فوتو: ءماجىلىس
مەملەكەت باسشىسى قاسىم-جومارت توقاەۆ ءۇش اۋىسىمدا وقيتىن جانە اپاتتى جاعدايداعى مەكتەپتەر ماسەلەسىن شەشۋ ءۇشىن «جايلى مەكتەپ» ۇلتتىق جوباسىن قابىلداۋدى تاپسىرعان بولاتىن. ونىڭ اياسىندا تۇركىستان وبلىسىندا 49 مىڭ وقۋشىعا ارنالعان 63 مەكتەپ سالۋ جوسپارلانعان. تۇركىستان قالاسىنداعى «جاڭا قالا» شاعىن اۋدانىندا 2 مىڭ ورىندىق زاماناۋي مەكتەپتىڭ قۇرىلىسى وتكەن جىلدىڭ ماۋسىم ايىندا باستالعان ەدى. جوبانىڭ قۇنى 8 ملرد تەڭگە, ال مەكتەپتىڭ جالپى اۋدانى 20 مىڭ شارشى مەتردى قۇرايدى. ءبىلىم ورداسىن جىل سوڭىنا دەيىن پايدالانۋعا بەرۋ كوزدەلىپ وتىر.
ماجىلىسمەن ەرلان ابديەۆ اتالعان نىسان «اماNات» پارتياسىنىڭ تۇركىستان وبلىستىق سايلاۋالدى باعدارلاماسىن جۇزەگە اسىرۋ جونىندەگى جول كارتاسىنا ەنگىزىلگەنىن اتاپ ءوتتى.
– ءبىلىم وشاعىنىڭ قۇرىلىسى كەستەگە ساي قارقىندى ءجۇرىپ جاتىر. دەگەنمەن اتى «جايلى مەكتەپ» بولعاندىقتان, ول بارلىق جاعىنان جايلى, قولايلى بولعانى دۇرىس. مەن باستاپقى جوبادا ەكى ليفت بولعانىن بايقادىم, بىراق تاپسىرىس بەرۋشى ونى قايتا تۇزەتىپ, بىرەۋىن قالدىرىپتى. 2000 بالاعا ءبىر عانا ءليفتىنىڭ بولۋى اقىلعا سىيمايدى. وسى جايتتى قايتا قالپىنا كەلتىرۋدى ۇسىنامىن. ودان بولەك مۇگەدەكتىگى بار ادامدارعا ارنالعان مەحانيكالىق ساتىنى پاندۋسقا اينالدىرعان ءجون. ويتكەنى كوپ جاعدايدا مەحانيكالىق ساتى تەز بۇزىلادى جانە ونى ۇنەمى ءبىر مامان قاداعالاپ وتىرۋى كەرەك, – دەدى دەپۋتات.
قۇرىلىس جۇمىستارىنىڭ بارىسى تۋرالى «اماNات» پارتياسى تۇركىستان وبلىستىق فيليالىنىڭ توراعاسى التىنسارى ۇمبەتاليەۆ پەن «كاراتاس ماينينگ» جشس مەردىگەر كومپانيا وكىلدەرى باياندادى.
دەپۋتات جاڭا مەكتەپ قۇرىلىسىنىڭ اياقتالۋىن اسىعا كۇتىپ جۇرگەن جەرگىلىكتى تۇرعىندارمەن دە تىلدەستى.
– جاڭا مەكتەپتىڭ قۇرىلىسىن كورىپ, بالالارىمىزدىڭ بولاشاعى ءۇشىن قۋانىپ وتىرمىز. سەبەبى بۇل جاڭا اۋدان بولعاندىقتان ازىرگە بالالارىمىز باسقا جاققا قاتىناۋعا ءماجبۇر. وسى مەكتەپتە بالالارىمىز ساپالى ءبىلىم الىپ, جارقىن بولاشاققا جول اشادى دەپ سەنەمىز, – دەيدى جەرگىلىكتى تۇرعىن ايگۇل احمەتوۆا.
