مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ءبىلىم جۇيەسىن ودان ءارى دامىتۋ جانە مۇعالىمدەردى قولداۋ ماسەلەسىنە ەرەكشە كوڭىل ءبولۋ قاجەتتىگىن اتاعان. وسى ماقساتتا الماتى وبلىسىندا «جايلى مەكتەپ» ۇلتتىق جوباسى اياسىندا 53 مەكتەپتىڭ قۇرىلىسى جۇرگىزىلىپ وتىر. سونىڭ العاشقىسى بولىپ قاراساي اۋدانى قوشمامبەت اۋىلىندا ەڭسەلى زاماناۋي تەحنولوگيامەن جاساقتالعان 1200 ورىندىق ءبىلىم ورداسى قولدانىسقا بەرىلدى. ناتيجەسىندە, اۋىلداعى ءۇش اۋىسىمدىق مەكتەپ ماسەلەسى تۇبەگەيلى شەشىلدى. وقۋشىلار وزىق ۇلگىدەگى كەڭ دە ساۋلەتتى ەتىپ سالىنعان سۋ جاڭا مەكتەپتە مەملەكەتتىك تىلدە ءبىلىم الادى. حالىق سانى تىعىز قونىستانعان اۋداندارداعى مەكتەپتەردىڭ اشىلۋىنا عىلىم جانە جوعارى ءبىلىم ءمينيسترى ساياسات نۇربەك پەن الماتى وبلىسىنىڭ اكىمى مارات سۇلتانعازيەۆ قاتىستى.
جاڭا وقۋ جىلىندا ءوڭىردىڭ 468 مەكتەبىندە 365 404 وقۋشى ءبىلىم الۋدى باستاپ كەتتى. بۇل وتكەن جىلمەن سالىستىرعاندا 14 173 وقۋشىعا كوپ. سونىمەن قاتار ءبىرىنشى سىنىپقا 35 631 بالا باردى.
«بالا سانى ءوسىپ وتىرعان وڭىرىمىزدە «جايلى مەكتەپ» ۇلتتىق جوباسى اياسىندا بيىل 26 ورتا مەكتەپ سالۋ قاراستىرىلعان. اتاپ ايتساق, ءبىلىم كۇنىنە قاراساي اۋدانىنىڭ قوشمامبەت, دوعان, ەلتاي اۋىلدارىندا «جايلى مەكتەپ» جوباسىمەن 1200 ورىندىق 3 مەكتەپ دايىن. «ومىرزاق» تۇرعىن ءۇي كەشەنىندە 900 ورىندىق مەكتەپ, ال الاتاۋ قالاسىنىڭ ارنا اۋىلىندا مەكتەپتىڭ 200 ورىندىق جاپسارجايى اشىلدى. ايماقتا ءۇش اۋىسىمدىق مەكتەپ ماسەلەسىن شەشۋدە جەكە ينۆەستورلار ازاماتتىق تانىتىپ, بالالارعا جاڭا ءبىلىم ورداسىن سىيعا تارتتى. مۇندا وقۋشىلاردىڭ ساپالى ءبىلىم الۋىنا بارلىق جاعداي جاسالعان. زامان تالابىنا ساي جابدىقتالعان, ەرەكشە ءبىلىم الۋشىلارعا ارنالعان ينكليۋزيۆتى ورتالىق, شەبەرحانا, كىتاپحانا, روبوتتەحنيكا, ستەند جانە موديفيكاتسيالىق كابينەتتەر, سپورت زال, اسحانا, ءماجىلىس زالدارى بالالار يگىلىگىنە قىزمەت ەتەدى. مەكتەپ مۇعالىمدەرىنىڭ وسىنداي ءزاۋلىم عيماراتتا وسكەلەڭ ۇرپاققا ساپالى ءبىلىم, سانالى تاربيە بەرەتىنىنە بۇكىل ەل-جۇرت ءۇمىت ارتىپ وتىر», دەدى سالتاناتتى ءىس-شارادا ءسوز العان وبلىس اكىمى مارات ەلەۋسىز ۇلى.
وتكەن وقۋ جىلى وبلىسقا تابىستى اياقتالدى. دارىندى بالالار مول جەتىستىككە قول جەتكىزدى. ەكى جىل بۇرىن 50-گە جۋىق بالا حالىقارالىق وليمپيادالاردىڭ جەڭىمپازى بولسا, بىلتىر بۇل كورسەتكىش 3 ەسەگە ۇلعايعانىن اتاۋ ورىندى. تالانتتى بالالار اۋىلدان شىعارى انىق. سوندىقتان دارىندى وقۋشىلار قاتارى وسىنداي جاڭا مەكتەپتە ءبىلىم العان بالالارمەن تولىعا تۇسەرىنە سەنىم زور.
«بالا – جارقىن بولاشاعىمىزدىڭ كەپىلى. ءار اتا-انا بالاسىنىڭ جاقسى ءبىلىم الىپ, ومىردەن ءوز ورنىن تابۋىنا مۇددەلى. سوندىقتان جاڭا مەكتەپ بالالارعا جاڭا مۇمكىندىكتەر اشارى ءسوزسىز. ءبىز جاس ۇرپاققا ساپالى ءبىلىم بەرۋدە زاماناۋي, جايلى مەكتەپتەر سالۋدى جالعاستىرامىز. بۇگىن اشىلعان ءتورت جاڭا مەكتەپ – وسى ماقساتقا جەتۋگە باعىتتالعان كەڭ اۋقىمدى جوسپارىمىزدىڭ ءبىر بولىگى عانا», دەگەن ءوڭىر باسشىسى زاماناۋي مەكتەپتىڭ ۋاقىتىندا سالىنۋىنا ۇلەس قوسقان مەردىگەر كومپانيا وكىلدەرىن العىسحاتپەن ماراپاتتادى.
«ەلىمىزدە دەموگرافيالىق احۋال ايتارلىقتاي جاقسارىپ كەلەدى. كەيىنگى ءۇش جىلدا 1,5 ميلليوننان استام بالا دۇنيەگە كەلگەن. بۇل – رەكوردتىق كورسەتكىش. سوندىقتان بالالارىمىزدىڭ كەمەل كەلەشەگى ءۇشىن پرەزيدەنتتىڭ تىكەلەي باقىلاۋىمەن وسىنداي جاڭا ستاندارتتى, جاڭا مودەلدى «جايلى مەكتەپ» سالىنىپ وتىر. بيىل ەلىمىز بويىنشا 226 مەكتەپ اشىلادى, كەلەسى جىلى ءدال وسىنداي 175 مەكتەپ ىسكە قوسىلدى», دەگەن عىلىم جانە جوعارى ءبىلىم ءمينيسترى ساياسات نۇربەك ۇستاز, وقۋشى, اتا-انا ءبىر-بىرىمەن بايلانىستا بولۋ كەرەگىن اتاپ ايتتى. سونداي-اق مينيستر بالانىڭ ءبىلىمدى, ءتارتىپتى بولۋى ورتاق ءىستىڭ جەمىسى ەكەنىن ەسكە سالدى.
ء«وزىم وسى اۋىلدا تۋىپ-ءوستىم. اكەم ۇزاق جىل مەكتەپتە ۇستازدىق ەتكەن ەدى. مەن دە اكە جولىن جالعاستىرىپ, 30 جىل بويى باستاۋىش سىنىپ وقۋشىلارىن وقىتىپ كەلەمىن. ەسكى مەكتەبىمىزدە بالا سانى وتە كوپ بولدى. سىنىپقا سىيماي, ءۇش اۋىسىمدا وقىتتىق. ەندى جارتىسىنا جۋىعى جاڭا مەكتەپكە اۋىستى. ءسويتىپ, ەكى اۋىسىمدا وقيتىن بولامىز. بۇگىن ارىپتەستەرىمدى قۇتتىقتاي كەلدىم. ءسان-سالتاناتى جاراسقان جاڭا عيماراتتىڭ وقۋشىلارى جاقسى وقىپ, ۇستازدارى شابىتتانا جۇمىس ىستەۋىنە تىلەكتەسپىن!», دەيدى اۋىل مۇعالىمى اقمارال جازىقباەۆا.
مەملەكەتتىك تىلدە ءبىلىم بەرەتىن سۋ جاڭا مەكتەپتە وقۋشىلار 1 اۋىسىممەن وقيدى. وندا 12 وقۋ كابينەتى, 3 شەبەرحانا, 3 كومپيۋتەر سىنىبى, حيميا, فيزيكا, بيولوگيا, باسقا دا پاندەرگە لايىقتالىپ جابدىقتالعان ارنايى كابينەتتەر مەن اكت زال, سپورت زال بار. 125 ورىندىق اسحانا جاساقتالىپ, كىتاپحانا ىسكە قوسىلعان. مەديتسينالىق كابينەتتەر ورنالاستىرىلعان. وندا لوگوپەد, پسيحولوگ, ويىن ويناۋ كابينەتتەرى قاراستىرىلعان.
جاڭا وقۋ جىلىندا «Beeline Kazakhstan», «ۆەرنىي كاپيتال» جانە بولات وتەمۇراتوۆ قورىنىڭ قولداۋىمەن شەلەك اۋىلى مەن ەسىك قالاسىندا ارقايسىسى 900 ورىندىق جاڭا مەكتەپتەر پايدالانۋعا بەرىلدى.
الماتى وبلىسىندا وسى كۇنى 39 ورتا مەكتەپ ءۇش اۋىسىمدا ءبىلىم بەرەدى. ەسكە سالار بولساق, 2025 جىلعا دەيىن «جايلى مەكتەپ» جوباسى شەڭبەرىندە 54 600 ورىندىق 53 مەكتەپ سالۋ جوسپارلانعان. بۇل وڭىردە ءۇش اۋىسىمدى وقۋدى تولىقتاي جويۋعا جانە ءاربىر بالاعا ساپالى ءبىلىم بەرۋدى قامتاماسىز ەتۋگە مۇمكىندىك بەرمەك.
الماتى وبلىسى
