فوتو: gov.kz
«كوكسۋ قانت زاۋىتىنىڭ» قۋاتتىلىعى تاۋلىگىنە 2500 توننا قانت قىزىلشاسى مەن 300 توننا قامىس شيكىزاتىن قۇرايدى. 2023 جىلى زاۋىتتا 53 مىڭ توننا قانت وندىرىلسە, 2024 جىلدىڭ 7 ايىندا 23 مىڭ توننا قانت ءوندىرىلدى.
مينيستر زاۋىتتى ارالاپ كورىپ, سودان كەيىن قىزىلشا قابىلداۋ پۋنكتىنىڭ اۋماعىندا قىزىلشا ەگەتىن فەرمەرلەرمەن كەزدەستى.
«شارۋالار مەملەكەت تاراپىنان قولداۋ تاۋىپ جاتىر. ارزانداتىلعان ججم ءبولىندى, تىڭايتقىشتارعا, تۇقىمدارعا, گەربيتسيدتەرگە سۋبسيديالار تولەنەدى. ەگىس جۇمىستارى ءۇشىن جەڭىلدەتىلگەن نەسيەلەۋ قاراستىرىلعان. بارلىق ايتىلعان ماسەلەلەردى بىرتىندەپ شەشەمىز», دەدى ايداربەك ساپاروۆ كەزدەسۋدە.
اقسۋ اۋدانىندا مينيستر «اقسۋ كانت» جشس جاڭا ماۋسىمىنا دايىندىق جۇمىستارىنىڭ بارىسىمەن تانىستى. كاسىپورىننىڭ قۋاتتىلىعى تاۋلىگىنە 3500 توننا قانت قىزىلشاسىن قۇرايدى. وتكەن جىلى زاۋىت قۋاتتىلىعى تاۋلىگىنە 400 توننا قامىس شيكىزاتىن قايتا وڭدەۋ جەلىسىن ورناتتى. وتكەن جىلى زاۋىت قازان ايىندا ىسكە قوسىلدى, جىل سوڭىنا دەيىن 10 مىڭ توننا قانت ءوندىرىلدى.
ەسكەلدى اۋدانىندا مينيستر «دۇيسەمبينوۆ» شق قىزىلشا القابىندا بولدى. جۇمىس ساپارىنىڭ قورىتىندىسى بويىنشا وبلىس اكىمدىگىنە ەگىن جيناۋ بارىسىن باقىلاۋعا الۋ, قانت قىزىلشاسىن جيناۋ بويىنشا ەگىن جيناۋ ناۋقانىن ۇيىمداستىرۋعا جاردەمدەسۋ تاپسىرىلدى.
بيىل قازاقستاندا رەكوردتىق 1,1 ملن توننا قانت قىزىلشاسىن جيناۋ جوسپارلانۋدا. وسىعان بايلانىستى جامبىل وبلىسى مەن جەتىسۋ وبلىسىنىڭ شارۋالارى ءۇشىن شيكىزاتتى وتكىزۋ جانە قايتا وڭدەۋ ماسەلەسى وزەكتى بولىپ وتىر.
بۇعان دەيىن ايداربەك ساپاروۆ جامبىل وبلىسىنىڭ كاسىپورىندارىندا بولىپ, فەرمەرلەرمەن كەزدەستى. ساپار قورىتىندىسى بويىنشا قانت قىزىلشاسىن جونەلتۋگە, وڭدەۋگە قاتىستى ماسەلەلەر جەدەل شەشىلدى.
