تاعى 300 اۆتوبۋس ساتىپ الىنادى
كاسىپورىن باسشىسى – باسقارما توراعاسى ماديار تۇقپاتوۆتىڭ ايتۋىنشا, وتكەن جىلعا قاراعاندا قوعامدىق كولىك جولاۋشىلارىنىڭ سانى ارتتى.
«كەلەسى جىلى تاعى 300 اۆتوبۋس الۋ جوسپاردا بار. ەلوردادا بيلەت باعاسى 2012 جىلى 90 تەڭگە بولىپ بەلگىلەندى, سودان بەرى وزگەرگەن جوق. وسى ۋاقىت ىشىندە جانار-جاعارماي قۇنى ءوستى, ول كەزدە ءليترى 110 تەڭگە بولسا, قازىر ديزەل باعاسى – 300 تەڭگە. اۆتوبۋستار ارالىعىن جيىلەتتىك. بۇرىن جولاۋشىلار كەي اۆتوبۋستاردى 20-25 مينۋت كۇتسە, قازىر ارالىق 12-15 مينۋتقا دەيىن قىسقاردى. كەلەسى جىلى 300 اۆتوبۋسپەن تولىقساق, 8-7 مينۋتقا دەيىن قىسقارتۋعا مۇمكىندىگىمىز بار», دەيدى ول.
اۆتوبۋس پاركى قىزمەت كورسەتەتىن مارشرۋتتاردىڭ جالپى ۇزىندىعى – 3 590,5 شاقىرىم. پارك 76 مارشرۋتقا قاتىنايدى, ونىڭ ىشىندە 47-ءسى – قالالىق, 3-ەۋى – تۇنگى, 27-ءسى – قالا ماڭى باعىتتارى. پاركتە جالپى سانى 2 000-نان اسا ادام جۇمىس ىستەسە, سونىڭ 70%-ى – اۆتوبۋس جۇرگىزۋشىلەرى.
1974 جىلى قۇرىلعان №1 اۆتوبۋس پاركىنىڭ عيماراتى ەسكى بولعانمەن, تازا, جايلى ورىن ەكەن. ءا دەگەننەن تەمىردەي ءتارتىپ رايى بايقالدى. جۇرگىزۋشى جۇمىسقا قابىلدانباس بۇرىن جولداعى قاۋىپسىزدىك, ءتۇرلى جاعدايداعى وقيعالارعا پسيحولوگيالىق دايىندىق سياقتى دارىستەر وقىلادى. قاۋىپسىزدىك ءبولىمىنىڭ ينجەنەرى ەرجان امانگەلدى ۇلىنىڭ ايتۋىنشا, كولىك جۇرگىزۋشىسىنىڭ D ساناتى بولۋى مىندەتتى. جۇرگىزۋشى كۋالىگىن العاننان كەيىن بىلىكتىلىكتى ارتتىرۋعا قاتىستى ارنايى وقۋ وقىپ, ەمتيحان تاپسىرادى. بۇدان سوڭ بولاشاق قىزمەتكەر اۆتوبۋس پاركىندە تاعىلىمدامادان وتەدى. تاعىلىمداما 3 كەزەڭنەن تۇرادى – 24 ساعات, 42 ساعات, 86 ساعات. بۇل ۋاقىتتا ولاردىڭ تەوريالىق جانە پراكتيكالىق ءبىلىمى تەكسەرىلەدى. جۇرگىزۋشىلەر اۆتوبۋس پاركىنىڭ جاتتىعىپ ۇيرەنۋگە ارنالعان اۆتوبۋستارىنا وتىرىپ, اۆتوبۋس جۇرگىزۋگە داعدىلانادى. ينجەنەردىڭ ايتۋىنشا, جاتتىعۋعا ارنالعان اۆتوبۋستار قالا بويىنشا تەك وسى اۆتوبۋس پاركىندە بار.
اۆتوبۋس جۇرگىزۋشىسىنىڭ ءبىر كۇنى
جۇرگىزۋشىلەردىڭ جۇمىس كۇنى تاڭمەن تالاسا باستالادى. ساعات 04:00-دە ديسپەتچەرلىك قىزمەت بولىمىنە بارىپ, مارشرۋتتار كورسەتىلگەن جول ءجۇرۋ پاراعىن الىپ, ءارى قاراي مەديتسينالىق تەكسەرىستەن وتەدى. كۇندەلىكتى قان قىسىمى مەن الكوگولدىك كۇيى دۇرىس بولسا جۇمىسقا بىردەن كىرىسەدى. مەدتەكسەرىستەن وتپەي قالعان قىزمەتكەرلەر مىندەتتى تۇردە باسقا جۇرگىزۋشىمەن الماستىرىلادى.
«جۇرگىزۋشىلەردىڭ ورتاشا جاسى – شامامەن 40-43 جاس. 7 ايەل جۇرگىزۋشى بار. ءبىر اۆتوبۋسقا 2 جۇرگىزۋشىدەن بەكىتىلەدى. ءبىر اۋىسىم 14 ساعاتقا سوزىلادى. ەڭ العاشقى اۆتوبۋس تاڭعى ساعات 5:30-دا جولعا شىعادى», دەدى №1 اۆتوبۋس پاركى باسشىسىنىڭ ورىنباسارى ءسابيت بولاتوۆ.
ونىڭ ايتۋىنشا, قازىر اۆتوبۋس پاركىنە 100-گە جۋىق جۇرگىزۋشى جەتىسپەيدى. جۇرگىزۋشىلەر 23 جاستان باستاپ قابىلدانادى. جۇرگىزۋشى ءوتىلى 3 جىلدان كەم بولماۋعا ءتيىس. سوڭعى كەزدە جالاقى دا كوتەرىلگەن. قازىر ەڭ تومەنگى جالاقى – 680-700 مىڭ تەڭگە ارالىعىندا. جوعارىسى ميلليون تەڭگەدەن اسادى.
سونداي-اق 3-5 جىل جۇمىس ءوتىلى بار قىزمەتكەرلەردى ەمدىك-ساۋىقتىرۋ ورىندارىنا جىبەرۋ ماسەلەسى قاراستىرىلعان. قيىن جاعدايدا قالعان قىزمەتكەرلەرگە كاسىپوداق ەسەبىنەن جاردەماقى بەرىلەدى. جۇمىستان تىس ۋاقىتتا جۇرگىزۋشىلەر فۋتبول, ۆولەيبول الاڭدارىنا بارىپ تەگىن جاتتىعادى. اۆتوبۋس پاركىنىڭ كاسىپوداق ۇيىمىن كاسىپ جولىن كوندۋكتورلىقتان باستاپ ءار جىلدارى ءتۇرلى قىزمەت اتقارعان ۆالەري يساكوۆ باسقارادى.
وندىرىستىك نىساندارعا شولۋ
باس ينجەنەر باۋىرجان تۇياق ۇلىنىڭ ايتۋىنشا, جوندەۋ جۇمىسىن جۇرگىزەتىن اۋماق تاۋلىك بويى جۇمىس ىستەيدى. مۇندا 150-گە جۋىق مامان بار. تۇنگى اۋىسىمدا ماماندار شامامەن 30-50 اۆتوبۋسقا جوندەۋ جۇمىسىن جۇرگىزەدى. ءسويتىپ, اۆتوبۋستار تاڭدا جولاۋشىلاردى دىتتەگەن جەرىنە جەتكىزۋگە قايتا شىعادى. مۇنداعى قىزمەتكەرلەر جوندەۋ جۇمىسىنىڭ بارلىق تۇرىنە ماشىقتانعان. سىرتتان مامان شاقىرتقان كەزى جوق. اۆتوبۋس پاركىندەگى ەڭ ەسكى اۆتوبۋس – 2017 جىلعى كولىك.
تەحنيكالىق جوندەۋ جۇمىستارىنان ۋاقتىلى وتەتىن كولىكتەر ۇزاق قىزمەت ەتىپ, جاڭا كولىكتەردەن ەش قالىسپايتىن كورىنەدى. «Yutong» ماركالى جاڭا اۆتوبۋستار قىتايدان اكەلىنىپ, قاراعاندىداعى زاۋىتتا جينالادى. سوڭعى الىنعان ءبىر اۆتوبۋستىڭ قۇنى – 91,5 ملن تەڭگە. ول جارتىلاي جەرگىلىكتى اتقارۋشى ورگاندار ەسەبىنەن, جارتىلاي اۆتوبۋس پاركىنىڭ سۋبسيدياسى ەسەبىنەن تولەنەدى. وسىلايشا, اۆتوپارك جىل سايىن ليزينگ ارقىلى اۆتوبۋستارىن جاڭارتىپ وتىرادى.
پاركتىڭ ەكولوگيالىق باستامالارى دا كوڭىلگە قونىمدى. اۆتوبۋستى جۋعا كەتكەن سۋ قايتا وڭدەلىپ, ۇلكەن رەزەرۆۋارعا جينالىپ, فيلتر ارقىلى تازارتىلىپ, قايتا قولدانىلادى. بۇل باستاما ەكولوگيالىق جاعىنان عانا ەمەس, ەكونوميكالىق جاعىنان دا ءتيىمدى. ەگەر ءار قولدانىلعان سۋ تەكتەن-تەككە كەتە بەرسە ۇلكەن شىعىن اكەلەر ەدى.
«كۇن سايىن 350 كولىك جۋىلادى. ءار اۆتوبۋستى جۋعا 5-10 مينۋت, شامامەن 100 ليتر سۋ كەتەدى», دەدى ب.تۇياق ۇلى.
قورشاعان ورتانى لاستاۋدىڭ الدىن الۋ جانە كومىرقىشقىل گازىنىڭ شىعارىندىلارىن ازايتۋ ماقساتىندا 2025 جىلى 200 بىرلىك گاز اۆتوبۋسى مەن 100 بىرلىك ەلەكتر اۆتوبۋسىن ساتىپ الۋ جوسپارلانىپ وتىر. بيىل 50 جىلدىق مەرەيتويىن اتاپ وتەتىن پارك جۇمىس ونىمدىلىگىن ارتتىرۋ ماقساتىندا پارك قىزمەتىن تسيفرلاندىرعىسى كەلەدى.
«تسيفرلى اۆتوبۋس پاركى جۇيەسىن ەنگىزۋ رەسۋرستاردى باسقارۋدى جاقسارتۋعا, ۋاقىت شىعىندارىن قىسقارتۋعا جانە جولاۋشىلارعا قىزمەت كورسەتۋ دەڭگەيىن ارتتىرۋعا مۇمكىندىك بەرەدى», دەدى باسقارما توراعاسىنىڭ ورىنباسارى ب.مولداحالىقوۆ.
8-13 قىركۇيەك ارالىعىندا استانادا V دۇنيەجۇزىلىك كوشپەلىلەر ويىندارى وتەتىنى بەلگىلى. جارىسقا 90 ەل قاتىسۋعا نيەت بىلدىرگەن. ەكى مىڭنان اسا سپورتشى كەلمەك. وسى رەتتە №1 اۆتوبۋس پاركىنىڭ باسشىسى ارنايى «Shuttle bus»-تار قاتىنايتىنىن ءمالىم ەتتى.
