فوتو: primeminister.kz
ايماق سۋ تاسقىنىنان ەڭ كوپ زارداپ شەككەندەردىڭ ءبىرى سانالادى, 1020 ءۇي مەن ساياجاي قۇرىلىسى اپاتتى دەپ تانىلعان.
ء«بىزدىڭ الدىمىزدا 502 ءۇي سالۋ, 518 ءۇي مەن پاتەر ساتىپ الۋ مىندەتى تۇر. بۇگىنگى تاڭدا 475 ءۇي مەن پاتەر ساتىپ الىندى, جۇمىستار 91,7%-عا ورىندالدى. تامىز ايىندا 400-دەن استام ءۇيدى كەزەڭ-كەزەڭىمەن تاپسىرۋ جوسپارلانىپ وتىر. قۇرىلىستا قولدانىلاتىن بارلىق ماتەريال اقتوبە وبلىسىندا شىعارىلعانىن اتاپ وتكىم كەلەدى. قۇرىلىس ماتەريالدارى جەتكىلىكتى, تاپشىلىق جوق», دەدى ءوڭىر باسشىسى اسحات شاحاروۆ.
بۇگىندە تەمىر اۋدانىنىڭ قۇمساي اۋلىندا 21 ءۇيدىڭ ارلەۋ جۇمىستارى جۇرگىزىلىپ, ينجەنەرلىك ينفراقۇرىلىم تارتىلىپ جاتىر. قۇرىلىسقا «BI Group» كومپانياسى قاراجات ءبولدى.
مۇعالجار اۋدانىنىڭ جاعابۇلاق جانە بىرلىك اۋىلدارىندا «BI Group» كومپانياسى ەسەبىنەن سالىنعان 14 ءۇيدى پايدالانۋعا بەرۋگە دايىنداپ جاتىر. مەردىگەرلەر ۋچاسكەلەرگە ينجەنەرلىك جەلىلەردى تارتۋ جۇمىستارىمەن اينالىسىپ جاتىر. جەرگىلىكتى تۇرعىنداردىڭ ءوتىنىشى بويىنشا بۇل اۋىلداردا فەلدشەرلىك-اكۋشەرلىك پۋنكت پەن بالاباقشا قۇرىلىسى باستالىپ كەتتى.
اۋقىمدى قۇرىلىس ويىل اۋدانىندا جۇرگىزىلىپ جاتىر. «قامقور-اقتوبە 2024» قورى قاراتال اۋلىندا 128 ءۇي جانە ويىل اۋلىندا تاعى 21 ءۇي سالۋ جوباسىن قارجىلاندىرعان. سونداي-اق قاراتال اۋلىندا بوگەت سالىنىپ جاتىر.
قوبدا اۋدانىنىڭ قوبدا اۋلىندا 130 وتباسى جاڭا تۇرعىن ۇيگە كوشەدى. قازىر مۇندا 10 مەردىگەر ۇيىم جۇمىس ىستەپ جاتىر. بارلىق 130 ءۇيدىڭ قابىرعالارى قالانىپ, شاتىرلارى جابىلىپ, ىشكى قۇرىلىس-مونتاج جۇمىستارى جۇرگىزىلىپ جاتىر. اۋدانعا بولات وتەمۇراتوۆ قورى قارجىلاي كومەك كورسەتتى. جىل سايىن اۋىلدى سۋ باسۋىنا جول بەرمەۋ ماقساتىندا جەرگىلىكتى بيلىك وزەن بويىنداعى قورعانىس بوگەتتەرىن كوتەرەدى.
ىرعىز اۋدانىندا «قامقور-اقتوبە 2024» قورى ەسەبىنەن ىرعىز اۋلىندا 51 ءۇي جانە نۇرا اۋلىندا تاعى 63 ءۇي سالىنىپ جاتىر.
اقتوبە وبلىسىندا بارلىعى 50-دەن استام مەردىگەر مەكەمە باسپانالاردى قالپىنا كەلتىرۋ جۇمىستارىنا جۇمىلدىرىلدى. قارقىندى ارتتىرۋ ءۇشىن ۆيتسە-پرەمەر ويىل جانە ىرعىز اۋداندارىنا جۇمىس كۇشىن جانە قوسىمشا تەحنيكا تارتۋدى تاپسىردى.
«ۇيلەردىڭ 95%-ى تامىز ايىنىڭ سوڭىنا دەيىن تاپسىرىلادى. 15 قىركۇيەككە دەيىن ءبىز سۋ تاسقىنىنان زارداپ شەككەندەردىڭ بارلىعىن باسپانامەن قامتۋ مىندەتىن قويدىق. قالعان 5%-ى ىرعىز اۋدانى, ونىڭ ىشىندە نۇرا اۋلىنا قاتىستى. وندا قۇرىلىس جۇمىستارى سۋ دەڭگەيىنىڭ جوعارى بولۋىنا بايلانىستى ءبىر ايدان كەيىن باستالدى. مەن قۇرىلىس بريگادالارىنىڭ سانىن كوبەيتۋ تۋرالى تاپسىرما بەردىم. سونىمەن قاتار زارداپ شەككەن التى اۋداندا جولدار, ينجەنەرلىك ينفراقۇرىلىم قالپىنا كەلتىرىلەدى. ىرعىز اۋدانىندا اۋىزسۋ جانە ەلەكترمەن قامتاماسىز ەتۋ ماسەلەسى بار, ءبىر اي ىشىندە اكىمدىك بۇل ماسەلەنى شەشۋگە ءتيىس», دەدى قانات بوزىمباەۆ.
انىقتاما: اقتوبە وبلىسىندا 4 521 وتباسى جالپى سوماسى 1,6 ملرد تەڭگەگە 100 ايلىق ەسەپتىك كورسەتكىش مولشەرىندە بىرجولعى الەۋمەتتىك كومەك الدى. 4 083 ءۇيدىڭ ماتەريالدىق مۇلكىن وتەۋ بويىنشا 1,4 ملرد تەڭگە سوماسىنا تولەم بەرىلدى.
