قاسىم-جومارت توقاەۆتىڭ كەشەگى ءسوزى ەلدىڭ كوكەيىندەگىنى ءدوپ باستى دەپ سەنىممەن ايتا الامىز. نەگە؟ جۇرتشىلىق ەكونوميكانىڭ ناقتى سەكتورىنا كرەديت ءبولۋدىڭ تومەن دەڭگەيدە تۇرعانىن, سودان بارىپ ىسكەرلىك بەلسەندىلىكتىڭ بەلەڭ الماي كەلە جاتقانىن ايتاتىن. پرەزيدەنت سالىق ساياساتىن قايتا قاراۋ, ونى دا ادىلەتتىلىككە بەيىمدەۋ كەرەك ەكەنىن ەسكەرتتى. بيۋدجەت شىعىنىن شەكتەۋ قاجەتتىگى دە ءسوز ەتىلدى. پرەزيدەنت كورپەگە قاراپ كوسىلمەسكە بولمايتىنىن, شاشپالىقتىڭ شالاعايلىقپەن شەندەسەتىنىن اتاپ كورسەتتى. مەملەكەت باسشىسى ەۋرازيانىڭ قاق ورتاسىنداعى قازاقستاننىڭ كولىك ينفراقۇرىلىمىن ارتىقشىلىققا اينالدىرۋعا ابدەن بولاتىنىن ناقتى نۇسقادى.
ەلدىڭ ەلەڭدەي جاۋاپ كۇتكەن تاعى ءبىر تاقىرىبى – اتوم ەنەرگەتيكاسىن دامىتۋدىڭ جايى ەدى. ول دا ايتىلدى. توقاەۆ بۇل ماسەلەنىڭ سۋ رەسۋرستارى شەكتەۋلى قازاقستان ءۇشىن ستراتەگيالىق ماسەلە ەكەنىن ەسكە سالىپ ءوتتى. تاعدىرشەشتى شارۋانىڭ شەشۋىن ەلدىڭ وزىنە قالدىردى ءارى بۇل ماسەلە بويىنشا رەفەرەندۋم وتەتىن كۇندى بەلگىلەپ بەردى. ينفراقۇرىلىمدىق جوبالاردىڭ ەڭ ءبىر تولعاعى جەتكەندەرىنە, اسىرەسە ەنەرگەتيكا سەكتورىنداعى ۇزاقمەرزىمدى تاريف ساياساتىن قالىپتاستىرۋدىڭ جايىنا توقتالا كەلىپ, جاھاندىق ەنەرگيا تاپشىلىعى جاعدايىندا قۋاتتىڭ سەنىمدى كوزدەرىنە, اسىرەسە اتوم ەنەرگەتيكاسىنا كوڭىل ءبولۋدىڭ ماڭىزدىلىعىن قاداپ ايتتى. ءوز تاراپىمىزدان الەمدەگى ۋران قورىنىڭ شيرەك بولىگى (شيرەك بولىگى وڭتۇستىك افريكا رەسپۋبليكاسىندا, قالعان جارتىسى باسقا ەلدەردە) شوگىپ جاتقان قازاقستانداي ەلدە جاراتقاننىڭ بۇل سىيلىعىنان باس تارتۋدىڭ كوكەيگە قونىمسىزدىعىن, ەندىگى بار ماسەلە بولاشاق جوبانىڭ ويداعىداي جۇزەگە اسۋىندا, بۇل تازا ەكونوميكالىق پروبلەمانىڭ ساياسيلانۋىنا جول بەرمەۋدە ەكەنىن قوسا ايتا كەتەر ەدىك.
2025 جىلدى جۇمىسشى ماماندىقتارى جىلى دەپ جاريالاۋ جونىندەگى شەشىم دە كوپتىڭ كوڭىلىنەن شىعارى ءسوزسىز. بۇل ارقىلى جۇمىس ادامىنىڭ, كاسىپ يەسىنىڭ ابىرويىن كوتەرەمىز, ەڭبەكتىڭ قادىر-قاسيەتىن ارتتىرامىز. ءومىردى وزگەرتەتىن – تەك ەڭبەك. ەڭبەك بار قيىندىقتى جەڭبەك. بار يگىلىك تەك ەڭبەكپەن كەلمەك.
جولداۋدان ءوزىمىز ىزدەگەن تالاي سۇراققا جاۋاپ تاپتىق, بۇل قۇجات العا قويعان تىڭ تالاپتار ويداعىداي ورىندالعان جاعدايدا ءومىرىمىزدىڭ جاڭا ءورىسىن اشا الادى دەيتىنىمىز دە سوندىقتان.
ساۋىتبەك ابدراحمانوۆ,
مەملەكەتتىك سىيلىقتىڭ لاۋرەاتى
