– ءبىز ءۇشىن بۇل توسىنسىي بولدى. وقۋشىلار سارايى پريشاحتينسك شاعىن اۋدانىندا ورنالاسقان. ءوزىمىزدىڭ كولىگىمىز بولماعاندىقتان, بالالارمەن قالا ورتالىعىنا قاتىناۋ, ءارتۇرلى ءىس-شارالارعا بارۋ ۇلكەن ماسەلە ەدى. سوندىقتان بۇل – ءبىز ءۇشىن وتە باعالى سىيلىق, – دەدى «كاۋسار» وقۋشىلار سارايىنىڭ ديرەكتورى ايگەرىم يسبەكوۆا.
نۇرا اۋدانىنداعى شاحتەر اۋلىنىڭ مادەنيەت ۇيىندە دە بۇرىن-سوڭدى جەكە اۆتوبۋس بولعان جوق. سوندىقتان پرەزيدەنتتىڭ تارتۋى ولاردىڭ دا مۇقتاجىن وتەدى.
– ەندى ءبىز وسى كولىكپەن كونكۋرستارعا الاڭسىز بارا الامىز. قۋانىشتىمىز. اۋىلىمىزدىڭ مادەنيەت ۇيىندە جەتى كوركەمونەرپازدار ۇجىمى جۇمىس ىستەيدى. جۇزگە جۋىق جاس پەن ءجاسوسپىرىم شىعارماشىلىقپەن اينالىسادى, – دەدى نۇرا اۋدانى مادەنيەت ءۇيىنىڭ ديرەكتورى ادىلبەك قۇمار. – سونىمەن قاتار شاحتەر اۋىلىندا دەنەشىنىقتىرۋ-ساۋىقتىرۋ كەشەنى بار. بۇل اۆتوبۋستى جارىسقا باراتىن سپورت-
شىلارىمىز دا پايدالانادى.
مەملەكەت باسشىسى 14 تامىزدا قاراعاندى وبلىسىنا جۇمىس ساپارىمەن بارىپ, وڭىردەگى ونەركاسىپ جانە يندۋستريالىق كاسىپورىنداردىڭ, الەۋمەتتىك نىسانداردىڭ قىزمەتىمەن تانىستى. اتاپ ايتقاندا, قاسىم-جومارت توقاەۆ پريشاحتينسك شاعىن اۋدانىندا جاڭادان اشىلعان وقۋشىلار سارايىن, سونداي-اق نۇرا اۋدانى شاحتەر اۋلىنداعى جاقىندا عانا جوندەۋدەن وتكەن مادەنيەت ءۇيى مەن دەنەشىنىقتىرۋ-ساۋىقتىرۋ كەشەنىن ارالاپ كوردى.
