ونەركاسىپ جانە قۇرىلىس, وقۋ-اعارتۋ, دەنساۋلىق ساقتاۋ, ەنەرگەتيكا, كولىك مينيسترلىكتەرىنىڭ باسشىلارى مەن بىرقاتار وبلىس اكىمدەرى سۋ تاسقىنى سالدارىن جويۋ جۇمىستارىنىڭ بارىسى تۋرالى باياندادى. اپاتتى دەپ تانىلعان 8 650 ءۇيدىڭ يەسىنە قايتالاما نارىقتان ءۇي ساتىپ الىنىپ نەمەسە جاڭاسى سالىنىپ جاتىر. ونەركاسىپ جانە قۇرىلىس ءمينيسترى قانات شارلاپاەۆتىڭ ايتۋىنشا, 2 569 جاڭا ءۇي سالىنىپ جاتىر, ولاردىڭ 619-ى تولىقتاي دايىن. 2 431 ءۇيدىڭ ىرگەتاسى تۇرعىزىلدى, 2 207 ءۇيدىڭ قابىرعاسى قالاندى, 2 007 نىساننىڭ شاتىرى جابىلدى.
جوندەلۋگە ءتيىس 9 189 نىساننىڭ 8 939-ىندا (97%) جۇمىستار اياقتالعان. ساتىپ الۋعا جوسپارلانعان 6 081 ءۇي مەن پاتەردىڭ بۇگىندە 4 918-ءى (81%) ساتىپ الىندى.
پرەمەر-مينيستر سۋ تاسقىنى سالدارىن جويۋ جانە ازاماتتاردىڭ مۇلكىن قالپىنا كەلتىرۋدە بەلسەندى جۇمىس جۇرگىزىلسە دە, بەكىتىلگەن كەستەلەردەن كەشىگۋ فاكتىلەرى بار ەكەنىنە توقتالدى.
«مەملەكەت باسشىسىنىڭ سۋ تاسقىنىنان زارداپ شەككەندەردى ۋاقتىلى تۇرعىن ۇيمەن قامتاماسىز ەتۋ جونىندەگى مىندەتى مەرزىمىندە ورىندالۋعا ءتيىس. رەسپۋبليكالىق شتاب قاجەتتى شەشىمدەردى قابىلدادى, قارجى تولىق كولەمدە ءبولىندى. بارلىق رەسۋرستى جۇمىلدىرىپ, جۇمىستى جانداندىرۋ قاجەت», دەپ اتاپ ءوتتى ولجاس بەكتەنوۆ.
سونداي-اق ۇكىمەت باسشىسىنا الەۋمەتتىك نىسانداردى قالپىنا كەلتىرۋ جۇمىستارى تۋرالى باياندالدى. سۋ تاسقىنى سالدارىنان ەلىمىزدىڭ 6 وڭىرىندە 11 مىڭعا جۋىق بالا وقيتىن 40 ءبىلىم ۇيىمى زارداپ شەكتى. بۇل باعىتتا دا قالپىنا كەلتىرۋ جۇمىستارى بەلسەندى اتقارىلىپ جاتىر.
اقتوبە وبلىسىندا 8 نىسانعا كۇردەلى جانە اعىمداعى جوندەۋ جۇمىستارى جۇرگىزىلىپ جاتىر. ۇكىمەت رەزەرۆىنەن 6 جاڭا ءبىلىم مەكەمەسىنىڭ قۇرىلىسىنا 6,2 ملرد تەڭگە ءبولىندى. اتىراۋ وبلىسىنداعى 6 نىساندا جوندەۋ جۇمىستارى 50%-عا اياقتالدى. سونىمەن قاتار بالاباقشا مەن مەكتەپ قۇرىلىسى باستالدى.
باتىس قازاقستان وبلىسىندا 4 نىساننىڭ اعىمداعى جوندەۋ جۇمىستارىن 1 قىركۇيەككە دەيىن اياقتاۋ جوسپارلانىپ وتىر. سولتۇستىك قازاقستان وبلىسىندا سۋ باسقان 5 ءبىلىم ۇيىمىنىڭ 3-ەۋى وقۋ جىلىن باستاۋعا دايىن. اقمولا جانە قوستاناي وبلىستارىنداعى ءبىلىم مەكەمەلەرىندە جوندەۋ جۇمىستارى اياقتالۋعا جاقىن. اتالعان وڭىرلەردە 6 نىسان زاقىمدانعان, سولاردىڭ بىرەۋى بۇزىلىپ, ورنىنا جاڭا عيمارات سالىنادى.
وڭىرلەردە 8 مەديتسينا مەكەمەسى زارداپ شەكتى. ءۇش نىساننىڭ قۇرىلىسى «اۋىلدا دەنساۋلىق ساقتاۋدى جاڭعىرتۋ» باعدارلاماسى اياسىندا جۇرگىزىلىپ جاتىر. تاعى ءۇش نىسان اعىمداعى جانە كۇردەلى جوندەۋدى قاجەت ەتەدى, ال بىرەۋىنىڭ ورنىنا جاڭا عيمارات سالۋ جوسپارلانعان.
بۇگىنگى تاڭدا رەسپۋبليكالىق ماگيسترالداردىڭ 102 ۋچاسكەسىندە جۇمىس تولىعىمەن اياقتالدى. گاز تاسىمالداۋ ينفراقۇرىلىمى نىساندارى شتاتتىق رەجىمدە جۇمىس ىستەيدى.
ونەركاسىپ جانە قۇرىلىس مينيسترلىگىنە اكىمدىكتەرمەن بىرلەسىپ, بارلىق جۇمىس اياقتالعانعا دەيىن قۇرىلىس نىساندارىندا ۇيلەستىرۋ مەن باقىلاۋدى كۇشەيتۋ تاپسىرىلدى.
