باتاۆيا, فريزە, بازيليك سياقتى اسكوكتىڭ 30-دان استام ءتۇرىن وسىرەتىن كومپانيا قازىر يزرايلدىك ۇلگىدەگى سۋارۋ جۇيەسىن پايدالانىپ وتىر. «اعىمدىق گيدروپونيكا» دەپ اتالاتىن بۇل ءادىستىڭ وزىندىك ەرەكشەلىگى مەن ارتىقشىلىعى جەتىپ-ارتىلادى. ال گيدروپونيكا دەگەننىڭ انىقتاماسىنا ۇڭىلسەك, ول – وسىمدىكتەردى توپىراقسىز, جاساندى ورتادا – قورەكتىك زاتتاردىڭ سۋداعى ەرىتىندىسىندە ءوسىرۋ ءادىسى ەكەن.
«جىلىجايدى سالۋ كەزىندە كومپانيا ديرەكتورى رومان بوريسوۆيچ شنايدەرمان مامانداردىڭ حالىقارالىق توبىن شاقىردى. دانيا, نيدەرلاند جانە يزرايل ماماندارى كەلدى. سوندىقتان بىزدەگى تەحنولوگيانى «ميكس» دەپ ايتۋعا بولادى. ال اعىمدىق گيدروپونيكانىڭ وزىنە كەلەر بولساق, بۇل جۇيە – يزرايل تەحنولوگياسى. ەرەكشەلىگى – ءبىر قاتاردا تۇرعان وسىمدىكتەردىڭ استىندا قۇبىر بار. سۋ قۇبىر ارقىلى جوعارىدان تومەن قاراي ءجۇرىپ وتىرادى. سول سەبەپتى, ىلعال ۇزىلمەيدى. وسى سۋارۋ جۇيەسىنىڭ كومەگىمەن ءبىر قاتارداعى 125 قۇمىرانىڭ بارلىعىن ەش قيىندىقسىز تولىقتاي سۋارىپ شىعادى», دەيدى «Green Eco» جىلىجاي كەشەنىنىڭ ماركەتينگ ديرەكتورى ەكاتەرينا كارمىشەۆا.
سۋ رەسۋرسىنىڭ تاپشىلىعى سەزىلەتىن قازىرگى ۋاقىتتا اعىمدىق گيدروپونيكانىڭ ماڭىزى ارتىپ تۇر. سۋدى ۇنەمدەۋمەن قاتار, ونىمدىلىكتى ەسەلەۋگە تاپتىرماس تەحنولوگيا. جىلىجايداعى بارلىق وسىمدىكتى قورەكتەندىرەتىن سۋ ارنايى باسسەيندە تازارتىلادى. ناتيجەسىندە, ءبىر رەت پايدالانىلعان سۋ قايتا وڭدەلىپ, جىلىجاي ەگىستىگىنە قايتادى.
تاعى ءبىر ەرەكشەلىگى – جىلىجايعا قولدانىلاتىن سۋ 250 مەتر تەرەڭدىكتەگى ارتەزيان سۋى. ونىڭ تازالىعى مەن ادام اعزاسىنا پايداسى ايتپاسا دا تۇسىنىكتى. سۇزبەلى حاۋىزدا جەراستىنان الىنعان سۋدى تازارتىپ, كەيىن قۇبىرلار ارقىلى جىلىجايعا جىبەرىلەتىنىن تىلگە تيەك ەتكەن مامان, اسكوكتىڭ 30-دان استام ءتۇرى وسىرىلەتىن جىلىجايعا سۋدىڭ جەتكىلىكتى كەلۋى ماڭىزدى ەكەنىن ايتادى.
ء«بىزدىڭ جىلىجايدا حيميالىق قوسپا مۇلدەم قولدانىلمايدى. وسىمدىكتەر سۋ جانە قاجەتتى دارۋمەندەرمەن عانا قورەكتەنەدى. بارلىعى تابيعي, تازا قوسپالار. «Green Eco» جىلىجاي كەشەنى اي سايىن 500 مىڭ قۇمىرا كوكونىس وسىرەدى. بۇل شامامەن 60 مىڭ توننا اسكوككە اينالادى. تاڭدايعا تاتىمدى بالعىن وسىمدىكتەرىمىز ەلىمىزدەگى 10 شاقتى قالا مەن ءىرى ساۋدا ورتالىقتارىنىڭ, الەۋمەتتىك دۇكەندەردىڭ سورەلەرىنە جونەلتىلەدى», دەيدى ەكاتەرينا كارمىشەۆا.
«Green Eco» جىلىجاي كەشەنىندە تالعار اۋدانىنىڭ ەلدى مەكەندەرىنەن 150-گە جۋىق ادام ەڭبەك ەتىپ, تۇراقتى ناپاقاسىن تاۋىپ وتىر. كاسىپورىن باسشىلىعى جەرگىلىكتى جۇرتتى جۇمىسپەن قامتىپ, الاڭسىز ەڭبەك ەتۋىنە قولايلى جاعداي دا جاساپ بەرگەن. ورتاشا ايلىق 120-130 مىڭ تەڭگەدەن باستالادى. جوعارى ءبىلىمدى مامانداردىڭ ەڭبەكاقىسى بىلىكتىلىگى مەن جۇمىس وتىلىنە قاراي ءوسىپ وتىرادى.
«Green Eco» جىلىجاي كەشەنىندە «شاعىن كوكونىس تەحنولوگياسى» دەگەن ادىسپەن اسكوك ءوسىرۋ جولعا قويىلعان. مۇندا كوكونىستەر كۇن نۇرىمەن وسىرىلەدى. بۇل جەردە 10-نان اسا وسىمدىك ءتۇرى بار. «شاعىن كوكونىس تەحنولوگياسىمەن» وتىرعىزىلعان وسىمدىك 10-12 كۇن ارالىعىندا ءوسىپ, دايىن بولادى. ودان كەيىن دۇكەندەرگە جىبەرىلەدى.
تاقىرىپقا تۇزدىق بولعان «Green Eco» – باسقا جىلىجايلاردان زاماناۋي دەڭگەيدە جابدىقتالۋىمەن, جۇمىس ۇدەرىسىنىڭ اۆتوماتتاندىرىلۋىمەن ەرەكشەلەنەدى. جىلىجايدا جىل بويىنا جاڭا تەحنولوگيالار ارقىلى ادام دەنساۋلىعىن نىعايتىپ, يممۋندىق جۇيەسىن جاقسارتۋعا اسا پايدالى سالاتتىق كوك شوپتەر مەن دامدەۋىشتەر وسىرىلەدى. جىلىنا 4 ملن بايلام سالاتتىق شوپتەر وسىرە الاتىن جىلىجايدا جۇمىس ىرعاعى قالىپتى جولعا قويىلعان.
سونداي-اق جىلىجاي ءوندىرىسىن دامىتۋعا ىنتالى كاسىپ يەلەرىمەن ارىپتەستىك بايلانىستا جۇمىس جاساپ, بۇل باعىتتا تانىمدىق تۋرلار وتكىزۋ داستۇرگە اينالعان. اسىرەسە مەكتەپ وقۋشىلارى مەن ستۋدەنت-جاستار ءجيى كەلىپ, كوكونىس ءوسىرۋدىڭ قىر-سىرىمەن تانىسىپ, دۇرىس تاماقتانۋدىڭ ماڭىزدىلىعى جونىندە دە حاباردار بولىپ كەلەدى.
الماتى وبلىسى,
تالعار اۋدانى
