بۇقار جىراۋ اتىنداعى ادەبيەت جانە ونەر مۋزەيىندە شايىر سابىر ءسايحاليدىڭ 1905 جىلى قازان قالاسىندا اراب گرافيكاسىندا جارىق كورگەن كونە كىتابى تانىستىرىلدى. كىتاپتى قۇراستىرعان – يسمايل شامسۋدينوۆ, اتاۋى – «ديۋاني ءسايحالي». 296 بەتتەن تۇراتىن كىتاپتا ءدىني-تاريحي ۇزاق جىر جازىلعان. دۇنيەنىڭ جارالۋىنان باستاپ 680 جىلعى حۇسايىننىڭ كەربالا شولىندە سوعىسىپ ولگەنىنە دەيىنگى تاريح قامتىلعان.
سابىر ءسايحاليدىڭ ەسىمى اباي ولەڭىندە اتالادى.
«فزۋلي, شامسي, ءسايحالي,
ناۋاي, ساعدي, فيرداۋسي,
قوجا حافيز بۋ حامماسي,
مادەت بەر, ءيا, شاعيري [1] فارياد [2]».
بەلگىلەنگەن سوزدەردىڭ تۇسىنىگى كەلەسىدەي:
[1] - شاعيري (ارابشا) – اقىن. [2] - ءفارياد (پارسىشا) – تەڭدەسى جوق, اسىل.
دەمەك اباي قۇنانباي ۇلى شىعىستىڭ تەڭدەسى جوق اقىندارىنان مەدەت سۇراعان بولسا, سول سۇيەنىشىنىڭ ءبىرى – ءسايحالي اقىن.
عالامتورداعى ۋيكيپەديا مالىمەتتەرىنە سۇيەنسەك, سابىر ءسايحالي – XV عاسىردا ءومىر سۇرگەن اقىن. «ديۋاني ءسايحالي» كىتابى 1332 جىلى تاشكەنتتە, كەيىن قازان مەن ىستانبۇل قالالارىنداعى باسپادان شىققان.
بۇل كىتاپتىڭ بىرنەشە نۇسقاسى الماتى قالاسىنداعى ۇلتتىق كىتاپحانادا ساقتالسا, تاعى ءبىر نۇسقاسى اباي وبلىسىنداعى اباي مۋزەيىندە تۇر ەكەن. اباي مۋزەيىنە قايىم مۇحامەدحانوۆ تاپسىرعان.
كەرەكۋدەگى جادىگەردى پاۆلودار قالاسىنىڭ تۇرعىنى قاليپا ۇكەنقىزى تابىستادى.
پاۆلودار وبلىسى
