ءبىلىم كۇنى الماتى قالاسىندا ەرەكشە سالتاناتپەن ءوتىپ, 29 مىڭنان استام 1-سىنىپ وقۋشىلارىنا العاشقى قوڭىراۋ سوعىلدى.
سونداي-اق مەملەكەت باسشىسىنىڭ تاپسىرماسى بويىنشا ىسكە اسىپ جاتقان ۇلتتىق جوبا اياسىندا الماتى قالاسىنداعى اۋەزوۆ اۋدانىندا «جايلى مەكتەپ» اشىلدى. بۇل العاشقى زاماناۋي ءبىلىم ورداسى 60 جىلدىق تاريحى بار اپاتتى دەپ تانىلعان №97 مەكتەپ-گيمنازيانىڭ ورنىنا سالىندى.
جاڭا مەكتەپتىڭ اشىلۋىنا الماتى قالاسى اكىمىنىڭ ورىنباسارى اسەم ءنۇسىپوۆا قاتىسىپ, پەداگوگتەر مەن وقۋشىلاردى ءبىلىم كۇنىمەن قۇتتىقتادى.
– ءبىلىم كۇنىمەن بارلىعىڭىزدى شىن جۇرەكتەن قۇتتىقتايمىن! بۇگىن جاڭا وقۋ جىلىنىڭ العاشقى قوڭىراۋى سوعىلىپ وتىر. وقۋشىلار جاڭا ءبىلىم مەن عىلىم الەمىنە ەسىك اشتى. بيىل مەكتەپ پارتاسىنا قالا بويىنشا 307 مىڭنان اسا وقۋشى وتىردى. جاڭا وقۋ جىلى بارىڭىزگە قىزىقتى ءارى جەمىستى بولسىن! – دەدى ءا.ءنۇسىپوۆا.
جاڭا مەكتەپ 600 ورىنعا ارنالعان. مۇندا ەرەكشە ءبىلىم بەرۋ قاجەتتىلىگى بار بالالار ءۇشىن ينكليۋزيۆتى كەدەرگىسىز ورتا, بالالار شىعارماشىلىعىن دامىتۋعا ارنالعان ايماقتار, وقۋ داعدىلارى, تسيفرلىق تەحنولوگيالاردى يگەرۋ, سونداي-اق باستاۋىش جانە ورتا مەكتەپ سىنىپتارى ءۇشىن بولەك بلوكتار قاراستىرىلعان.
زاماناۋي مەكتەپتىڭ اشىلۋىن اسىعا كۇتكەن اتا-انالار دا ءوز قۋانىشتارىمەن ءبولىسىپ, ريزاشىلىقتارىن ءبىلدىردى.
قازىرگى تاڭدا «جايلى مەكتەپ» ۇلتتىق جوباسىن ىسكە اسىرۋ اياسىندا الماتى اكىمدىگىنىڭ جوبالىق ءوفيسىنىڭ قولداۋىمەن 36,8 مىڭ وقۋشىعا ارنالعان 22 مەكتەپتىڭ قۇرىلىسى ءجۇرىپ جاتىر. بيىل جىل سوڭىنا دەيىن 32,8 مىڭ ورىندىق 20 مەكتەپتى پايدالانۋعا بەرىلەدى. ال كەلەسى جىلى تاعى دا 4 مىڭ ورىندىق ەكى مەكتەپتى ىسكە قوسۋ جوسپارلانعان.
الماتى
