«ەڭبەكشىقازاق اۋدانىنىڭ تۇرعىن ءۇي-كوممۋنالدىق شارۋاشىلىعى جانە تۇرعىن ءۇي ينسپەكتسياسى ءبولىمى» مم تاپسىرىسىمەن جۇزەگە اسىپ جاتقان جوبانىڭ قۇنى – 5 187 746 تەڭگەنى قۇرايدى. بۇل جۇمىستاردى تياناقتى اتقارۋدى مەردىگەر مەكەمە – «اي-سۋ مەليوراتسيا» جشس ءوز مىندەتىنە العان.
قازىرگى ۋاقىتتا 9 كوشەدە 20 ارنايى تەحنيكا, 55 ادام تىڭعىلىقتى جۇمىس ىستەپ جاتىر. ناتيجەسىندە, ۇزىندىعى 130,4 شاقىرىم ورتالىقتاندىرىلعان جانە ابونەنتتىك قۇبىرلار تارتىلىپ, 48,3 پايىزعا قۇرىلىس-مونتاج جۇمىستارى جۇرگىزىلگەنى تۋرالى شەلەك اۋىلدىق وكرۋگىنىڭ اكىمى ايداربەك داۋتقۇلوۆ حاباردار ەتتى.
شەلەك اۋىلىندا ۇزىندىعى 32 شاقىرىم بولاتىن ورتالىقتاندىرىلعان كارىز جەلىلەرىن قايتا جاڭعىرتۋ جانە سالۋ جۇمىستارىمەن «ەلامان» جشس اينالىسادى. باستالعانىنا ون جىلعا جۋىقتاعان جوباعا 2019 جىلى تۇزەتۋلەر ەنگىزىلىپ, مەملەكەتتىك ساراپتاما قورىتىندىسى شىعارىلعان.
بۇگىندە بيولوگيالىق تازالاۋ ستانساسىنىڭ قۇرىلعىلارى ورناتىلىپ جاتىر. تازالاۋ ستانساسىنا 2 تارماقتى ەلەكتر جەلىسى تارتىلعان. بىلتىر اۋىل ىشىندە تارتىلاتىن 22 شاقىرىم كارىز جۇيەسىنىڭ (قايىپوۆ, جىبەك جولى, سىزدىقوۆ, روزىباكيەۆ, تايروۆ جانە قابىلوۆ كوشەلەرىمەن) 10 شاقىرىمى عانا قازىلىپ سالىنعان. اتالعان كوشەلەرگە 179 قۇدىق ورناتىلعان.
سونداي-اق شەلەك اۋىلىن كوگىلدىر وتىنمەن قامتاماسىز ەتۋدە ىلگەرىلەۋ بار. جەتى جىل بۇرىن باستالعان گاز تارتۋ جۇمىسىن «Apl construction» جشس جۇرگىزەدى. اۋىلدى تولىقتاي قامتاماسىز ەتۋ ءۇشىن 10 گاز تاراتقىش سالىنۋعا ءتيىس. سونىڭ سەگىزى ورنالاستىرىلىپ, تاعى ءبىر گاز تاراتقىشتىڭ قۇرىلىسى ءجۇرىپ جاتىر. گازداندىرۋ جۇمىستارى 2026 جىلى تولىعىمەن اياقتالادى.
الماتى وبلىسى
