كومپانيا مىڭ جارىم ادامدى جۇمىسپەن قامتىپ وتىر. ونىڭ 598-ءى سەمەيدە ەڭبەك ەتەدى. بۇعان قوسا قالدىقتاردى قايتا وڭدەۋ كەشەنىندە 150 جۇمىس ورنىن قۇرۋ جوسپارلانعان. مەكەمە باسشىلىعىنىڭ مالىمەتىنشە, «ەيكوس» جشس قىزمەتكەرلەرىنىڭ ورتاشا جالاقىسى وسى جىلدىڭ ءبىرىنشى توقسانىندا 359 446 تەڭگە بولدى. كومپانيا ساتىلاتىن ءونىم كولەمى بويىنشا ەلىمىزدە كوشباسشى ورىنعا كوتەرىلدى. وتكەن جىلى كاسىپورىن 1,5 ملن-نان استام دوڭگەلەك ساتىپ, وتاندىق نارىقتى قامتۋ كورسەتكىشىن شامامەن 20%-عا جوعارىلاتتى.
قىزمەتكەرلەرىنىڭ الەۋمەتتىك جاعدايىن جاقسارتۋعا, بوس ۋاقىتتارىن ءتيىمدى وتكىزۋگە جاعداي جاساعان. تاۋارلاردى ءتۇسىرۋ-تيەۋ جۇمىستارىمەن اينالىساتىن قىزمەتكەرلەردى تەگىن تاماقپەن قامتاماسىز ەتەدى. سونىمەن قاتار مۇندا ەڭبەككەرلەردىڭ سپورتپەن شۇعىلدانۋىنا جاعداي جاساۋ دا قاراستىرىلعان. بۇعان قوسا جۇمىسشىلاردىڭ جان-جاقتى مەديتسينالىق قىزمەت الۋى ءۇشىن ارنايى كلينيكامەن دە كەلىسىم جاسالعان.
قازىر ەلىمىز بويىنشا ءىرى كاسىپورىندار الەۋمەتتىك از قامتىلعان وتباسىلارعا كومەك قولىن سوزىپ ءجۇر. ارىپتەستەرى اراسىندا بيىك بەدەلگە يە بولعان «ەيكوس» كومپانياسى 2021 جىلدان باستاپ قىزمەتكەرلەرگە, ەكىنشى دۇنيەجۇزىلىك سوعىس ارداگەرلەرىنە, جالعىزباستى زەينەتكەرلەر مەن انالارعا, از قامتىلعان جانە كوپبالالى وتباسىلارعا ماتەريالدىق كومەك كورسەتىپ, شامامەن 200 ملن تەڭگەگە قايىرىمدىلىق جانە دەمەۋشىلىك جاسادى.
قازىرگى ۋاقىتتا كومپانيا ءونىم كولەمى بويىنشا ەلىمىزدە جەتەكشى ورىنعا يە. سونىمەن قاتار كاسىپورىن ۇزدىك 50 ءىرى جەكە سالىق تولەۋشى قاتارىنا كىرەدى. 2023 جىلى شامامەن 1,5 ملن شينا ساتىلىپ, بيۋدجەتكە 9,5 ملرد تەڭگەدەن استام قارجى تۇسكەن.
الداعى ۋاقىتتا قولدانىستاعى كاسىپورىن بازاسىندا دايىن ءونىم شىعاراتىن اۆتوكولىكتەردى, قولدانۋ كەزىندە پايدا بولاتىن قالدىقتاردى قايتا وڭدەۋ كەشەنىن سالۋ جوسپارلانىپ وتىر. قالدىقتاردى قايتادان وڭدەۋ بارىسىندا قاۋىپسىز جابىندار, تەرموپلاستيكا, سىم جانە تاعى باسقا تۇرمىسقا پايدالى جابىدىقتاردى الۋعا مۇمكىندىك تۋادى. وسى ماقسات ىسكە اسقان جاعدايدا كاسىپورىننىڭ ونىمدىلىگى تاۋلىگىنە 50 تونناعا دەيىن ءوسۋى ىقتيمال. ونىڭ ىشىندە تاۋلىگىنە 10 توننا شينانى تەرميالىق وڭدەۋگە جانە 40 تونناسىن مەحانيكالىق وڭدەۋگە جىبەرۋدى ويلاستىرىپ جاتىر.
«تەرميالىق وڭدەۋ ناتيجەسىندە دايىن ءونىم باسقا وندىرىستىك ۇدەرىستەر ءۇشىن شيكىزات بولا الاتىن وتىن, تەحنيكالىق كومىرتەگى جانە جوعارى لەگيرلەنگەن بولاتتان تۇرادى. مەحانيكالىق جاعدايدا – اۆتوشينالار, جۇگىرۋ جولدارى مەن ويىن الاڭدارىنا ارنالعان جابىندار جاساۋعا جارامدى 4 فراكتسيادان تۇراتىن ۇگىندىلەر شىعارىلادى. جوبانىڭ جالپى قۇنى 2,5 ملرد تەڭگە دەپ كوزدەپ وتىرمىز», دەيدى كاسىپورىن ماماندارى.
جاقىندا عانا سەمەيگە كەلگەن ساپارىندا ۇكىمەت باسشىسى ولجاس بەكتەنوۆ اتالعان كاسىپورىن قىزمەتكەرلەرىمەن كەزدەسىپ, ەل بويىنشا 10 كومپانيا قالدىقتاردى جيناۋ جانە قايتا وڭدەۋدىڭ وزىندىك جۇيەسىن پايدالاناتىنىن ايتقان ەدى. سونىمەن بىرگە ولاردىڭ باسىم بولىگى شينالاردى يمپورتتايتىن جانە قايتا وڭدەيتىن كاسىپورىندار ەكەنىن دە اتاپ وتكەن. ۇكىمەت باسشىسى بۇل باستامانى قولدايتىنىن ايتىپ, ەكولوگيا جانە تابيعي رەسۋرستار مينيسترلىگىنە مۇددەلى ۇيىمدارمەن بىرلەسىپ, اتالعان ماسەلەنى جان-جاقتى قاراستىرۋدى تاپسىرعان بولاتىن.
ۇكىمەت باسشىسىنىڭ قولداۋىنان قۋات العان «ەيكوس» رەزەڭكە تەحنيكالىق بۇيىمدار شىعارۋ جانە قايتا وڭدەۋ كاسىپورنىنىڭ قىزمەتكەرلەرى ءوز جۇمىستارىن قارقىندى اتقارىپ جاتىر.
اباي وبلىسى
