- مەن پاۆەل دۋروۆقا جانە Telegram كومانداسىنا سوڭعى وقيعالارعا بايلانىستى قولداۋىمدى بىلدىرگىم كەلەدى. سەنبى كۇنى پاۆەلدىڭ فرانتسۋز بيلىگىمەن كونتەنت مودەراتسياسىنىڭ جوقتىعى جانە قۇقىق قورعاۋ ورگاندارىمەن ىنتىماقتاستىقتان باس تارتقانى ءۇشىن ۇستالعانى حابارلاندى, - دەپ جازدى مينيستر جەلىدە.
سونداي-اق ول تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى اتىنان Telegram كومانداسىمەن ءوزارا ارەكەتتەسۋدىڭ وڭ تاجىريبەسى قالىپتاسقانىن باسا اتاپ وتەدى.
- ءبىز دەربەس دەرەكتەردىڭ تارالۋىن, ەسىرتكى ترافيگىمەن كۇرەس جانە مەسسەندجەردەگى باسقا دا زاڭسىز ارەكەتتەردى توقتاتۋ بويىنشا ماسەلەلەردى بىرنەشە رەت ءساتتى ءارى جەدەل شەشتىك. Telegram كومانداسى ءاردايىم ازاماتتاردىڭ قاۋىپسىزدىگىن قامتاماسىز ەتۋ ءۇشىن ىنتىماقتاستىققا دايىن, قۇپيالىلىق پەن ءسوز بوستاندىعىن قورعاۋ قاعيداتتارىنا ادال بولىپ كەلەدى. قازاقستاندا Telegram – ەڭ تانىمال مەسسەندجەر, ونى 12 ميلليوننان استام ادام پايدالانادى, بۇل ونىڭ قوعامىمىز ءۇشىن قانشالىقتى ماڭىزدى ەكەنىن كورسەتەدى, - دەيدى جاسلان ماديەۆ.
