سۋرەتتە: شارقۇدىق شاتقالىنداعى جاڭا مودۋل
كەگەن اۋدانىنىڭ مىڭجىلقى ەلدى مەكەنىندەگى تەڭىز دەڭگەيىنەن ەكى مىڭنان استام مەتر بيىكتىكتەگى شارقۇدىق شاتقالىندا وتكەن راسىمگە دەپارتامەنت باسشىسى, پولكوۆنيك الىبەك كايۋپوۆ, اۋدان اكىمىنىڭ ورىنباسارى كەڭەس قابىلبەكوۆ قاتىسىپ, زاماناۋي ءمودۋلدىڭ لەنتاسىن قيدى.
«شەكارانى نىعايتۋعا ارنالعان جول كارتاسى – 2024» باعدارلاماسى اياسىندا شەكاراشىلارعا پايدالانۋعا بەرىلگەن مودۋلدە بارلىعى قاراستىرىلعان. جەكە قۇرامنىڭ جاتىن جايى, جۋىنۋعا ارنالعان ورىن, اس دايىنداپ, تاماقتاناتىن بولمەگە دەيىن بار. سونداي-اق اپتاپ ىستىقتان قورعانۋ ءۇشىن بولمەلەر سالقىنداتقىشپەن قامتاماسىز ەتىلگەن. وسىعان دەيىن بارلاۋ-ءىز كەسۋ توپتارى وزدەرىنىڭ ەل شەبىندەگى اپتاعا سوزىلاتىن قىزمەتتەرىن دالالىق شاتىرلاردا وتكىزەتىن. ال تاۋلى ءوڭىردىڭ اۋا رايى قۇبىلمالى, جاۋىن-شاشىن كوپ بولاتىنى بەلگىلى. سوندىقتان شەكاراشىلارعا قولدارىنان كەلگەن كومەكتەرىن ايامايتىن جەرگىلىكتى اكىمدىك مۇنداي زاماناۋي مودۋلدەردىڭ سانىن الداعى ۋاقىتتا دا كوبەيتۋدى جوسپارلاپ وتىر.
بۇدان بولەك, ەل شەبىندە تۇرعان شەكارا بولىمشەلەرىنىڭ عيماراتتارىن جاڭارتۋ, وفيتسەرلەرگە ارناپ, قىزمەتتىك پاتەرلەر سالۋ دا جول كارتاسى اياسىنداعى اۋقىمدى جوسپارلاردىڭ قاتارىنا كىرەدى.
ەلىمىزدىڭ انۇرانىمەن اشىلعان ءىس-شارانىڭ العاشقى ءسوز تىزگىنى دەپارتامەنت باسشىسى, پولكوۆنيك ءا.كايۋپوۆقا بەرىلدى.
«مودۋلدىك كەشەن شەكاراشىلاردىڭ كوكتەم ايىنان باستالىپ, كۇز اياقتالعانعا دەيىن سوزىلاتىن قىزمەتتەرىنە ارنالعان. بۇل باستاما, الداعى ۋاقىتتا دەپارتامەنتتىڭ بارلىق اۋماعىندا وسىنداي شەكارالىق بەكەتتەر ىسكە قوسىلادى», دەگەن الىبەك امانگەلدى ۇلى وسىنداي مۇمكىندىكتى ءبىرىنشى بولىپ يەلەنگەن «امانجول» شەكارا بولىمشەسىنىڭ بارلاۋ-ءىز كەسۋ توبىن شەكاراشى كۇنى مەرەكەسىمەن قۇتتىقتاپ, قىزمەتتەرىنە قىراعىلىق پەن تابىس تىلەدى.
وسىدان كەيىن دەپارتامەنت باسشىسى باستاعان قوناقتار زاماناۋي ۇلگىدەگى جاڭا شەكارا بەكەتىنىڭ ءىشىن ارالاپ كوردى.
ايتا كەتەرلىگى, جىل باسىنان بەرى ۇقك شەكارا قىزمەتى الماتى وبلىسى بويىنشا دەپارتامەنتىنىڭ ۋچاسكەسىندە شەكارا شەبىندە قۇقىق بۇزعان 300-گە تارتا ادام ۇستالعان. ولاردىڭ ىشىندە مەملەكەتتىك شەكارانى نەمەسە شەكارا رەجىمىن بۇزۋشىلار, باقىلاۋ-وتكىزۋ بەكەتتەرىنىڭ رەجىمىن بۇزۋشىلار كوپ كەزدەسەدى.
قازىرگى تاڭدا قازاق-قىرعىز شەكاراسى بويىنشا مەملەكەتتىك شەكارانى بۇزعان 8 پاكىستاندىق ازاماتقا قاتىستى تەرگەپ-تەكسەرۋ ءىس-شارالارى ءوتىپ جاتىر. شەكارا ايماعىنا كەلۋ ءتارتىبىن بۇزعان 250-دەن استام ازامات اكىمشىلىك جازاعا تارتىلىپ, ايىپپۇل ارقالادى.
الماتى وبلىسى
