يگى شارا پارتيانىڭ «باقىتتى وتباسى» جوباسى اياسىندا ءوڭىردىڭ بارلىق اۋدانىندا ءوتىپ جاتىر. بۇل اكتسيا جىل سايىن ءداستۇرلى تۇردە ۇيىمداستىرىلىپ كەلەدى. ماقساتى – الەۋمەتتىك تۇرعىدان از قامتىلعان وتباسىلاردىڭ بالالارىن مەكتەپكە دايارلاۋعا قولداۋ كورسەتۋ.
اكتسيانىڭ العاشقى كۇنى قوناەۆ قالاسىندا ءوتتى. بۇل كۇنى «Amanat» پارتياسىنىڭ مۇشەلەرى 45 بالاعا مەكتەپ فورماسىن, وقۋلىقتار, سومكەلەر جانە كەڭسە تاۋارلارىن تابىستادى.
«مەكتەپ جاسىنداعى بالالارعا جاڭا وقۋ جىلى باستالار الدىندا قۋانىش سىيلاپ, وقۋشىلاردى كەرەك-جاراعىمەن قامتىپ كەلە جاتقان اكتسيا بيىل دا جالعاسىن تاۋىپ وتىر. بۇل – قايىرىمدىلىق اكتسياسى ءبىر رەت قانا وتكىزىلەتىن ءىس-شارا ەمەس, ءوڭىر تۇرعىندارىنىڭ ءال-اۋقاتىن ارتتىرۋعا باعىتتالعان پارتيانىڭ اۋقىمدى جۇيەلى جۇمىسىنىڭ ءبىر بولىگى. ماسەلەن, بەس كۇن ىشىندە فراكتسيا مۇشەلەرى 16 ملن تەڭگەدەن اسا سوماعا 350-گە جۋىق بالانى مەكتەپكە دايارلادىق. ناۋقان سوڭىنا دەيىن 1 200 وقۋشىنى قامتۋدى جوسپارلاپ وتىرمىز», دەدى «Amanat» پارتياسى الماتى وبلىستىق فيليالىنىڭ اتقارۋشى حاتشىسى ەرلان جاقىپوۆ.
پارتيالىقتار جاڭا وقۋ جىلىنا دەيىن مۇنداي ءىس-شارانى بىرنەشە مارتە ۇيىمداستىرۋدى جوسپارلاپ وتىر. بۇعان ماسليحاتتارداعى «Amanat» پارتياسىنىڭ دەپۋتاتتىق فراكتسيا مۇشەلەرى اتسالىسىپ جاتىر.
الماتى وبلىسى
