فوتو:اشىق دەرەككوز
ۇكىمەت وتىرىسىندا كۇن تارتىبىنەن تىس جاڭا مايمىل شەشەگى ۆيرۋسى ماسەلەسى قارالدى.
پرەمەر-مينيستر ازىرگە الاڭداۋعا نەگىز جوق ەكەنىن, الايدا ارقانى كەڭگە سالۋعا بولمايتىنىن اتاپ ءوتتى.
«كورىپ وتىرعانىمىزداي, ازىرگە الاڭداۋعا ەش نەگىز جوق. قازاقستاندا قاۋىپتى ىندەتتى جۇقتىرۋدىڭ بىردە-ءبىر جاعدايى تىركەلگەن جوق. الايدا ارقانى كەڭگە سالۋعا بولمايدى. دەنساۋلىق ساقتاۋ مينيسترلىگى احۋالدى ءارى قاراي باقىلاۋدا ۇستاپ, جۇقپالى اۋرۋدىڭ ەل اۋماعىندا تارالۋ قاۋپىن بولدىرماۋ بويىنشا الدىن الۋ شارالارىن قابىلداسىن. بۇل اسىرەسە, اۋەجايلار مەن شەكاراداعى وتكىزۋ بەكەتتەرىنە قاتىستى», دەدى ولجاس بەكتەنوۆ.
دەنساۋلىق ساقتاۋ ۆيتسە-ءمينيسترى ەرجان نۇرلىباەۆ بۇگىنگى تاڭدا قازاقستاندا ەپيدەميولوگيالىق جاعداي تۇراقتى, سيرەك جۇقپالى اۋرۋدى جۇقتىرۋ جاعدايى تىركەلمەگەنىن ايتتى.
«قازاقستان رەسپۋبليكاسى اۋماعىندا ىندەتتىڭ پايدا بولۋ قاۋپى از. وسىعان قاراماستان, مينيسترلىك بۇل ينفەكتسيانىڭ تارالۋىنا جول بەرمەۋ ءۇشىن بارلىق قاجەتتى الدىن الۋ شارالارىن قابىلداپ جاتىر. مەملەكەتتىك شەكارا ارقىلى وتكىزۋ بەكەتتەرىندە سانيتارلىق-كارانتيندىك باقىلاۋ كۇشەيتىلدى. اتالعان ينفەكتسياعا كۇدىكتى ناۋقاستار اكەلىنگەن جانە انىقتالعان جاعدايدا, جاعدايدىڭ ۋشىعۋىنىڭ ءتۇرلى ستسەناريلەرى بويىنشا مەديتسينالىق قىزمەتتەردىڭ ءىس-قيمىل الگوريتمدەرى ازىرلەندى. دارىلىك زاتتار قورىنىڭ قاجەتتى كولەمىن قالىپتاستىرۋ شارالارى قابىلداندى. مەديتسينا قىزمەتكەرلەرىن دياگنوستيكا جانە ەمدەۋ ادىستەرىنە وقىتۋدىڭ قايتالاما تسيكلدەرى جەرگىلىكتى جەرلەردە جۇرگىزىلەدى. باس مەملەكەتتىك سانيتارلىق دارىگەردىڭ قاۋلىسى جانە توتەنشە جاعدايلار كەزىندەگى ۇلتتىق ءىس-قيمىل جوسپارى دايىندالدى. جاعداي دەنساۋلىق ساقتاۋ مينيسترلىگىنىڭ تۇراقتى باقىلاۋىندا», دەدى ەرجان نۇرلىباەۆ.
