سونىڭ ناتيجەسىندە تاۋلى ايماقتىڭ كوز اربايتىن كوركەم سۇلۋلىعىن, عاجايىپ كورىنىستەرىن سىرت ەتكىزۋ ارقىلى جان-جاقتى جارنامالاپ, ىشكى-سىرتقى ءتۋريزمنىڭ دامۋىنا ىقپال ەتۋگە مۇمكىندىك مول.
ساپار جەتەكشىسى – ولكەتانۋشى ساعاتبەك مەدەۋبەك ۇلى. ول بۇل ءىس-شارانىڭ باستى ماقساتى اۋداندا ءتۋريزمدى دامىتۋ, ءوڭىردىڭ تاريحي ورىندارى مەن كورنەكى جەرلەرىن ناسيحاتتاۋ ءۇشىن زاماناۋي تالاپتارعا ساي فوتوعا ءتۇسىرۋ جانە تۇسىرىلگەن ەڭ ۇزدىك فوتولاردى باق, الەۋمەتتىك جەلىلەر ارقىلى تاراتۋ ەكەنىن ايرىقشا اتادى. وسى ماقساتتا «جەرۇيىق كورەم دەسەڭ, كەگەنگە كەل» اتتى ءۇش كۇندىك فوتوساپار ۇيىمداستىرىلدى. ماڭىزى زور ءىس-شاراعا كەگەن اۋدانىنىڭ اكىمدىگى قولداۋ كورسەتتى.
ولكەتانۋ ساپارىنا ءار دەڭگەيلى باق وكىلدەرى, رەسپۋبليكالىق «فوتوونەر» بىرلەستىگىنىڭ جەتەكشىسى, فوتوونەرتانۋشى اسىلحان ءابدرايىم, ارداگەر فوتوجۋرناليست نۇرمانبەت قيزات ۇلى, فوتوسۋرەتشى, عالىم دوسجان بالابەك ۇلى, فوتوسۋرەتشى ەرنۇر ماناپحان, فوتوسۋرەتشى, جۋرناليست داۋرەن مۇحامەتجانوۆ, ترەۆەل-بلوگەر مالىك كۇشمۇحانوۆ, موبيلوگراف ايىم باحىبەك, فوتوسۋرەتشى مارعۇلان جانۇزاق قاتىستى. ولار اۋداننىڭ بارلىق اۋىلدىق وكرۋگتەرىن ارالاپ, ونداعى ەرەۋىلتوبە, جۋانتوبە, قۇمتەكەي سىندى تاريحي جەرلەردى, ەكىاشا جايلاۋى, ورتا مەركى, قىزىلاراسان, تاڭبالىتاستى, اعاناس جازىعىن, كولساي كولىن, كورتوعاي شاتقالدارىنان قايتالانباس سۋرەتتەر ءتۇسىرىپ, قورجىندارىن توعايتتى. ولكەنىڭ سۇلۋ تابيعاتى مەن شەجىرەلى تاريحىنا قانىقتى.
«نۇرمانبەت اعالارى باتا بەرگەن,
جىگىتتەردىڭ بارلىعى فوتومەرگەن.
تابيعاتتىڭ, تاريحتىڭ قاجەتتىسىن,
ۇرپاققا امانات دەپ «اتا» كەلگەن», دەپ ەتنوگراف ساعاتبەك مەدەۋبەك ۇلى جىرمەن تۇيىندەگەندەي, بۇگىنگى فوتو – ەرتەڭگى ەل شەجىرەسىنە اينالارى اقيقات. كاسىپقوي فوتوگرافتار مەن ولكەتانۋشىلاردىڭ تىڭ سۋرەتتەرى ءباسپاسوز بەتتەرى مەن الەۋمەتتىك جەلىلەردە جاريالانىپ قانا قويماي, وڭىردە ءتۋريزمنىڭ دامۋىنا زور ىقپال ەتەرىنە ءۇمىتتى.
الماتى وبلىسى
