فوتو: instagram.com/mfa_kz/
جيىندا ورتالىق ازيانىڭ سىرتقى ساياسي ۆەدومستۆولارىنىڭ باسشىلارى التىنشى كونسۋلتاتيۆتىك كەزدەسۋدىڭ كۇن ءتارتىبى مەن قورىتىندى قۇجاتتارىنىڭ جوبالارىن قارادى.
كەڭەستىڭ اشىلۋ سالتاناتىندا ءسوز سويلەگەن قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ الدىمەن ارىپتەستەرىنە كەڭەسكە قاتىسۋعا شاقىرۋىن قابىلداعانى ءۇشىن ريزاشىلىعىن ءبىلدىردى.
– بۇگىنگى كەزدەسۋ ءبىزدىڭ ورتاق قولداۋىمىزدى جانە بەسجاقتى ىنتىماقتاستىقتى ودان ءارى نىعايتاتىن مىندەتتەردى ايعاقتايدى. ءبىز توراعالىق شەڭبەرىندە اتقارىلعان بىرلەسكەن جۇمىستى قورىتىندىلايمىز, سونداي-اق وڭىرلىك جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماسۋىمىز كەرەك. بۇل كەزدەسۋدىڭ ناتيجەلى بولاتىنىنا جانە ورتالىق ازيا ەلدەرى كوشباسشىلارىنىڭ ءسامميتى تابىستى وتەتىنىنە سەنىمدىمىن, – دەدى مۇرات نۇرتىلەۋ.
سونداي-اق ول ءبىزدىڭ كوشباسشىلارىمىزدىڭ ساياسي ەركى مەن دانالىعىنىڭ ارقاسىندا ايماقتا سەنىم احۋالى ورناعانىن اتاپ ءوتتى.
– جىل سايىن ءوزارا ءتيىمدى جان-جاقتى ىنتىماقتاستىقتى تەرەڭدەتۋ ءۇشىن جوسپارلى جاعداي جاسالىپ جاتىر. استانادا ورتالىق ازيا مەملەكەتتەرى باسشىلارىنىڭ العاشقى كونسۋلتاتيۆتىك كەزدەسۋى وتكەن ساتتەن باستاپ ەلەۋلى پروگرەسكە قول جەتكىزدىك, – دەگەن ەلىمىزدىڭ سىرتقى ىستەر ءمينيسترى ورتالىق ازياداعى ساياسي-ەكونوميكالىق كورسەتكىشتەرگە توقتالدى.
ءمينيستردىڭ ايتۋىنشا, قازىرگى تاڭدا ءوڭىر ەلدەرىنىڭ جيىنتىق ءىجو شامامەن 450 ملرد دوللاردى قۇراپ وتىر. ناتيجەسىندە, ءوزارا ساۋدانىڭ تۇراقتى ءوسۋى قامتاماسىز ەتىلدى. سونىمەن قاتار بۇل كورسەتكىش كەيىنگى 5 جىلدا 80%-عا ءوسىپ, 11 ملرد دوللارعا جەتكەن ەكەن.
– پارلامەنتتەر, قاۋىپسىزدىك كەڭەستەرى, سالالىق ۆەدومستۆولار جەلىسى بويىنشا ءوزارا ءىس-قيمىل تەتىكتەرى, سونداي-اق ايەل كوشباسشىلار ديالوگى ىسكە قوسىلدى. بيىل ءبىز پراكتيكالىق ءوزارا ءىس-قيمىلدىڭ جاڭا ساپالى دەڭگەيىنە جەتتىك. ۇلتتىق ۇيلەستىرۋشىلەر كەڭەسى ءوز قىزمەتىن باستادى. وڭىرلىك كووپەراتسياداعى قول جەتكىزىلگەن پروگرەسس حالىقارالىق قوعامداستىقتا دا ۇلكەن قىزىعۋشىلىق تۋدىردى, سونداي-اق ءبىزدىڭ ەڭ جاقىن ستراتەگيالىق سەرىكتەستەرىمىز قولدايدى, – دەدى م.نۇرتىلەۋ.
مينيستر بۇعان قىتاي, رەسەي, اقش, ءۇندىستان, جاپونيا, كورەيا رەسپۋبليكاسى, گەرمانيا, يتاليا, سونداي-اق بىرقاتار كوپجاقتى قۇرىلىمنىڭ قاتىسۋىمەن «ورتالىق ازيا+» فورماتىندا وتكىزىلگەن كەزدەسۋلەردىڭ قورىتىندىلارى دالەل ەكەنىن اتاپ ءوتتى.
مۇرات نۇرتىلەۋ كەڭەس وتىرىسى بارىسىندا ءبىزدىڭ ەل توراعا رەتىندە كونسۋلتاتيۆتىك كەزدەسۋلەردىڭ الەۋەتىن ودان ءارى نىعايتۋ جۇمىستارىن بەلسەندى اتقارعانىن ايرىقشا ايتىپ ءوتتى.
– قاۋىپسىزدىك كەڭەستەرى حاتشىلارىنىڭ, ەنەرگەتيكا جانە اقپارات مينيسترلەرىنىڭ كەزدەسۋلەرى, سونداي-اق ورتالىق ازيا ەلدەرى تاريحشىلارىنىڭ فورۋمى العاش رەت وتكىزىلدى. وسىعان بايلانىستى قازاقستاندىق باستامالاردى قولداعانى جانە ونەركاسىپ, ەنەرگەتيكا, كولىك جانە لوگيستيكا سالالارىندا بىرقاتار قۇجاتتى دايىنداۋ بويىنشا بىرلەسكەن جەمىستى جۇمىسى ءۇشىن العىس ايتامىن. بۇگىنگى ءسامميتتىڭ قورىتىندىسى بويىنشا مەملەكەت باسشىلارى «ورتالىق ازيا – 2040» وڭىرلىك كووپەراتسياسىن دامىتۋ تۇجىرىمداماسىنا قول قويماق. وسى قۇجاتتاردى ىسكە اسىرۋ ءوزارا ءتيىمدى ارىپتەستىكتى ودان ءارى ۇدەمەلى دامىتۋعا جانە ءبىزدىڭ ءوڭىردىڭ حالىقارالىق سۋبەكتيۆتىلىگىن نىعايتۋعا قىزمەت ەتەتىنىنە سەنىمدىمىن, – دەدى مينيستر ءسوزىن قورىتىندىلاي كەلىپ.
بۇدان باسقا, دەلەگاتتار كەڭەس وتىرىسىندا وڭىرلىك بايلانىستى تەرەڭدەتۋ جانە بەسجاقتى ءوزارا ءىس-قيمىلدى ودان ءارى دامىتۋ كەلەشەگى تۋرالى پىكىر الماسىپ, وڭىرلىك جانە حالىقارالىق كۇن ءتارتىبىنىڭ وزەكتى ماسەلەلەرىن تالقىلادى.
