فوتو: «بۋراباي» مۇتپ ءباسپاسوز قىزمەتى
ادەتتە تۋريستەردىڭ كوپتەپ كەلۋى جاز ايلارىمەن تۇسپا-تۇس بولادى. اسىرەسە بۋراباي, شورتان, قاتاركول, ۇلكەن شاباقتى كولدەرىنىڭ جاعاسىندا دەمالعانداردىڭ قاراسى قالىڭ. ال سپورتتىق بالىق اۋلاۋعا اۋەستەر جوكەي كولىن جاعالايدى ەكەن.
«پاركتىڭ تۋريستىك جۇكتەمەسى ارتىپ بارادى. دەمالۋشىلار نەگىزىنەن مامىر-قىركۇيەك ايلارى ارالىعىندا, اسىرەسە شىلدەدە كوپ بولادى. ماۋسىمدا ولاردىڭ سانى ءجۇز مىڭنان استى. ۇلتتىق پاركتىڭ بىرەگەي تابيعاتى, ساناتورلىق-كۋرورتتىق مەكەمەلەردىڭ, وڭالتۋ جانە ساۋىقتىرۋ ورتالىقتارىنىڭ الۋان تۇرلىلىگى تۋريستەردىڭ جىل بويى كەلۋىن قامتاماسىز ەتەدى. وسى ورايدا ۇلتتىق پارك ۇجىمى رەكرەاتسيالىق جۇكتەمە تەپە-تەڭدىگىن ساقتاپ, تابيعي كەشەندى قورعاۋ ءۇشىن بارلىق قاجەتتى شارالاردى قابىلداپ جاتقانىن اتاپ وتكىم كەلەدى», دەيدى «بۋراباي» مۇتپ ديرەكتورىنىڭ ورىنباسارى ۆەنەرا نۇعمانوۆا.
جەتى ايدىڭ ىشىندە ساياباق اۋماعىنا كىرگەن كولىك سانى 175 347-گە جەتتى. ءاربىر ءۇشىنشى جولاۋشىلار كولىگى ساياباققا ورتا ەسەپپەن كەمىندە 3 رەت كىرگەن.
ديرەكتور ورىنباسارىنىڭ ايتۋىنشا, كەلۋشىلەر سانىنىڭ ارتۋى ساياباقتىڭ ەكوجۇيەسىنە ايتارلىقتاي اسەر ەتەدى. بۇل, ەڭ الدىمەن, تۇرمىستىق قالدىقتاردىڭ كوبەيۋىنە قاتىستى. جىل باسىنان بەرى ۇلتتىق پارك اۋماعىنان 440 تونناعا جۋىق قوقىس جينالىپ, شىعارىلدى.
«ۇلتتىق پاركتىڭ ەكوجۇيەسىنە تۇسەتىن رەكرەاتسيالىق جۇكتەمە مەن بيوپروتسەستەردىڭ اسەرىن تەرەڭىرەك ءتۇسىنۋ ءۇشىن وتكەن جىلى ءبىزدىڭ عىلىمي قىزمەتكەرلەر قازاقستاننىڭ گەوگرافيا جانە سۋ قاۋىپسىزدىگى ينستيتۋتىنىڭ عالىمدارىمەن بىرلەسىپ, كەشەندى عىلىمي زەرتتەۋلەردى قولعا الدى. زەرتتەۋ گيدرولوگيا, ورمان شارۋاشىلىعى, رەكرەاتسيا, تەريولوگيا, كليماتولوگيا سىندى باعىتتار بويىنشا جۇرگىزىلەدى. ورمان شارۋاشىلىعىنداعى قاتەرلەر زەرتتەلەدى. ءبىز سۋ جيناۋ باسسەيندەرىن قايتا قۇرۋ, ايىرتۇياقتى جانۋارلار سانىن رەتتەۋ بويىنشا ۇسىنىستار كۇتەمىز. تۋريستىك جۇكتەمەنىڭ ارتۋى ەكوجۇيەگە قانشالىقتى اسەر ەتەتىنىن تۇسىنگىمىز كەلەدى. تولىق دياگنوستيكا ۇلتتىق پاركتى ودان ءارى دامىتۋعا قاتىستى عىلىمي نەگىزدەلگەن شەشىمدەر قابىلداۋعا مۇمكىندىك بەرەدى», دەدى ۆ.نۇعمانوۆا.
تۋريستەر اعىنىنىڭ ارتۋى جەرگىلىكتى ينفراقۇرىلىمدى دامىتۋ قاجەتتىلىگىن دە تۋعىزادى. دەمالۋعا جايلى جاعداي جاساۋ ءۇشىن ۇلتتىق پارك قىزمەتكەرلەرى كولدەردىڭ جاعالاۋلارى مەن باسقا دا تۋريستەر ءجيى باراتىن جەرلەردى اباتتاندىرىپ وتىرادى.
