ماڭعىستاۋدا وقۋشىلاردى تاسىمالدايتىن جۇرگىزۋشىلەر شۋ شىعاردى

اقتاۋ. 12 ماۋسىم. ماڭعىستاۋدا وقۋشىلاردى تاسىمالدايتىن اۆتوبۋس جۇرگىزۋشىلەرى شۋ شىعاردى. بۇل تۋرالى nur.kz سايتىنا سىلتەمە جاساعان egemen.kz ءتىلشىسى حابارلادى. ماڭعىستاۋ وبلىسىندا بىرنەشە ايدان بەرى ەڭبەكاقىلارىن الا الماي جۇرگەن وقۋشىلار تاسىمالدايتىن اۆتوبۋستاردىڭ جۇرگىزۋشىلەرى شۋ شىعاردى. وقۋشىلار تاسىمالىن جۇزەگە اسىراتىن 57 جۇرگىزۋشى قالا سىرتىنداعى اۋىلداردىڭ 6 مىڭ وقۋشىسىن مەكتەپكە تاسيتىن كولىك كومپانياسىنا جالدانىپ جۇمىس ىستەيدى. كەيبىرىنە جالاقى 7 ايدان بەرى تولەنبەگەن. ال مەملەكەتتىك تاپسىرىس بويىنشا جۇمىس ىستەيتىن مەكەمە باسشىسى جۇرگىزۋشىلەرگە قاراجات تولەۋدەن قاشپايتىندىعىن, بىراق جەرگىلىكتى اتقارۋشى ورگاندار اقشانى اۋدارماعاندىعىن ايتۋدا. ياعني, وڭىردەگى 5 اۋىل اكىمدىگى 70 ميلليون تەڭگە قارىز ەكەن. كومپانيا باسشىسى قوماقتى قارجىنى وتەۋى ءۇشىن ەندى جەرگىلىكتى شەندىلەرمەن سوتتاسپاق. تاسىمالداۋشى كومپانيانىڭ ديرەكتورى مۇحتار قاتارباەۆ بولسا: «ماعان قازىر ەش جەردەن اقشا تۇسپەي تۇر. ومىرزاق – 5 ميلليون, مۇنايلىداعى اتامەكەن – 22-23 ميلليون, باسقۇدىق – 11 ميلليون 900 مىڭ, اقشۇقىر – 33 ميلليون, سايىن – 7 ميلليون تەڭگە كولەمىندە قارىز», – دەيدى. اۋىلداردىڭ ىشىندە وقۋ جىلى باستالعالى كوك تيىن تولەمەگەندەر دە بار ەكەن. اكىمدەرى ونىڭ سەبەبىن ءتۇسىندىرۋدى سۇراپ جازىلعان حاتقا جاۋاپ تا بەرمەيدى دەگەندى ايتادى كومپانيا باسشىسى. قازىرگى تاڭدا كومپانيا باسشىسى قارىز اقشانى ءوندىرىپ الۋ ءۇشىن اكىمدىكتەردى سوتقا بەرمەك. ال اۆتوبۋس جۇرگىزۋشىلەرى جوعارى ورىندارعا ارىزدانۋدا. جۇرگىزۋشىلەر ءوز ىستەرىنەن ناتيجە بولماسا, ماڭعىستاۋ وبلىستىق اكىمدىگى الدىندا نارازىلىق شەرۋىن وتكىزۋگە بەكىنىپ وتىر. گۇلايىم شىنتەمىرقىزى. دەرەك: egemen.kz. Cۋرەت: gsmavto.com