«قايىرىمدىلىق جاساساڭ, قايىرىن ءوزىڭ كورەسىڭ» دەيدى دانا حالقىمىز. سانانى نارىق بيلەگەن زاماندا جۇرەگى كەڭ, جانى جومارت ادامداردىڭ بارى جاندى جادىراتادى, بولاشاققا ءۇمىت سىيلايدى. «بالا قۋانسا, الەم قۋانادى» دەمەكشى, جالاۋلى ورتا مەكتەبىنىڭ ديرەكتورى ايبول تۇرسىنبەك ۇلىنىڭ ۇيىتقى بولۋىمەن «مەكتەپكە جول» قايىرىمدىلىق اكتسياسى ءداستۇرلى جالعاسىن تاپتى. اكتسيانىڭ ماقساتى – جاڭا وقۋ جىلىنا دايىندىق ۋاقىتىندا از قامتىلعان جانە كوپبالالى وتباسىلاردان شىققان وقۋشىلارعا قولداۋ كورسەتۋ, وقۋعا ىنتالاندىرۋ. وسى تۇستا مەكتەبىمىزگە مەيىرىم-شاپاعاتىن تيگىزىپ جۇرگەن اتىمتاي جومارت ازاماتتارعا, اتاپ ايتقاندا اۋداننىڭ اعارتۋ سالاسىنا سۇبەلى ەڭبەك ءسىڭىرىپ, ۇلاعاتتى ۇرپاق وسىرگەن ءادىلحان زىقاەۆ اتامىزدىڭ قىزى, «اشادان» قوعامدىق قورىنىڭ توراعاسى لەنا بايسەيىتوۆا مەن ۇلدارى, ەكونوميكا عىلىمدارىنىڭ دوكتورى بۋلان ءادىلحان ۇلى مەن اۋىلشارۋاشىلىق سالاسىنىڭ قىزمەتكەرى, كاسىپكەر نۇرلان ءادىلحان ۇلىنا العىسىمىز زور», دەيدى جالاۋلى ورتا مەكتەبىنىڭ تاربيە ءىسى جونىندەگى ورىنباسارى قۇرالاي ەمىناقىنوۆا.
اسقار تاۋ اكەنىڭ پاراساتتىلىعىمەن قوسا, كەڭ پەيىلى مەن ىزگىلىككە تولى ءىز قالدىرۋ سىندى اسىل قاسيەتتەرىن سىڭىرگەن ۇرپاقتارى قايىرىمدىلىق جاساۋعا اسىعىپ, جالاۋلى اۋىلىنداعى ۇياداي مەكتەپتىڭ وقۋشىلارىنا «مەكتەپكە جول» اكتسياسى اياسىندا 100 وقۋشىعا مەكتەپ فورماسى, سپورتتىق كيىمدەر مەن اياقكيىمدەر, باستاۋىش سىنىپ وقۋشىلارىنا وقۋ قۇرالدارى مەن مەكتەپ سومكەسىن, سوعان قوسا 25 كومپيۋتەردى سىيعا تارتقان.
سونداي-اق بىلتىر مەكتەپ بىتىرگەندەرىنە 20 جىل تولعان تۇلەكتەر تۋعان جەرگە تۋىن تىگىپ, ىزدەرىنەن ىلەسكەن ءىنى-قارىنداستارىن قۋانتۋ ماقساتىندا مەكتەپتىڭ 5 وقۋشىسىنا «بالداۋرەن» جازدىق لاگەرىنە جولداما بەرىپ, جومارتتىق جاساعاندىعىن اتاۋ ءلازىم.
ىنتىماق پەن بىرلىكتىڭ, تىنىمسىز تىرلىكتىڭ ۇيىتقىسىنا اينالعان تۇيىق اۋىلىندا دا اۋىز تولتىرىپ ايتارلىق ىزگى ىستەر از ەمەس. اسىرەسە الاقانداي اۋىلدىڭ بالالارىنا ءبىلىم ءنارىن ءسىڭىرىپ, ۇلكەن ومىرگە قانات قاقتىرىپ وتىرعان التىن ۇيا مەكتەبىنە قولۇشىن بەرىپ, قامقورلىق جاساۋدى قالتالى پەرزەنتتەرى ۇمىتپاعان. شالعايدا ورنالاسقان اۋىلدىق مەكتەپتەن ءبىلىمدى دە بىلىكتى ۇستازداردىڭ شاراپاتىمەن مىڭداعان شاكىرت ءبىلىم الىپ, قازىرگى تاڭدا ءار سالادا جەمىستى ەڭبەك ەتىپ ءجۇر. اۋىلدان الىستاپ كەتسە دە, تامىرى اۋىلدا جاتقان قازاق بالاسى وزدەرى تۇلەپ ۇشقان مەكتەپتەرىنە, سول جەردە ءبىلىم الىپ جاتقان جاس ۇرپاقتىڭ ساپالى ءبىلىم الۋىنا جىل سايىن «مەكتەپكە جول» اكتسياسى اياسىندا قوماقتى ۇلەس قوسۋدى داستۇرگە اينالدىرعان.
«بۇگىندە تۇيىق ورتا مەكتەبىندە 186 وقۋشى سانالى تاربيە, ساپالى ءبىلىم الۋدا. بيىلعى جاڭا وقۋ جىلىندا 1-سىنىپقا 11 بالا قابىلدانسا, 18 وقۋشى 11-سىنىپتى بىتىرەدى. وسى وقۋشىلاردىڭ تولىققاندى ءبىلىم الۋىنا قاجەت ماتەريالدىق-تەحنيكالىق بازانى جاقسارتۋعا كەڭ پەيىل كاسىپكەرلەر كومەك كورسەتىپ, وسكەلەڭ ۇرپاققا ۇلگى-ونەگە بولىپ وتىر. اتاپ ايتار بولساق, 2023–2024 وقۋ جىلىندا «BTS» جشس باس ديرەكتورى ماعاۋيا قىزايباي ۇلى مەكتەپكە ماتەماتيكا كابينەتىن اشىپ بەردى. كابينەتتى تولىقتاي زاماناۋي تالاپقا ساي جابدىقتاپ, جوندەۋ جۇمىستارىمەن ارلەندىرىپ, كورنەكىلىكتەر, ديداكتيكالىق ماتەريالدار جانە پانەلدىك تاقتا, جيھاز, پارتا-ورىندىقتارمەن تولىق قامتاماسىز ەتتى. وقۋشىلاردىڭ ماتەماتيكا پانىنە ىنتالاندىرۋ ماقساتىندا 5–7 سىنىپ وقۋشىلار اراسىندا جىل سايىن «قىزايباي ىسقاق ۇلى» اتىندا وليمپيادا وتكىزۋدى جوسپارلاپ, ءبىرىنشى وليمپيادا قورىتىندىسىمەن ۇزدىك تانىلعان 3 وقۋشى اي سايىن 25000 تەڭگەدەن جىل بويى ستيپەنديا الىپ وتىر. ال الداعى 2024–2025 وقۋ جىلىندا «ارحينجپروەكت» جشس جەتەكشىسى دۋمان اباي ۇلى مەكتەپتىڭ سپورت زالىنا قاجەتتى قۇرال-جابدىقتارمەن تولىقتاي قامتاماسىز ەتىپ وتىر», دەيدى تۇيىق ورتا مەكتەبىنىڭ ديرەكتورى مەرۋەرت اۋباكىرقىزى.
ءيا, ءوندىرىس وشاعى جوق, الدىنا سالىپ باققان تاي-تۇياعىن كۇنكورىس كوزىنە اينالدىرىپ وتىرعان ەلدى مەكەن تۇرعىندارىنا وسىنداي ۋاقىتتا قولۇشىن بەرىپ, قامقورلىق, مەيىرىمدىلىك تانىتۋ – ازاماتتىق ءىس دەر ەدىك. «مەيىرىمدىلىك – جۇرەكتەن» جوباسى بويىنشا اۋداننىڭ بىرقاتار مەكتەبىندە دەمەۋشىلەردىڭ كومەگىمەن وقۋشىلاردى قۇرال-جابدىقپەن قامتاماسىز ەتۋ جۇمىستارى جالعاستى. بۇل ورايدا, مەكتەپ مۇعالىمدەرىنىڭ دە ءوز قالتالارىنان قارجى جيناپ, الەۋمەتتىك جاعدايى تومەن وقۋشىلارىنا قامقورلىق كورسەتىپ وتىرعان ۇلكەن جۇرەك يەلەرى ەكەنىن ايرىقشا اتاۋ ورىندى.
اتاپ ايتساق, ءى.جۇماعۇلوۆ, س.سەركەباەۆ, ك.نۇرپەيىسوۆ اتىنداعى, بولەكساز, اقساي, تالدى, بەسكول, قارابۇلاق اۋىلدارىنداعى ورتا مەكتەپتەردە مۇعالىمدەردىڭ جانە جەكە دەمەۋشىلەردىڭ كومەگىمەن مەكتەپ جاسىنداعى بالالارعا سپورتتىق كيىمدەر, مەكتەپ فورماسى, وقۋ قۇرالدارى الىنعان. تاساشى ورتا مەكتەبى جانىنداعى ينتەرناتتا وقيتىن 54 بالاعا جەكە كاسىپكەر اياۋلىم باۋىرجانقىزى 216 000 تەڭگەگە وقۋ قۇرالدارىن ساتىپ الىپ قويعان. سونداي-اق مايلى ورمانوۆ مەكتەبىنىڭ وقۋشىسىنا دا جەكە كاسىپكەر قولۇشىن بەرىپ, كەرەك-جاراقپەن قامتاماسىز ەتكەن. سونىمەن قاتار جاقسىلىق جاساۋعا اسىققان مەكتەپ تۇلەكتەرى ا.نۇسىپبەكوۆ اتىنداعى ورتا مەكتەپتىڭ 25 وقۋشىسىنا, ج.ەرمەگياەۆ اتىنداعى ورتا مەكتەپتىڭ 15 وقۋشىسىنا, قارقارا ورتا مەكتەبىندە 1-سىنىپقا كەلەتىن 17 بالاعا مەكتەپ فورماسى مەن وقۋ-قۇرالدارىن الىپ قۋانتقان.
جالپى, كەگەن اۋدانى بويىنشا 1 بالاعا شاققانداعى 43 407 تەڭگەدەن بولىنگەن مەملەكەتتىك جاردەم 880 وقۋشىنىڭ اتا-اناسىنىڭ ەسەپشوتىنا اۋدارىلىپ, وعان مەكتەپ فورمالارى الىنعان.
الماتى وبلىسى,
كەگەن اۋدانى
