فوتو: الماتى قالاسى اكىمدىگى
بۇل قاتاردا وليمپيادانىڭ كۇمىس جۇلدەگەرى – گيمناست ناريمان قۇربانوۆ, قولا جۇلدە يەگەرى – دزيۋدوشى عۇسمان قىرعىزباەۆ, بوكسشى نازىم قىزايباي جانە مەرگەندەر الەكساندرا لە مەن يسلام ساتباەۆ بار.
«ۇلتتىق قۇراما ساپىندا ونەر كورسەتكەن الماتىلىق سپورتشىلاردىڭ قازاقستان قورجىنىنا كوپ مەدال سالعانى قۋانتادى. تالانتتارىڭىزدىڭ, تاباندىلىعىڭىزدىڭ جانە ەڭبەكقورلىعىڭىزدىڭ ارقاسىندا سىزدەر ماڭىزدى دا تاريحي جەڭىسكە قول جەتكىزىپ, حالىقتىڭ ىستىق ىقىلاسىنا يە بولدىڭىزدار, الەمدىك سپورتتىڭ دامۋىنا ۇلەس قوستىڭىزدار», دەدى ەربولات دوساەۆ.
اكىمدىك ناريمان قۇربانوۆقا ەكى بولمەلى, عۇسمان قىرعىزباەۆقا, نازىم قىزايبايعا, الەكساندرا لە مەن يسلام ساتباەۆقا ءبىر بولمەلى پاتەردىڭ سەرتيفيكاتىن تابىستادى.
سونداي-اق ناريمان قۇربانوۆقا دەمەۋشىلەردىڭ اتىنان تاعى ءبىر بولمەلى پاتەر بەرىلدى.
سونداي-اق وسى كەزدەسۋگە كەلگەن بارلىق سپورتشىعا 5 جانە 4 ميلليون تەڭگەدەن اقشالاي سەرتيفيكاتتار مەن اۆتوكولىك سىيعا بەرىلدى.
