سپورت • 24 تامىز, 2024

پاراليمپيادا الاۋى تۇتاناتىن كۇن جاقىن

100 رەت
كورسەتىلدى
3 مين
وقۋ ءۇشىن

28 تامىز بەن 8 قىركۇيەك ارا­لىعىندا فرانتسيا اس­تاناسى پاريجدە وتەتىن پاراليمپيادا ويىندارىندا ەلىمىزدىڭ 44 وكىلى ونەر كورسەتەدى. ولار سپورت­­تىڭ توعىز تۇرىنەن باق سىنايدى. جا­رىس­تىڭ اشىلۋ سالتاناتىندا مەملەكەتتىك تۋىمىزدى پاراۆولەيبولشى بەرىك ىزماعانبەتوۆ پەن پارا نىسانا كوزدەۋشى سەۆدا اليەۆا ۇستاپ شىعادى.

پاراليمپيادا الاۋى تۇتاناتىن كۇن جاقىن

سەنا جاعالاۋىندا ونەر كور­سەتەتىن وتانداستا­رىمىزدىڭ ارا­سىن­داعى ەڭ اتاقتىسى – ءزۇلفيا گابيدۋللينا. بيىل كۇزدە 59 جاس­­قا تولعالى وتىرعان ول 2016 جىلى ريو-دە-جانەيرودا بولعان پاراليمپيادادا ەركىن ءتاسىل بو­يىن­شا 100 مەترگە ءجۇزىپ, الدىنا جان سالماي, التىننان القا تاقتى. بۇل – تالاي جىلعى تاريحى بار اتالعان جارىستا قازاقستان قۇ­راماسىنىڭ قورجىنىنا تۇسكەن العاشقى باس جۇلدە. سونداي-اق گابيدۋللينا 50 مەترگە ەركىن ءجۇزۋدى ءتورتىنشى جانە شالقالاي جۇزۋدە التىنشى ورىندارعا تابان تىرەدى.

ءزۇلفيا راحاتقىزىنىڭ ودان دا باسقا تولىپ جاتقان اتاقتارى بار. جەرلەسىمىز بىرنەشە رەت گەرمانيانىڭ اشىق بىرىنشىلىگىندە توپ جارىپ, الەمدىك رەكوردتى جاڭارت­تى. 2014 جىلى ينچحونداعى پاراازيا ويىندارىندا تەڭ­دەسسىز دەپ تانىلسا, 2015 جىلى گلازگوداعى الەم چەمپيوناتىندا قوس قولاعا قول جەتكىزدى. 2017 جىلى مەكسيكادا ساتتار بەيسەمباەۆتىڭ شاكىرتى الەم چەمپيونى اتانىپ, حالىقارالىق پاراليمپيادا كوميتەتىنىڭ «دۇنيەجۇزىلىك جە­ڭىستەر سەرياسى» اتالىمى بويىنشا ارنايى سىيلىعىنا يە بولدى.

اتباسارلىق داۆيد دەگتيارەۆ 2021 جىلى توكيوداعى ويىنداردا توپ جاردى. پاۋەرليفتينگتەن 54 كگ سالماق دارەجەسىندە سىنعا تۇسكەن ول قارسىلاس شاق كەلتىرمەدى. چەم­پيوننىڭ كورسەتكىشى – 174 كگ. 29 جاستاعى سپورتشىنىڭ دا ەكى دۇركىن الەم چەمپيونى, پارا­زيادا جەڭىمپازى دەگەن اتاقتارى بار. سونداي-اق كەيىنگى ەكى پاراليمپيادادا جەڭىس تۇعىرىنا كوتەرىلگەن راۋشان قويشىباەۆا مەن نۇرداۋلەت جۇماعالي دا پاريج­گە اتتانىپ بارادى. ولاردىڭ ماقساتى – التىن الىپ, قازاق ەلىنىڭ ءانۇرانىن شىرقاتۋ. ريو-دە-جا­نەيرودا پاۋەرليفينگتىڭ قاس شەبەرى راۋشان كۇمىسپەن كۇپتەلسە, ءجۇزۋشى نۇرداۋلەت قولا مەدالدى موينىندا جارقىراتتى.

مۇمكىندىگى شەكتەۋلى جاندار اراسىنداعى ەڭ ماڭىزدى جارىستا جوعارىدا ەسىمى اتالعان ءتورت ساڭلاقتان بولەك, ءالي ماقۇل­بەكوۆ (پارا ۇستەل تەننيسى), جاڭىل بال­تاباەۆا مەن بيبارىس سپاتاي (پاراكانوە), سەۆدا اليەۆا مەن ەركىن عابباسوۆ (پارا نىسانا كوزدەۋ), سيازبەك داليەۆ پەن مۇ­راتبەكوۆ (پارا ءجۇزۋ), داستان مۇقاشبەكوۆ, جولامان ەلامان, گۇلباقىت قايىرجانوۆا, سالتانات ابىلقاسىمقىزى (پارا جەڭىل اتلەتيكا), نىشان ءومىرالي, نۇرلان دومباەۆ, كاميليا دوسمالوۆا, ميلانا كراساۆتسەۆا (پارا تاەكۆوندو), راحمەتجان حاماەۆ, تۇرسىناي قابىل, ستانيسلاۆ شاكيەۆ (پارا پاۋەرليفتينگ), بەرىك ىزماعانبەتوۆ, پەردەباي نامۇراتوۆ, نۇرتاۋ مۇ­قانبەتقاليەۆ, جانعالي سۇيەۋوۆ, باۋىرجان سارتاەۆ, قۋانىش تا­جىكوۆ, ەرلان بيتەمىروۆ, ەرىك قاسقاباەۆ, شىڭعىس مەدەۋوۆ, ەربولات التاەۆ, اقىلبەك شي­كىباەۆ, ەراسىل ابدىبەك (ۆولەيبولدى وتىرىپ ويناۋ), باۋىرجان ارىستانبەكوۆ, اقمارال ناۋاتبەك, زارينا رايفوۆا, عالىمجان سما­عۇل ۇلى, ەرلان وتەپوۆ, دايانا فەدوسوۆا, ەرعالي شامەي, جۇر­قامىرزا شۇكىربەكوۆ, ايالا مەرەكە جانە ءالفيا تلەككابىل (پارادزيۋدو) سىندى سپورتشىلار شەبەرلىك بايقاسادى.

سوڭعى جاڭالىقتار