فوتو: اشىق دەرەككوز
مينيسترلىكتىڭ مالىمەتىنشە, بۇگىندە جوبا اياسىندا 165 شاقىرىم كانال, 155 شاقىرىم كوللەكتور جانە 706 گيدروتەحنيكالىق قۇرىلىستى جوندەۋ اياقتالعان. ناتيجەسىندە بىرقاتار كانالداردىڭ تيىمدىلىگى ارتىپ, پايدالى اسەر كوەففيتسيەنتى 60%-دان 90%-عا دەيىن ۇلعايعان.
سونىمەن قاتار جوبانى 2025 جىلى اياقتاۋ جوسپارلانىپ وتىر. ناتيجەسىندە, 12,5 مىڭ گەكتار ەگىس القابىنا سۋ بەرۋ ساپاسى جاقسارادى. سونداي-اق جىل سايىنعى سۋ شىعىنى 45 ملن تەكشە مەترگە ازايىپ, جاڭادان 2400 تۇراقتى جۇمىس ورنى اشىلادى.
«بۇگىندە قۇرىلىس-مونتاج جۇمىستارىنىڭ جارتىسى اياقتالدى. قازىر تۇركىستان وبلىسىندا بىرقاتار ءىرى جوبالار جۇزەگە اسىرىلىپ جاتىر. سۋ رەسۋرستارى جانە يرريگاتسيا مينيسترلىگىنىڭ قولداۋىمەن 68 ملن تەكشە مەتر سۋ جيناي الاتىن «بايدىبەك-اتا» سۋ قويماسى, سونداي-اق ۇزىندىعى 21,7 شاقىرىم بولاتىن «سارقىراما» كانالى سالىنىپ جاتىر», دەدى تۇركىستان وبلىسى بويىنشا «قازسۋشار» فيليالىنىڭ ديرەكتورى قازىبەك بەدەباەۆ.
