۇلەكتەردى قولداۋ ماقساتىندا سارالاناتىن نەمەسە ديففەرەنتسيالاناتىن بولادى. سونىمەن قاتار وسى وزگەرىستەر اياسىندا جوعارى وقۋ ورىندارىنا تۇسۋگە مۇمكىندىك بەرەتىن شەكتى بالدار دا قايتا قاراستىرىلادى», دەپ ءتۇسىندىردى تامارا دۇيسەنوۆا.
