«KAZ Minerals» كومپانياسىنىڭ ءباسپاسوز قىزمەتى حابارلاعانداي, ورىن العان وقيعالاردىڭ ءمان-جايى مەن سەبەپتەرى انىقتالىپ جاتىر. قايعىلى جاعدايلاردى تەرگەۋ ءۇشىن ارنايى كوميسسيالار قۇرىلدى. «KAZ Minerals» ديرەكتورلار توبى كەڭەسىنىڭ توراعاسى ولەگ نوۆاچۋك جازاتايىم ءمان-جايدى بىلۋگە وڭىرگە بارىپ, قارا جامىلعان وتباسىلارعا جان-جاقتى كومەك كورسەتىلەتىنىن ايتتى. سونىمەن قاتار جەرگىلىكتى بيلىك تە كومەك قولىن سوزاتىنىن جەتكىزدى.
– بۇل – قايعىلى جاعداي. ءبىز اسىراۋشىسىنان ايىرىلعان وتباسىلارعا بالالاردى وقىتۋ جانە باسقا دا ومىرلىك جاعدايلارعا قاتىستى تولىق كومەك كورسەتەمىز. وسى وقيعانىڭ ەگجەي-تەگجەيىنە جەتۋگە ءبىز كومپانيا باسشىلىعىن كۇتەمىز, – دەدى وبلىس اكىمى ەرمەك كوشەرباەۆ.
سونداي-اق وبلىس اكىمى وقيعا ورنىندا وبلىستىق پوليتسيا دەپارتامەنتىنىڭ باسشىلىعىمەن بارلىق قاجەتتى تەرگەۋ جۇمىسىنىڭ جۇرگىزىلىپ جاتقانىن اتاپ ءوتتى. انىق بولعانداي, قازا بولعان جۇمىسشىلاردىڭ ەكەۋى «ۆوستوكتسۆەتمەت» جشس قىزمەتكەرلەرى, ەكەۋى مەردىگەر ۇيىمداردىڭ قىزمەتكەرلەرى ەدى. وقيعا ورنىندا تاعى ءبىر جۇمىسشى زارداپ شەگىپ, اۋرۋحاناعا جاتقىزىلعان. دارىگەرلەردىڭ حابارلاۋىنشا, ونىڭ جاعدايى تۇراقتى.
ءوڭىر باسشىسى ەرمەك كوشەرباەۆتىڭ ايتۋىنشا, وبلىستا جەدەل شتاب قۇرىلعان.
ارنايى كوميسسيا قايعىلى جاعدايدىڭ ءمان-جايىن انىقتاۋ ءۇشىن جۇمىس جۇرگىزىپ جاتىر.
جالپى, «KAZ Minerals» – ەلىمىزدە زاماناۋي, ءىرى اۋقىمدى, از شىعىندى كارەرلىك تيپتەگى تاۋ-كەن ءوندىرىسىن دامىتۋعا باعىتتالعان, ءوسۋ الەۋەتى زور مىس ءوندىرۋشى كومپانيا. توپ وپەراتسيالىق ءىس-قىزمەتىن اباي وبلىسىندا ورنالاسقان اقتوعاي جانە پاۆلودار وبلىسىنداعى بوزشاكول اشىق كەنىشتەردە, شىعىس قازاقستان, اباي وبلىستارىنداعى ءۇش كەنىش پەن كەن بايىتۋ فابريكالارىندا, قىرعىزستانداعى بوزىمشاق مىس-التىن كەنىشىندە جۇرگىزەدى. كومپانيا 2019 جىلى ساتىپ الىنعان «بايمسكايا» مىس جوباسىنىڭ بانكتىك تەحنيكالىق-ەكونوميكالىق نەگىزدەمەسىن ازىرلەۋدى اياقتادى. رەسەيدەگى «بايمسكايا» ليتسەنزيالى الاڭىنىڭ اۋماعىندا ورنالاسقان پەسچانكا كەن ورنىنىڭ رەسۋرستارى JORC كودەكسىنە سايكەس باعالانىپ, كەندەگى مولشەرى 0,39% بولاتىن 10,4 ملن توننا مىستى جانە ۇلەسى 0,21 گ/ت بولاتىن 17,5 ملن ۋنتسيا التىندى قۇرايدى. ال 2022 جىلى مىستىڭ جالپى ءوندىرىس كولەمى 380 مىڭ توننانى قۇرادى. ىلەسپە ءونىم رەتىندە 47 مىڭ توننا كونتسەنتراتتاعى مىرىش, 171 مىڭ ۋنتسيا التىن مەن 3,8 ملن ۋنتسيا كۇمىس ءوندىرىلدى.
توپتىڭ نەگىزگى وندىرىستىك كاسىپورىندارى – اقتوعاي مەن بوزشاكول سالاداعى الدىڭعى قاتارلى دامۋ كورسەتكىشتەرىن قامتاماسىز ەتىپ, «KAZ Minerals» قورىنىڭ باسىم بولىگى الەمدىك دەڭگەيدەگى اشىق تۇردەگى كەنىشتەردەن تۇراتىن كومپانياعا اينالدىردى. ءسۋلفيدتى كەندى قايتا وڭدەۋ قۋاتىن ەكى ەسە ارتتىراتىن اقتوعايدى كەڭەيتۋ جوباسى 2021 جىلدىڭ قازان ايىندا ىسكە قوسىلىپ, جەلتوقسان ايىندا تۇتىنۋشىلارعا العاشقى ءونىم جەتكىزىلدى. جالپى, «KAZ Minerals» كاسىپورنىندا قازاقستاندا, قىرعىزستاندا, رەسەيدە شامامەن 14 000 ادام جۇمىس ىستەيدى.
شىعىس قازاقستان وبلىسى
