ينتەرنەت پلاتفورمالاردا ەڭبەك ەتەتىن ازاماتتار دا الەۋمەتتىك قولداۋ شارالارىنان قۇر قالماۋعا ءتيىس. بۇگىندە مەملەكەت باسشىسىنىڭ تاپسىرماسىن ورىنداۋ ءۇشىن الەۋمەتتىك كودەكسكە, سالىق كودەكسىنە جانە مىندەتتى الەۋمەتتىك مەديتسينالىق ساقتاندىرۋعا بىرقاتار تۇزەتۋ ەنگىزىلىپتى. ينتەرنەت پلاتفورمادا جۇمىس ىستەۋ دەگەننىڭ ءوزىن كوپشىلىك تابىس تابۋدىڭ تاعى ءبىر مۇمكىندىگى رەتىندە قارايدى. ءارى وسى مۇمكىندىكتى پايدالاناتىندار جىل سايىن كوبەيىپ كەلەدى. ساراپشىلاردىڭ پىكىرىنشە, ەلدە قازىردىڭ وزىندە 500 مىڭداي ازامات وسى سالادا ەڭبەكتەنىپ, تابىس تاۋىپ ءجۇر. ءدال قازىر پلاتفورمالاردىڭ ىشىندە كەڭ تاراعانى كۋرەرلىك جۇمىس, تاكسي جۇرگىزۋشىلەرىنىڭ قىزمەتى بولىپ تۇر.
ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ پلاتفورمادا جۇمىس ىستەۋدىڭ ارتىقشىلىعى جۇمىس كەستەسىنىڭ ەركىندىگىندە ەكەنىن ايتتى.
– پلاتفورماداعى جۇمىستى نەگىزگى جۇمىسپەن قاتار الىپ جۇرۋگە بولدى. ارينە, مۇنداي جۇمىستىڭ تاۋەكەلدەرى دە جوق ەمەس. بۇل ءبىرىنشى كەزەكتە تابىستىڭ تۇراقتى بولماۋىمەن, كولەڭكەلى قاتىناستاردىڭ كوبەيۋىمەن بايلانىستى. جۇمىسشىلاردىڭ مەملەكەت ۇسىنعان كەپىلدىكتەردەن قاعىلۋى دا وڭاي شارۋا ەمەس. سەبەبى بۇل ازاماتتىڭ مەديتسيتسينالىق قىزمەت الۋىنا, الەۋمەتتىك احۋالىنا اسەر ەتۋى مۇمكىن. مەملەكەت باسشىسى تسيفرلىق ەكونوميكاعا ارالاساتىن ەل ازاماتتارىنىڭ قۇقىن قورعاۋدىڭ شارتتارى مەن تەتىكتەرىن ازىرلەۋدى تاپسىردى. ەڭبەك جانە حالىقتى الەۋمەتتىك قورعاۋ مينيسترلىگى تاراپىنان بىرقاتار ءىس-شارا قابىلداندى. شىلدەدە قابىلدانعان زاڭ شەڭبەرىندە الەۋمەتتىك كودەكسكە, سالىقتىق كودەكسكە جانە مىندەتتى الەۋمەتتىك مەديتسينالىق ساقتاندىرۋ تۋرالى زاڭعا وزگەرىستەر ەنگىزىلدى. وcى تۇزەتۋلەردىڭ ەسەسىنە «e-Salyq Business» قوسىمشاسىنىڭ ارنايى سالىقتىق جۇيەسىن قولداناتىندار ءۇشىن تولەمدەردى ازايتۋعا ىقپال ەتەتىن بىرقاتار شەشىم قابىلداندى. مۇندا جەكە تابىس سالىعىنا, مەديتسينالىق ساقتاندىرۋعا, الەۋمەتتىك ساقتاندىرۋعا جانە زەينەتاقى جارناسىنا تابىستىڭ 1 پايىزىن اۋدارىپ وتىرۋعا مۇمكىندىك قاراستىرىلعان, – دەيدى ا.سارباسوۆ.
وسى جەڭىلدەتىلگەن رەجىم ارنايى سالىقتىق رەجىمدى قولدانۋعا دايىن ازاماتتار ءۇشىن ءتيىمدى. «e-Salyq Business» سالىق شەڭبەرىندە جەڭىلدەتىلگەن سالىقتىق رەجىمنىڭ ارتىقشىلىعى كوپ. بۇل رەجىمگە كوشۋدى ويلاعاندار ارنايى سالىقتىق جۇيەمەن سالىق تولەيدى. مۇنىڭ ءداستۇرلى سالىقتىق رەجىممەن سالىق تولەيتىندەردەن ارتىقشىلىعى كوپ. مىسالى, ءداستۇرلى سالىقتىق رەجىمدى قولداناتىندار اي سايىن كەم دەگەندە 17 مىڭ تەڭگە تولەپ وتىرادى. ال جەڭىلدەتىلگەن سالىق رەجىمى ارقىلى تابىستىڭ 4 پايىزىن عانا سالىققا تولەۋگە مۇمكىندىك تۋادى.
– ەگەر تابىس 200 مىڭ تەڭگەنىڭ شاماسىندا بولسا, وندا ءداستۇرلى سالىق رەجىمى بويىنشا 17,5 مىڭ تەڭگە مولشەرىندە تولەم تولەۋ قاجەت. ال جەڭىلدەتىلگەن رەجىم تابىستىڭ تەك 4%-ىن تولەۋگە مۇمكىندىك بەرەدى. الدا مەملەكەتتىك كىرىستەر كوميتەتى, «ازاماتتارعا ارنالعان ۇكىمەت», سونداي-اق ۇلتتىق بانكپەن بىرگە ءوزارا ءىس-قيمىلدىڭ ءتيىستى قاعيدالارىن ازىرلەيمىز. جالپى, «ينتەرنەت پلاتفورمالار», «ينتەرنەت پلاتفورمالاردىڭ وپەراتورى», «تاپسىرىس بەرۋشىلەر», «ورىنداۋشىلار» ۇعىمدارى زاڭنامالىق تۇردە بەكىتىلگەن. قىزمەتكەر مەن زاڭدى تۇلعا اراسىنداعى ءوزارا قارىم-قاتىناس ەڭبەك كودەكسى شەڭبەرىندە رەگلامەنتتەلگەن. ايتا كەتەتىن تاعى ءبىر اقپارات, ينتەرنەت پلاتفورمالاردا جۇمىس ىستەيتىن جەكە تۇلعالارعا قاتىستى سالىق رەجىمدەرى قاراستىرىلعان. قاناتقاقتى جوباعا 13 مىڭ تاكسي جۇرگىزۋشىسى قاتىسادى دەگەن بولجام بار, – دەيدى ۆيتسە-مينيستر.
ا.سارباسوۆ تۇسىندىرگەندەي, جۇمىسشىلار ارنايى سالىق رەجىمىن قولدانا وتىرىپ, جەكە كاسىپكەر رەتىندە تىركەلۋى قاجەت. جىلدىڭ سوڭىنا دەيىن اقپاراتتىق جۇيەلەردى سىناقتان وتكىزۋ جانە ينتەگراتسيالاۋ تەتىكتەرى تولىق ىسكە قوسىلادى. سەبەبى جىل سوڭىنا دەيىن وسى تەتىكتەردىڭ بارلىعى تولىق جۇمىس ىستەۋى قاجەت.
