كىتاپتا ت. قاناەۆتىڭ سوزىنە جازىلعان 52 ءان مەن اۆتوردىڭ ءوزى شىعارعان كۇيلەرى ەنگىزىلگەن. العاشقى بەتتەرىندە تۇرعانبەك قاناەۆ جازعان عۇمىرناماسى, نارتاي اقىننان, مايلىقوجا اقىننىڭ نەمەرە ءىنىسى ايتقوجا اقىننان, ەلىمىزگە بەلگىلى شەرتپە كۇيدىڭ شەبەرى تولەگەن مومبەكوۆتەن باتا العان ساتتەرى, ونەر جولىنداعى جەتىستىكتەرى باياندالعان.
«شاردارادان شىرقالعان اندەر» جيناعى – تۇرعانبەك قاناەۆتىڭ ءتورتىنشى كىتابى. بۇعان دەيىن «مەرس» پرەپاراتىنىڭ تيىمدىلىگى تۋرالى عىلىمي نەگىزدە جازىلعان العاشقى ەڭبەگى جارىق كورگەن ەدى. «ەڭبەگىم تۋعان ەلىمە», «ەلدىڭ ءسوزىن سويلەدىم» اتتى كىتاپتارى وقىرماندارىمەن قاۋىشقان. ەندى مىنە, تازا ءان الەمىنە ارنالعان جاڭا تۋىندىسى ومىرگە كەلدى.
«مۋزىكا كىتاپتارىندا ءاننىڭ نوتاسى جازىلعان بولسا دا, ول كوپشىلىك قاۋىمعا تۇسىنىكسىز. سول سەبەپتى ءار ءانىمنىڭ جانىنا QR-كود ەنگىزۋدى ءجون كوردىم. سول ارقىلى وقىرمان قاۋىم كىتاپتى وقىپ قانا قويماي, ونداعى مۋزىكالىق شىعارمالاردى تەلەفون ارقىلى تىڭداي الادى. بۇل كىتاپ ىسىندەگى تسيفرلاندىرۋدىڭ وزىق ناتيجەسى دەپ بىلەمىن», دەيدى اۆتور.
اۆتوردىڭ كۇي ونەرىنە دە قۇلاش ۇرعانىن بايقادىق. «سۇتكەنت تولعاۋى», «شاردارا شالقىماسى», «تولعاۋ» دەپ اتالاتىن كۇيلەرى بەرىلىپتى. سونداي-اق شىڭعىس ءبورى ۇلى «تۇرعانبەك تولعاۋى», ق. ءابىش «تۇرعانبەك» دەپ اتالاتىن اۆتورعا ارنالعان تۋىندىلارىن قوسا ەنگىزگەن.
جۇرەگىنەن شىققان ءاربىر دۇنيەسىنە ۇقىپتىلىقپەن قاراپ, قاعازعا قاتتاپ وتىرعان اۆتوردىڭ ەڭبەكقورلىعىنا, ىزدەنىمپازدىعىنا تاعى دا ءتانتى بولدىق.
ءادىل ءابدىرامانوۆ,
جۋرناليستەر وداعىنىڭ مۇشەسى
