قوس ديپلومدى شىعىستانۋشى
قازىر ەكى نەمەسە ءۇش جوعارى وقۋ ورنىن ءبىتىرىپ, ديپلوم الۋ ونشا تاڭسىق ەمەس. ال سوناۋ XVIII عاسىردا بۇگىنگىدەي سامساعان وقۋ ورداسى جوق قازاق دالاسىنان, 1890 جىلى رەسەيدەگى تومسك ۋنيۆەرسيتەتىنىڭ مەديتسينا فاكۋلتەتىنە وقۋعا ءتۇسىپ, ءبىر جىلدان كەيىن يمپەراتورلىق سانكت-پەتەربۋرگ ۋنيۆەرسيتەتىنىڭ شىعىستانۋ فاكۋلتەتىنە اۋىسىپ, ونى 1895 جىلى بىتىرگەننەن كەيىن 1897 جىلى اتالعان وقۋ ورنىنىڭ زاڭ فاكۋلتەتىن ءتامامداپ, ەكى جوعارى ءبىلىم العان تۇڭعىش قازاق – دىنمۇحامەد سۇلتانعازين. اراب, پارسى, تۇرىك, تاتار, ورىس, فرانتسۋز تىلدەرىن ەركىن مەڭگەرگەن ءبىلىمدى ازامات «دالا ۋالاياتىنىڭ گازەتى» باسىلىمىندا رەداكتور جانە اۋدارماشى بولىپ قىزمەت ىستەگەن. 1910 جىلدان ءومىرىنىڭ سوڭىنا دەيىن باكۋدە ءدىني ورتالىقتا شىعىس تىلدەرىنەن ساباق بەرگەن.
العاشقى ساياحاتشى
ءبىز ءالىبي جانگەلديندى رەۆوليۋتسيونەر رەتىندە بىلەمىز. ال ونىڭ قازاقتان شىققان العاشقى جيھانكەز ەكەنىنەن حابارىمىز از.
ول وتكەن عاسىردىڭ باسىندا «نيكولاي ستەپانوۆ» دەگەن بۇركەنشىك ەسىممەن ەۋروپا, تاياۋ شىعىس, افريكا جانە ازيا ەلدەرىنە جاياۋ ساياحات جاساعان. ونىڭ بۇل ساياحاتى ءتورت جىلدان اسا ۋاقىتقا سوزىلادى. ول تەڭىز جانە تەمىرجولدى ەسەپتەمەگەندە, فوتواپپاراتىن ارقالاپ, 12 مىڭ شاقىرىم جاياۋ جۇرگەن. ماسەلەن, جاياۋ-جالپىلاپ پولشا, سەربيا, بولگاريا, تۇركيا, سيريا, پالەستينا, افريكا, مىسىر جانە ابيسسينيانى باسىپ ءوتىپ, كەرى ورالعان جولىندا اراب تۇبەگى, مەسسوپاتاميا, پەرسيا, ءۇندىستان, تسەيلون, مالاي ارالدارى, وڭتۇستىك قىتايدا بولىپ, فورموزا ارالى ارقىلى 1912 جىلى جاپونياعا جەتكەن. سونداي-اق كۇندىز جۇرگەن جەرلەرىن سۋرەتكە ءتۇسىرىپ, تۇندە ونى شىعارىپ وتىرعان.
تۇڭعىش ديپلومات ايەل
ول كىم دەسەڭىز, زامانىندا قازاق كسر-ءنىڭ الەۋمەتتىك قورعاۋ ءمينيسترى, قازاق كسر مينيسترلەر كەڭەسى توراعاسىنىڭ ورىنباسارى, ودان كەيىن قازاق ايەلدەرى اراسىنان العاشقى سىرتقى ىستەر ءمينيسترى بولعان – بالجان بولتىرىكوۆا.
بىلىكتى ديپلومات بۇۇ باس اسسامبلەياسىنىڭ XXI جانە XXV سەسسيالارىنا كەڭەس وداعىنىڭ رەسمي دەلەگاتسياسىن باستاپ بارىپ, ەل اتىنان بۇۇ مىنبەرىندە ءسوز سويلەگەن. اسىرەسە ونىڭ اقش-تىڭ بۇۇ جانىنداعى ادام قۇقىقتارى جونىندەگى وداق قۇرىپ, ءوز ساياساتىن جۇزەگە اسىرماق بولعان تۇستاعى بۇل يدەيانىڭ وداق مۇددەسىنە قايشى ەكەنىن دالەلدەگەن ەرلىگىنە الەم ديپلوماتتارى ءتانتى بولعان.
