فابريكادا الەمدىك وندىرىستەگى ەڭ وزىق قاۋىپسىزدىك جانە تيىمدىلىك ستاندارتتارىن بەرىك ۇستانادى. بالكىم, سونىڭ ارقاسى بۇگىندە الەمدەگى ەڭ مىقتى 10 بالمۇزداق ءوندىرۋشى قاتارىنا كىرىپ وتىر. كاسىپورىندا ىلە اۋدانىنا قاراستى 12 اۋىلدان 5 000-عا جۋىق ادام ەڭبەك ەتەدى.
«شين-لاين» شىعاراتىن «بومبا» برەندى مەن «ميشكا نا پوليۋسە» ساپا بويىنشا تمد ەلدەرى اراسىندا الدىڭعى قاتاردا. جالپى, كومپانيا جەلىسىندە جۇزدەن اسا بالمۇزداق ءتۇرى بار. شىعىس كولوريتى بار العاشقى پرەميۋم-برەند – «Bahroma» دا ءوز تۇتىنۋشىلارىن تاپقان. ال كونديتەرلىك ونىمدەر مەن بالمۇزداق سەگمەنتىندە «زولوتايا كوللەكتسيا» جەلىسىنە جاتاتىن «گۋلليۆەر», «لەسنايا بەلوچكا», «كليۋچيك بۋراتينو», «پتيچكا» جانە «كراسنىي ماك» بالمۇزداقتارى قاشاندا جوعارى سۇرانىسقا يە.
كاسىپورىن تاۋلىگىنە 350 توننا ءونىم شىعارادى. جۇك اينالىمى 50 مىڭ پاللەتتەن اساتىن جانە 30 گرادۋسقا دەيىن اۆتوماتتى تەمپەراتۋرا رەجىمى بار تولىقتاي اۆتوماتتاندىرىلعان قويمالار تەحنولوگياسى ەنگىزىلگەن. بۇل قويمالاردا بارلىق جۇمىستى روبوتتار جاسايدى.
وزىق ەۋروپالىق جانە ازيالىق تەحنولوگتەرمەن ىنتىماقتاستىقتا دايىندالعان جوبا اياسىندا بالمۇزداق ءوندىرىسىنىڭ ءورىسى كەڭەيىپ كەلەدى. جۋىردا كومپانيا ساۋد ارابياسىنىڭ «Al-alameya Group» كومپانياسىمەن سول ەلدە بالمۇزداق ءوندىرۋ زاۋىتىن سالۋدى قامتيتىن ىنتىماقتاستىق تۋرالى كەلىسىمگە قول قويدى. ءىس-شاراعا قاتىسقان وبلىس اكىمى مارات سۇلتانعازيەۆ وسى سەرىكتەستىكتىڭ ستراتەگيالىق ماڭىزدىلىعىنا توقتالىپ, ونىڭ ءساتتى جۇزەگە اساتىنىنا سەنىم ءبىلدىردى.
ء«بىز قازاقستاندىق سەرىكتەستەرمەن ىنتىماقتاسۋعا قۋانىشتىمىز. تاڭداۋلى قازاق سۇتىنەن جاسالعان بالمۇزداق تۇتىنۋشىلاردىڭ كوڭىلىنەن شىعاتىنىنا سەنىمدىمىز», دەدى «Al-alameya Group» كومپانياسىنىڭ يەسى شاۋكي ابدۋلساتار ابدۋ سىدىق.
وسى ىنتىماقتاستىق اياسىندا جاسالعان بالمۇزداقتىڭ العاشقى پارتياسى كەلەسى جىلى ساۋد ارابياسىنىڭ دۇكەن سورەلەرىنە شىعارىلادى دەپ بولجانىپ وتىر.
الماتى وبلىسى
