فوتو: اقوردا
پرەزيدەنت سامميت جۇمىسىنا قاتىسقانى ءۇشىن سەردار بەردىمۇحامەدوۆكە العىس ايتىپ, ونىڭ بۇل ساپارى ەكى ەل اراسىنداعى كوپجاقتى سەرىكتەستىكتى ودان ءارى ىلگەرىلەتۋ تۇرعىسىنان ماڭىزدى ەكەنىن اتاپ ءوتتى.
«قازاق-تۇرىكمەن قارىم-قاتىناسى تابىستى دامىپ كەلەدى. سونداي-اق ستراتەگيالىق ارىپتەستىك سيپاتىنا تولىق ساي. كوپقىرلى مەملەكەتارالىق بايلانىستارىمىزعا قولداۋ كورسەتكەنىڭىز جانە ونى ۇنەمى نىعايتۋعا اتسالىسقانىڭىز ءۇشىن سىزگە ريزاشىلىعىمدى بىلدىرەمىن. بۇعان دەيىن ايتقانىمداي, ەكونوميكالىق ىنتىماقتاستىعىمىزدىڭ دەڭگەيى جوعارى. ۇكىمەتتەر ءوزارا ساۋدا كولەمىن 1 ميلليارد دوللارعا جەتكىزۋ ءۇشىن جۇمىس ىستەپ جاتىر. بۇعان ەلدەرىمىزدىڭ بارلىق مۇمكىندىگى بار. ەنەرگەتيكا, ونەركاسىپ, كولىك, لوگيستيكا جانە باسقا دا سالالارداعى بىرقاتار جوبالار جۇزەگە اسىرۋ ساتىسىندا تۇر. مادەني-گۋمانيتارلىق بايلانىستاردى ارتتىرۋعا دا قولايلى جاعداي جاسالعان», دەدى مەملەكەت باسشىسى.
ءوز كەزەگىندە سەردار بەردىمۇحامەدوۆ قوناقجايلىق تانىتقانى ءۇشىن قاسىم-جومارت توقاەۆقا العىس ايتتى. سونىمەن قاتار ەكى ەل اراسىنداعى ىنتىماقتاستىق قارقىندى دامىپ كەلە جاتقانىنا توقتالدى.
«تۇرىكمەنستان قازاقستانمەن ىنتىماقتاستىققا باسا ءمان بەرەدى. ەلدەرىمىز اراسىندا بەلسەندى ساياسي ديالوگ ورناعان. ساۋدا-ەكونوميكالىق جانە مادەني-گۋمانيتارلىق سالالارداعى بايلانىستار جاندانۋدا. قۇرمەتتى قاسىم-جومارت كەمەل ۇلى, ءسىز بيىل كۇزدە تۇرىكمەنستانعا رەسمي ساپارمەن كەلەسىز دەپ كۇتەمىن. سونداي-اق ماقتىمق ۇلى پىراعىنىڭ 300 جىلدىق مەرەيتويىنا ارنالعان حالىقارالىق فورۋمعا قاتىسۋعا شاقىرامىن», دەدى تۇركىمەنستان پرەزيدەنتى.
كەزدەسۋ بارىسىندا مەملەكەتتەر باسشىلارى ساۋدا-ەكونوميكا, ەنەرگەتيكا, مۇناي-گاز جانە كولىك-لوگيستيكا سالالارىنداعى قازاق-تۇرىكمەن ىنتىماقتاستىعىنىڭ دامۋ پەرسپەكتيۆاسىن تالقىلادى. سونىمەن قاتار مادەني-گۋمانيتارلىق قاتىناستاردى كەڭەيتۋ ماسەلەسىن قاراستىردى.
