باتىس قازاقستاندا اۋدان اكىمى تاعايىندالدى

ورال. 12 ماۋسىم. باتىس قازاقستان وبلىسىنىڭ اكىمى نۇرلان نوعاەۆتىڭ وكىمىمەن ءادىل تاۋفيق ۇلى جولامانوۆ اقجايىق اۋدانىنىڭ اكىمى بولىپ تاعايىندالدى. بۇل تۋرالى egemen.kz ءتىلشىسى حابارلادى. اۋداندىق ءماسليحات دەپۋتاتتارى وبلىس اكىمىنىڭ ءادىل جولامانوۆتى اقجايىق اۋدانىنىڭ باسشىسى ەتىپ تاعايىنداۋ تۋرالى ۇسىنىسىن ءبىراۋىزدان ماقۇلدادى. ال بۇگىنگە دەيىن اتالعان اۋداننىڭ اكىمى بولىپ كەلگەن ناريمان تورەعاليەۆ باسقا جۇمىسقا اۋىسۋىنا بايلانىستى, قىزمەتىنەن بوساتىلدى. ول بۇل قىزمەتكە 2012 جىلعى ناۋرىز ايىندا كەلگەنىن ايتا كەتەيىك. وبلىس باسشىسى جەمىستى قىزمەتى ءۇشىن وعان العىسىن ءبىلدىرىپ, جاڭا اكىمدى اۋدان اكتيۆىنە تانىستىردى. سونداي-اق, ءوڭىر باسشىسى ءادىل جولامانوۆقا اكىمدىك مىندەتىن ابىرويمەن اتقارۋىنا تىلەكتەستىگىن ءبىلدىردى. ءادىل جولامانوۆ باتىس قازاقستان وبلىسى, سىرىم اۋدانىندا 1968 جىلى تۋعان. ەڭبەك جولىن تۋعان جەرىنەن باستاعان ول سىرىم اۋدانى اكىمىنىڭ ورىنباسارلىعىنا دەيىن كوتەرىلدى. 2014 جىلعى مامىردان بەرى باتىس قازاقستان وبلىسى اۋىل شارۋاشىلىعى باسقارماسى باسشىسىنىڭ ورىنباسارى قىزمەتىن اتقارىپ كەلدى. تەمىر قۇسايىن. دەرەك: egemen.kz. سۋرەت: ruinformer.com.