جارىستىڭ اياقتالۋىنا نەبارى ەكى تۋر قالعاندا قازاقتىڭ دارىندى قىزى العا شىقتى. بۇل رەتتە ول يسپانيانىڭ نامىسىن قورعاعان يراندىق ساراسادات حادەمالشاريەح پەن شۆەيتساريانىڭ تۋى استىندا ونەر كورسەتىپ جۇرگەن رەسەيلىك الەم جانە ەۋروپا چەمپيونى, الەم كۋبوگىنىڭ جەڭىمپازى الەكساندرا كوستەنيۋكتى قاپى قالدىردى. ال لەلا دجاۆاحيشۆيلي مەن نانا دزاگنيدزە (گرۋزيا), ماريا مەن اننا مۋزىچۋك (ۋكراينا), الينا كاشلينسكايامەن (پولشا) ۇپاي ءبولىستى. قالعان ەكى ويىننىڭ ەڭ بولماعاندا بىرەۋىن جەڭىسپەن اياقتاعاندا باس جۇلدە بيبىساراعا بۇيىراتىن ەدى. الايدا ستاۆرۋلا تسولاكيدۋ (گرەكيا) جانە رامەشبابۋ ۆايشاليگە ء(ۇندىستان) قارسى كەزدەسۋلەر تەڭ اياقتالدى. ءسويتىپ, 9 مۇمكىندىكتەن 5,5 ۇپاي جيعان اساۋباەۆا كۇمىس مەدالدى موينىنا ءىلدى. ءبىرىنشى ورىندى الينا كاشلينسكايا ولجالاسا, ستاۆرۋلا تسولاكيدۋ ءۇشىنشى ساتىعا تابان تىرەدى.
– بۇگىن تبيليسيدە ايەلدەر اراسىنداعى گران-پري دوداسىنىڭ ءبىرىنشى كەزەڭى اياقتالدى. بۇل سەريا ءۇش تۋرنيردەن تۇرادى. سول جارىستاردا جەر-جاھاننىڭ 20 ۇزدىك شاحماتشىسى ءبىر-بىرىمەن شەبەرلىك بايقاسىپ, «ۇمىتكەرلەر تۋرنيرىنە» قاتىسۋعا جول اشاتىن ەكى جولداما ءۇشىن تالاسادى. گرۋزيانىڭ استاناسىندا مەن 9 مۇمكىندىكتەن 5,5 ۇپاي الدىم. ءبىر قۋانتارلىعى, بىردە-ءبىر باسەكەدە ۇتىلعان جوقپىن. ناتيجەسىندە, ەكىنشى ورىندى ەنشىلەدىم. ارينە, ودان دا جاقسى ناتيجە كورسەتۋگە تىرىسقانىم راس. ەندى كەلەسى جولى باس جۇلدەنى ولجالاۋ ءۇشىن بارىمدى سالامىن, – دەيدى ب.اساۋباەۆا.
فيدە-ءنىڭ گران-پري ءتۋرنيرىنىڭ كەلەسى كەزەڭى وسى جىلدىڭ قازان ايىندا شىمكەنتتە وتەدى. سول جارىستا دا اتاقتارى الىسقا جايىلعان كوپتەگەن مىقتى گروسسمەيستەر ونەر كورسەتەدى.
