اتالعان ەمدەۋ مەكەمەسىنىڭ باس دارىگەرى ماحامبەت بەيسەۋوۆ مەملەكەت تاراپىنان جەرگىلىكتى ەمحانالارعا كورسەتىلىپ جاتقان كومەك پەن قولداۋدىڭ ناتيجەسى تۋرالى بايانداپ بەردى.
№1 قالالىق ەمحاناعا بارعاندا ت.سۇلتانعازيەۆ, اسىرەسە ديسپانسەردە ەسەپتە تۇرعان ناۋقاستارعا كونسۋلتاتيۆتىك-دياگنوستيكالىق كومەكتىڭ قولجەتىمدىلىگى قالاي جۇزەگە اسىپ جاتقانىن بايقاپ كوردى, ماماندارعا كەزەككە تۇرۋ ماسەلەسىن تەكسەردى, ازاماتتاردىڭ ساۋال-وتىنىشتەرىنە جاۋاپ بەردى, سونداي-اق بىرىڭعاي كولل-ورتالىقتىڭ جۇمىسىمەن تانىسىپ شىقتى. بۇعان قوسا ۆيتسە-مينيستر ۆاكتسينالاۋ جۇرگىزۋگە دايىندىق, مەدپەرسونالدىڭ ەكپە تۋرالى ءبىلىمى مەن ماشىقتارىن باعالادى. يممۋنداۋعا ارنالعان دارىلەردىڭ ساقتالۋ شارتىنا ءجىتى كوز سالدى. «سالقىنداتۋ جەلىسىندەگى» تەمپەراتۋرالىق رەجىمنىڭ ساقتالۋىنا نازار اۋدارىپ, اقپاراتتىق جۇيەلەردىڭ جۇمىسىن قاراپ كوردى.
سونداي-اق ساپار اياسىندا ۆيتسە-ءمينيستردىڭ بلوگەرلەرمەن, ۇەۇ بەلسەندىلەرىمەن, ءوڭىر دارىگەرلەرىمەن كەزدەسۋى ءوتتى. سول جۇزدەسۋدە ادام پاپيللوما ۆيرۋسىنا قارسى ۆاكتسينالاۋ جۇرگىزۋ ماسەلەسى قوزعالىپ, ونىڭ ماڭىزى جونىندە جان-جاقتى اقپارات بەرىلدى.
شىمكەنت قالاسىنىڭ قاراپايىم جۇرتىمەن بولعان ەسەپتى كەزدەسۋدە ت.سۇلتانعازيەۆ ۆەدومستۆو تاراپىنان حالىققا مەديتسينالىق كومەكتى جاقسارتۋ باعىتىندا اتقارىلىپ جاتقان شارالار تۋرالى تولىق بايانداپ بەردى.
«جاڭادان اشىلعان ء«بىر كۇندىك كلينيكا» بازاسىندا ءبىرىنشى رەت ۇرىقتىڭ تۋا ءبىتتى پاتولوگياسى قاۋپىن دەر كەزىندە انىقتاۋ جانە بوسانۋ الدىنداعى دياگنوستيكانى جۇرگىزۋ مۇمكىندىگى پايدا بولدى. سونىمەن قاتار رەسپيراتورلىق اۋرۋلار, گەمودياليز, نەفرولوگيا, رەۆماتولوگيا, ورفاندىق اۋرۋلار بويىنشا قۇزىرەت ورتالىقتارىن اشۋ جونىندەگى جۇمىستار بەلسەندى تۇردە جۇرگىزىلە باستادى. مەملەكەت باسشىسى قاسىم-جومارت توقاەۆتىڭ تاپسىرماسى اياسىندا وتاندىق مەديتسينادا تۇبەگەيلى وزگەرىستەر ورىن الىپ جاتىر. ونىڭ ەڭ باستىسى – دەنساۋلىق ساقتاۋ جۇيەسىندە مەديتسينالىق كومەكتىڭ پاتسيەنتكە باعدارلانعان مودەلىن قالىپتاستىرۋ. حالىققا مەديتسينالىق كومەكتىڭ ساپاسى مەن قولجەتىمدىلىگىن جاقسارتۋ – باستى مىندەت. سونىڭ اياسىندا ۇلتتىق ستاندارتتارعا سايكەس ەمحانالىق ۇيىمدارعا قويىلاتىن تالاپتار كۇشەيتىلدى. ماسەلەن, بەيىندى ماماندارعا قولجەتىمدىلىك جەڭىلدەتىلدى, دارىگەرلەردىڭ پاتسيەنتتەرمەن ءوزارا بايلانىسى جاقساردى. پاتسيەنتكە باعدارلانۋدى قامتاماسىز ەتۋ ماقساتىندا 21 نورماتيۆتىك-قۇقىقتىق اكتى جوبالارى ازىرلەندى. سونىڭ ناتيجەسىندە پاتسيەنتتەر بەيىندى ماماندارعا بىردەن جازىلا الادى, قابىلداۋ دا جوسپارلى تۇردە جۇرگىزىلەدى. جالپى, پراكتيكا دارىگەرلەرىنە جازىلۋ 4%-دان 21%-عا دەيىن, ونىڭ ىشىندە بەيىندى ماماندارعا جانە دياگنوستيكاعا جازىلۋ 41%-دان 70% -عا دەيىن ءوستى. قاجەتتى زەرتحانالىق زەرتتەۋلەر 42-گە قىسقارىپ, جوسپارلى ەمدەۋگە جاتقىزۋعا دايىندىق كەزىندە كونسۋلتاتسيالىق-دياگنوستيكالىق قىزمەتتەردىڭ بىرىڭعاي تىزبەسى ستاندارتتالدى, سونداي-اق زەرتتەۋ ناتيجەلەرىنىڭ قولدانىلۋ مەرزىمى 14 كۇننەن 6 ايعا دەيىن ۇزارتىلدى», دەدى ءبىرىنشى ۆيتسە-مينيستر.
سالا وكىلى مەديتسينالىق ۇيىمداردا قارجىلىق جاعدايدى كۇشەيتۋ ماقساتىندا بىرنەشە كەشەندى جوسپار قولعا الىنعانىن جەتكىزدى. اتاپ ايتقاندا, شىعىنى كوپ تاريفتەر قايتا قارالىپ, اقشا جاراتۋدىڭ جاڭا جۇيەسى ەنگىزىلىپ جاتىر. قۇرساق كوتەرگەن, جاڭا تۋعان ايەلدەرگە, كىشكەنتاي بالالارعا مەديتسينالىق كومەك ارتىپ, 2024 جىلدىڭ 1 ماۋسىمىنان باستاپ تاريف قۇنى ورتا ەسەپپەن 30 پايىزعا ءوستى. نەونوتولوگيا, بالالار نەۆرولوگياسى, اللەرگولوگياسى مەن رەۆماتولوگياسى قاتارلى قىزمەت كورسەتەتىن مەديتسينالىق ۇيىم وكىلدەرىنىڭ ەڭبەكاقىسى دا ءوستى. بيىل 1 قىركۇيەگىنەن باستاپ ءابدومينالدى حيرۋرگيا, ينفەكتسيا, نەۆرولوگيا, گاستروەنتەرولوگيا, كارديولوگيا, تراۆماتولوگيا, ورتوپەديا, نەفرولوگيا, ەندوكرينولوگيا, ونكوگەماتولوگيا سەكىلدى سالاعا قارجىلىق ماسەلەنى جاقسارتۋ جۇمىستارى قولعا الىنادى. ناتيجەسىندە, جىل سوڭىنا دەيىن دەنساۋلىق ساقتاۋ ۇيىمدارىنىڭ قارجى جەتىسپەۋشىلىگى شەشىمىن تاۋىپ, تاپشىلىق تۋدىرعان ءبىراز مەديتسينالىق دۇنيەلەردى ساتىپ الۋعا مۇمكىندىك تۋادى.
ءبىرىنشى ۆيتسە-ءمينيستردىڭ مالىمدەۋىنشە, كلينيكالىق حاتتامالار اياسىندا بارلىق اۋرۋ ءتۇرى مەن ولارعا قاجەتتى ءدارى-دارمەكتەر ءتىزىمى ۇيلەستىرىلگەن. 2025 جىلعا قاراي حالىقتى امبۋلاتورلىق ءدارى-دارمەكپەن قامتاماسىز ەتۋدى جوسپارلاۋعا دايىندىق جۇمىستارى ءجۇرىپ جاتىر. شەتەلدەن كەلەتىن دارىلەردىڭ نۇسقاسىن ەلىمىزدە وتاندىق فارماتسەۆتيكا كۇشىمەن شىعارۋ قولعا الىنا باستايدى. حالىقتىڭ دەنساۋلىعىن جاقسارتۋ ءۇشىن الكوگولدى, تەمەكى ونىمدەرىنىڭ اكتسيزدىك باعاسى قىمباتتاتىلدى. بيىل ماۋسىم ايىندا ۆەيپتەر مەن وعان قاجەتتى حوش يىستەندىرگىش پەن سۇيىقتىقتاردىڭ ساۋداسى ەلىمىزدە تولىق توقتاتىلدى. ەنەرگەتيكالىق سۋسىنداردى 21 جاسقا دەيىنگى ازاماتتارعا ساتپاۋ مەن قۇرامىندا قانتى بار سۋسىندارعا اكتسيز ەنگىزۋگە ءتيىستى ۇسىنىستار ازىرلەنىپ جاتىر. مەديتسينا سالاسىنداعى باستى جاڭالىقتىڭ ءبىرى بيىل ءساۋىر ايىندا پرەزيدەنت ارنايى زاڭعا قول قويىپ, وعان اۋىلدىق جەردە سۇرانىسقا يە ماماندىقپەن جۇمىس ىستەپ جاتقان مەديتسينا قىزمەتكەرلەرىنە 8,5 ملن تەڭگە قاراجات بەرىلەدى. بۇل دەنساۋلىق ساقتاۋ سالاسىن جاقسارتۋ مەن ابىروي-بەدەلىن كوتەرۋ ماقساتىندا جۇرگىزىلىپ وتىر. سونداي-اق 2030 جىلعا قاراي ەلىمىزدەگى مەديتسينالىق كادر ماسەلەسىن تۇبەگەيلى شەشەتىن ارنايى تۇجىرىمداما ازىرلەنىپ جاتىر. ونىڭ كوزدەگەن باعىتىنىڭ ءبىرى – رەسپۋبليكادا دەنساۋلىق ساقتاۋ سالاسى ماماندارىنىڭ ءار وڭىردەگى تاپشىلىعىن جويۋ مەن مەديتسينا ماماندارىن دايارلاۋداعى ساپا ماسەلەسىن جاقسارتۋ. 2027 جىلدان باستاپ تەگىن مەديتسينالىق كومەكتىڭ كەپىلدىك بەرىلگەن كولەمىنىڭ ەڭ تومەنگى پاكەتى مەن مىندەتتى الەۋمەتتىك مەديتسينالىق ساقتاندىرۋدىڭ بازالىق پاكەتىن قامتيتىن بىرىڭعاي مەديتسينالىق كومەك پاكەتىن قالىپتاستىرۋ ۇسىنىلادى. مىنە, ەلىمىزدىڭ دەنساۋلىق ساقتاۋ مينيسترلىگىنىڭ بۇگىنگە دەيىن اتقارعان جۇمىستارى مەن كەلەشەكتەگى جوسپار, ارەكەتتەرى وسىنداي.
قالا تۇرعىندارىن جەكە قابىلداۋ كەزىندە ازاماتتار ەمحانالارداعى دارىلىك قامتاماسىز ەتۋ, سالالىق تار بەيىندى ماماندارعا قابىلداۋعا جازىلۋ, ەرەكشە قاجەتتىلىكتەرى بار ادامدارعا مەديتسينالىق قىزمەت كورسەتۋ ماسەلەسىن كوتەردى.
ساپار قورىتىندىسىندا ت.سۇلتانعازيەۆ اعىمداعى ەپيدەميالىق جاعداي تۋرالى باق وكىلدەرىنىڭ سۇراقتارىنا جاۋاپ بەردى. سونداي-اق ۆيتسە-مينيستر ءسوزىنىڭ سوڭىندا دەنساۋلىق ساقتاۋ سالاسىن جاقسارتۋ باعىتىندا كەيىنگى جىلدارى ەلىمىزدە وتە ۇلكەن اۋقىمداعى رەفورمالىق جۇمىستاردىڭ جۇرگىزىلگەنىن, وسى كۇندە سول وزگەرىستەر وڭ ناتيجە بەرە باستاعانىن اتاپ ءوتتى.
شىمكەنت
