جاقىندا قازاق كۇرەسىنەن وتەتىن جارىستا قازاقستاننىڭ ۇلتتىق كومانداسى قانداي قۇرامدا ونەر كورسەتەتىنى بەلگىلى بولدى. ەرلەر اراسىندا بەكجان تولەپوۆ (55 كگ, جەتىسۋ وبلىسى), مەيىرجان بەرەكەتوۆ (60 كگ, سقو), ديدار تۇقىشەۆ (66 كگ, اباي وبلىسى), جۇماجان قوجامبەكوۆ (74 كگ, شىمكەنت قالاسى), ەرسىن سەيىتقازىنوۆ (82 كگ, اباي وبلىسى), ەراسىل جاناتاەۆ (90 كگ, الماتى قالاسى), ەرسۇلتان مۇزاپپاروۆ (100 كگ, شىمكەنت قالاسى) جانە نۇرداۋلەت جارىلعاپوۆ (+100 كگ, ماڭعىستاۋ وبلىسى) سياقتى ساڭلاقتار سايىسقا تۇسەدى. وسى جىگىتتەردىڭ بارلىعى – ءتۇرلى تۋرنيرلەرگە قاتىسىپ, جەڭىس تۇعىرىنا كوتەرىلگەندەر. سولاردىڭ اراسىنان ەرسۇلتان مۇزاپپاروۆ پەن نۇرداۋلەت جارىلعاپوۆتى بولە-جارا اتاپ وتۋگە بولادى. ولار – رەسپۋبليكالىق جانە حالىقارالىق جارىستاردا دارالانعان اككى سپورتشىلار. ەرسۇلتان مەن نۇرداۋلەت ەلىمىزدىڭ بەتكەۇستار بالۋاندارى رەتىندە «قازاقستان بارىسى» دەپ اتالاتىن مارتەبەلى تۋرنيردە كۇش سىناسىپ, ءار جىلدارى وزدەرىنىڭ ايشىقتى ونەرىمەن سان مىڭ كورەرمەندى قۋانتتى. «قارا بۋرا» اتانعان ن. جارىلعاپوۆ 2021 جىلى اتالعان جارىستىڭ قولا جۇلدەگەرى اتانىپ, الەم چەمپيوناتىندا توپ جاردى. دزيۋدو مەن قازاق كۇرەسىن قاتار الىپ جۇرگەن ە.مۇزاپپاروۆ كۇش اتاسى قاجىمۇقان مۇڭايتپاسوۆتىڭ مەموريالىندا باس جۇلدەنى ولجالادى. ولاردىڭ باسقا دا تولىپ جاتقان اتاقتارى بار.
ايەلدەر باسەكەسىندە ايجان جىلقىباەۆا (48 كگ, تۇركىستان وبلىسى), نازەركە ازاماتوۆا (52 كگ, اقتوبە وبلىسى), راۋزا نۇرماحامەتوۆا (56 كگ, جامبىل وبلىسى), باقىت قۇساقباەۆا (60 كگ, اقتوبە وبلىسى), زارينا ساريپوۆا (65 كگ, اباي وبلىسى), روزا نىسانتايقىزى (70 كگ, اباي وبلىسى), زامزاگۇل فايزوللانوۆا (77 كگ, شىمكەنت قالاسى) جانە ءالبينا باحيەۆا (+77 كگ, شىمكەنت قالاسى) باق سىنايدى. وزدەرىڭىز بايقاعانداي, بۇل بۇرىمدىلارىمىزدىڭ دەنى – دزيۋدو مەن سامبونىڭ قاس شەبەرى. ارالارىندا ارالاس جەكپە-جەكتەن ءدۇبىرلى دودالارعا قاتىسىپ جۇرگەن زامزاگۇل ەسىمدى قازاقتىڭ قايسار قىزى دا بار. قازىرگى كەزدە وسى ارۋلارىمىزدىڭ بارلىعى دا قازاق كۇرەسىنە مىقتاپ دەن قويعان سىڭايلى.
قازاق ەلىنىڭ بالۋاندارى V دۇنيەجۇزىلىك كوشپەلىلەر ويىندارىنا تىڭعىلىقتى دايارلانىپ جاتىر. جىل باسىنان بەرى ەكى رەت الماتىدا, ودان بولەك گرۋزيا مەن قىرعىزستاندا وقۋ-جاتتىعۋ جيىندارى ۇيىمداستىرىلدى. كۇنى كەشە عانا ولار اقمولا وبلىسىنىڭ شۋچە قالاسىندا دايىندىق جۇمىستارىن پىسىقتاپ قايتتى. وسى جيىن بارىسىندا ىرىكتەۋ سايىستارى ءوتىپ, اتالعان جارىستا ەل نامىسىن قورعايتىن بالۋاندار انىقتالدى. ال سوڭعى وقۋ-جاتتىعۋ جيىنىن 27 تامىز بەن 7 قىركۇيەك ارالىعىندا استاناداعى جاقسىلىق ۇشكەمپىروۆ اتىنداعى جەكپە-جەك سارايىندا ۇيىمداستىرۋ كوزدەلىپ وتىر.
قازاق كۇرەسىنەن قازاقستان ۇلتتىق قۇراماسىنىڭ باس باپكەرى عاني كەلدىقۇلوۆ: ء«بىزدىڭ سپورتشىلار دۇنيەجۇزىلىك كوشپەلىلەر ويىندارىندا فيزيكالىق تۇرعىدان دا, تاجىريبە جاعىنان دا تولىقتاي دايىن. بۇعان دەيىن ولار ورتا تاۋ بوكتەرىندە جالپى دەنە دايىندىقتارىن قالپىنا كەلتىرىپ, شەتەلدىك بالۋاندارمەن تاجىريبە الماستى. ال سوڭعى وقۋ-جاتتىعۋ جيىنىندا سالماق قۋ جانە قالىپقا كەلۋ جۇمىستارىنا باسىمدىق بەرىلەدى. وسىنداي ءىرى جارىس جەرلەستەرىمىزگە ۇلكەن جاۋاپكەرشىلىك جۇكتەپ وتىر. سول سەبەپتى دە سەنىم ارتقان سپورتشىلار الداعى ماڭىزدى جارىستا ەل نامىسىن ابىرويمەن قورعاپ, جەڭىس تۇعىرىنا كوتەرىلۋ ءۇشىن بارىن سالاتىنىنا سەنىمدىمىن», دەپ ءوز ويىمەن ءبولىستى.
ەستەرىڭىزگە سالا كەتەيىك, دۇنيەجۇزىلىك كوشپەلىلەر ويىندارىنا 89 مەملەكەتتەن كەلگەن 2 مىڭنان اسا سپورتشى قاتىسادى. استاناداعى جارىستىڭ باعدارلاماسىنا 21 سپورت ءتۇرى كىرسە, سونىڭ 12-ءسى – ءتول ونەرىمىز.
