ون بەستەن استام الەمدىك ماراپاتقا يە بولىپ, تاجىريبەلى سىنشىلاردىڭ باعاسىن العان تۋىندىنى مادەنيەت جانە اقپارات مينيسترلىگىنىڭ, ۇلتتىق كينو ورتالىعىنىڭ قولداۋىمەن «Golden Man Media» كومپانياسى جارىققا شىعارعان.
اق پەن قاراسى قاتار ورىلگەن ومىردە ءتۇرلى تاعدىر بار. كينونىڭ اتى ايتىپ تۇرعانداي, مۇندا دا تاعدىردىڭ تالكەگىنە ۇشىراعان قانى ءبىر باۋىرلاردىڭ ءومىرى سۋرەتتەلەدى. جان جۇرەگىڭدى شىمىرلاتاتىن كارتينا وزگەرمەيتىن تۋىستىق, باۋىرلىق, وتباسىلىق كوزقاراستى, جوعالعان مەيىرىمدى ىزدەيدى. جاۋاپسىز اتا-انانىڭ كىناسىنەن قاتال تاعدىر ءار جاعاعا لاقتىرعان جاسوسپىرىمدەردىڭ «باۋىرىم, قانىم» دەگەن قاجىر-قايراتى تاڭعالدىرادى. جان-جاققا تارىداي شاشىلعان وتباسى... اكەسىن ىزدەگەن بالا... جارىمجان جۇرەك...ءۇمىت جولىندا اداسقان تاعدىر...جاسالعان قىلمىس. جاس رەجيسسەردىڭ دەبيۋتتىك كارتيناسى قوعامداعى وسىنداي شيىرلانعان شىتىرمان وقيعالاردى سۋرەتتەيدى.
ءيا, جاڭا تۋىندىدا بالالار ۇيىنەن شىققان ءجاسوسپىرىمنىڭ باسىنان كەشكەن قيىندىقتارى باياندالادى. كۇتپەگەن جەردەن تۋعان باۋىرىن تاپقانداعى قۋانىشى اسەرلى بەينەلەنگەن. بۇل كەزدەسۋ اعايىندىلاردىڭ بىرىگىپ, اكەسىن ىزدەۋىمەن جالعاسادى. قولىندا – ءبىر سۋرەت پەن اكەسىنىڭ اتى-ءجونى عانا. جولدا – شىم-شىتىرىق وقيعا, تالايلى جول. ەكى باۋىردىڭ ىزدەگەنى – مەيىرىم, ولار دا جاقسىلىقتان, جاقسى ومىردەن ءۇمىت كۇتتى. وسى ءبىر ءۇمىت, كوزدەرىندەگى جارىق قيا جولدان وتكىزدى. قولدارىن دا بىلعاتتى. شەكارانى جاياۋ اسىپ جەتتى. الايدا جاقسى ومىرگە جەتەكتەگەن ءۇمىت ءبىر-اق ساتتە كەك پەن قىلمىسقا اينالدى.
فيلم رەجيسسەرى تۋىندى ارقىلى باۋىرلىق سەزىمدى كورسەتكىسى كەلگەنىن ايتادى.
«مەن ءۇشىن كينو – اينا. ول اينادان ءوزىمىزدى, قوعامدى كورە الامىز. بۇل كينونىڭ نەگىزگى يدەياسى – باۋىرلىق بايلانىس. اعايىندىلار ءبىر-ءبىرى ءۇشىن قانداي ىستەرگە, قانداي تاۋەكەلگە بارا الاتىنىن كورسەتكىم كەلدى. سونداي ىستىق, سونداي بەكەم, سونداي بيىك باۋىرلىق سەزىمدى ەكرانداۋ بۇرىننان ويىمدا ءجۇردى. ءساتى دە ءتۇستى», دەيدى رەجيسسەر.
سونداي-اق ول الداعى جوسپارىن دا اتاپ ءوتتى.
«اعايىندىلار» پاندەمياعا بايلانىستى ىركىلىپ قالدى. كەيىن فەستيۆالدەرگە ۇسىنىلدى. ودان بەرى ەكى فيلم ءتۇسىردىم. «جازا» – ومىردە بولعان وقيعانىڭ جەلىسىندە ءتۇسىرىلدى. تاقىرىبى – جەمقورلىق, پاراقورلىق. بۇدان بولەك «شەكەر» سەريالىنىڭ تولىقمەتراجدى نۇسقاسىن جاسادىم», دەدى ول.
«مەن ءۇشىن كوپشىلىكتىڭ بەرگەن باعاسى ماڭىزدى. ويتكەنى كينونى, ەڭ الدىمەن قازاق كورەرمەنى ءۇشىن تۇسىرەمىن. ال فەستيۆال قوسىمشا ماراپات, قولداۋ دەۋگە بولادى. وسى كينودا باستى ءرولدى سومداعان ەكى اكتەرىمىز «ۇزدىك دەبيۋت» اتالىمى بويىنشا «ازيا وسكارىن» جەڭىپ الدى. كاستينگكە كەلگەندە ەكى جىگىت تە ستۋدەنت ەدى. بۇعان دەيىن كينوعا تۇسپەگەن. سوعان قاراماستان, باستى ءرولدى سەنىپ تاپسىردىم. كورىپ تۇرعاندارىڭىزداي, ءۇمىتىمدى اقتادى», دەيدى دارحان تولەگەنوۆ.
كينوكارتينادا دۋلىعا اقمولدا, الىشەر يسمايلوۆ, ايبار سالى, ازات ءجۇمادىل, جانەل ماقاجان باسقا دا اكتەرلەر وينايدى. ءتۇسىرىلىم جۇمىستارى اقتاۋ قالاسىندا وتكەن. وعان باس-اياعى ەكى اي ۋاقىت كەتكەن.
سونداي-اق تۇساۋكەسەر بارىسىندا ءسوز العان «ۇلتتىق كينونى قولداۋ مەملەكەتتىك ورتالىعى» اق باسقارما توراعاسىنىڭ كەڭەسشىسى زارينا بايانوۆا الداعى جارىققا شىعاتىن تۋىندىلار تۋرالى ايتتى.
«وتاندىق كينەماتوگرافيانى دامىتۋ كەرەك. كورەرمەن كومەديا جانرىنداعى تۋىندىلاردى عانا ەمەس, اۆتورلىق كينونى دا جوعارى باعالايدى. بارلىق جاستاعى كورەرمەندى وتاندىق ساپالى تۋىندىمەن قامتۋ ماڭىزدى. سوندىقتان جىل سوڭىنا دەيىن تاعى بىرنەشە كينونى جارىققا شىعارامىز. جالپى, 18 جوبا بويىنشا جۇمىس ءجۇرىپ جاتىر», دەدى ول.
ايتا كەتەيىك, فيلم 22 تامىزدان باستاپ ەلىمىزدىڭ بارلىق كينوتەاترىندا كورسەتىلەدى.
