وبلىس بالىق شارۋاشىلىعىن رەسپۋبليكالىق دەڭگەيدە دامىتۋ بويىنشا كوشباسشىلار ساناتىندا. مەملەكەت تاراپىنان دا بالىق شارۋاشىلىعىنىڭ دامۋىنا سۋبسيديا رەتىندە قولداۋ كورسەتىلەدى. ناتيجەسىندە, ازىققا, شاباققا, ءدارى-دارمەككە جانە ينۆەستيتسيالىق سالىمدار ءۇشىن سۋبسيديالاۋعا جىل سايىن قىرۋار قاراجات بولىنەدى.
«مىسالى, بىلتىر بالىق شارۋاشىلىعىن سۋبسيديالاۋعا 150 ملن تەڭگە ءبولىندى. بۇل قاراجات تولىعىمەن يگەرىلىپ, بيىلعا ارنالعان اكۆاوسىرۋ ءونىمىنىڭ ونىمدىلىگى مەن ساپاسىن ارتتىرۋدا, سونداي-اق اسىل تۇقىمدى بالىق ءوسىرۋدى دامىتۋعا سۋبسيديالاۋ كولەمى 300 ملن تەڭگە بولىپ بەكىتىلدى. قازىرگى ۋاقىتتا «Kezekte» اقپاراتتىق جۇيەلەر پلاتفورماسىنداعى «Balyqsy» سەرۆيسى ارقىلى تۇسكەن 46 ءوتىنىم بويىنشا 116,4 ملن تەڭگە تولەندى. بيىل بالىق شارۋاشىلىعىنا ينۆەستيتسيالىق سالىمداردى سۋبسيديالاۋعا جەرگىلىكتى بيۋدجەتتەن 500 ملن تەڭگە ءبولىنىپ, قازىر وتىنىمدەر قابىلداۋ جۇمىستارى جۇرگىزىلىپ جاتىر», دەيدى الماتى وبلىستىق تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى قانات نۇسىپباەۆ.
سونىمەن قاتار «اۋىل اماناتى» جوباسى بويىنشا اۋىل تۇرعىندارى ءوز بيزنەسىن دامىتۋعا نەمەسە كووپەراتيۆ قۇرامىندا جەڭىلدەتىلگەن نەسيە الا الاتىنى, سونداي-اق تەحنيكانى ليزينگكە رەسىمدەۋگە بولاتىنى ايتىلدى.
وڭىردە بالىق شارۋاشىلىعىن دامىتۋعا سۇبەلى ۇلەس قوسىپ جۇرگەن كاسىپكەر مارلەن ءتۇرسىنالى جۋىردا ەڭبەكشىقازاق اۋدانىنا قاراستى ەسىك وزەنىنىڭ بويىنان ەكىنشى شارۋاشىلىعىن اشىپ, سۋى تۇنىق باسسەينگە العاشقى شاباقتاردى جىبەردى. شامامەن 1 ملن دوللار كولەمىندە ينۆەستيتسيا سالىنعان جوبانىڭ جىلدىق قۋاتتىلىعى 500 توننا بولماق. وسىلايشا, كاسىپ يەسى تاۋ قويناۋىنداعى باسسەيندە فورەل تۇقىمىن وسىرۋگە بەل بايلاپ وتىر. «Aller Aqua Polska» كومپانياسىمەن تىكەلەي بايلانىس جاساپ, جەتى بالىق شارۋاشىلىعىن اشقان «TMT Group» جشس باسشىسى مارلەن ءتۇرسىنالى بالىقتا بەرەكە بارىن ايتادى.
«اعىندى سۋدىڭ ارناسىندا وسەتىن بالىقتىڭ ءدامدى بولاتىنىن تۇتىنۋشىلار بىلەدى. بالىقتىڭ ادام ورگانيزمىنە پايداسى وتە زور. بالىق تاعامدارىنىڭ قۇرامى ميكروەلەمەنتتەر مەن دارۋمەنگە باي ءارى بەرەكەلى بولادى. سوندىقتان بالىق پەن تەڭىز ونىمدەرىنە سۇرانىس ارتپاسا, كەمىگەن ەمەس», دەيدى ءىسىن ىلگەرىلەتىپ وتىرعان كاسىپكەر.
ەسىك وزەنىنىڭ بويىنان اشىلعان بالىق شارۋاشىلىعىنا جىبەرىلگەن ءۇش ايلىق شاباقتار التى ايدان سوڭ سالماعى 300-400 گر بالىق بولىپ, بايلىق كوزىنە اينالماق.
الماتى وبلىسى
