سۋرەتتى تۇسىرگەن – قۇشتار راشات
بۇگىنگى جاس – ەرتەڭگى وتباسىنىڭ وتاعاسى, ال وتباسى وتانىمىزدىڭ ىرگەتاسى ەكەنى بەلگىلى. وسىنداي قۇندىلىقتى كوزدەگەن ءىس-شارا استانا قالاسىنان باستاۋ الىپ, بۋراباي ۇلتتىق پاركىندە جالعاستى.
بالالارعا ۇلتتىق قۇندىلىقتار مەن ءتالىم-تاربيەنى تەرەڭنەن ءسىڭىرۋ ماقساتىندا تاريح عىلىمدارىنىڭ دوكتورى, پروفەسسور جامبىل ارتىقباەۆ, ارحەولوگيا جانە ەتنولوگيا ماگيسترى تۇرار شاكەن, پەداگوگ-ساراپشى, پسيحولوگ-كونسۋلتانت جۇلدىز جاڭابەرگەنوۆا, ۇلتتىق قۇندىلىقتاردى دارىپتەۋشى ءۇسىبالدى ساعادىلدا سىندى تۇلعالار ءدارىس وقىدى. ءىس-شارا ەكى كۇنگە سوزىلدى. اتالعان كۋرس بارىسىندا «قابانباي», «قوبىلاندى», «الپامىس» اتتى ءۇش توپقا بولىنگەن 60-قا جۋىق بالا «قازاق تاريحى مەن داستۇرلەرى», «ماقال ماتەلدەردەگى ۇلتتىق تاربيە», «جىگىتتىڭ ءۇش جۇرتى» سىندى تەوريالىق جانە پراكتيكالىق ساباقتارعا قاتىستى.
تەوريالىق ساباقتاردان سوڭ, جاسوسپىرىمدەرگە قولعا سۋ قۇيۋ, مال سويۋ, جىلىكتەۋ, تاباق تارتۋ, ساماۋرىن قايناتۋ, اتقا ءمىنۋ, ساداق اتۋ سىندى پراكتيكالىق ءداستۇرلى داعدىلارعا ساي ساباقتار وتكىزىلدى. مۇنداي اسەرلى ارەكەتتەردەن كەيىن بالالارعا كيىز ءۇيدىڭ ىشىنە كينوتەاتر قۇرىلىپ, رۋحاني تاربيەلىك ماڭىزى بار فيلمدەر كورسەتىلدى.
تەوريا مەن تاجىريبەنى ۇشتاستىرعان شارانى قورىتىندىلاي كەلگەندە, كۋرسقا قاتىسقان بالالار مەن اتا-انالار ريزاشىلىعىن ءبىلدىرىپ, «كەمەل جىگىت – كۇيەۋ بالا» اتتى ۇلتتىق زياتكەرلىك كۋرسى جالعاسىن تابۋىن ءوتىندى.
اتالعان شارادا ءاربىر بالا رۋحاني ازىققا كەنەلىپ, ۇلتقا, تۋعان جەرگە, مادەنيەتىمىز بەن ادەبيەتىمىزگە, تاعىلىمدى تاريحىمىزعا دەگەن قۇرمەتىن ارتتىرعانىنا سەنىمىمىز مول.
