بۇل باسسۇيەكتى 1908 جىلى بەلگىلى ولكەتانۋشىلار, اعايىندى ۆيكتور مەن الەكسەي بەلوسليۋدوۆتار ەرتىستىڭ وڭ جاعالاۋىنداعى پودپۋسكنوە ەلدى مەكەنىنىڭ ماڭايىنان تاپقان. سول جىلدارى ۆيكتور مەن الەكسەي مۋزەي يگىلىگى ءۇشىن ايانباي ەڭبەك ەتىپ, قورعا كوپتەگەن قۇندى جادىگەردى سىيعا تارتادى. سونىڭ بىرەگەيى وسى باسسۇيەك ەكەنىن مۋزەي ماماندارى دا ەرەكشە نازار سالا ايتادى. بۇگىنگى كۇنى مۋزەي قورىندا ساقتالعان 137 مىڭنان استام جادىگەردىڭ ىشىندەگى وسى ءبىر ەلەۋلى دۇنيەنىڭ ازۋ تىستەرىن عالىمدار ارحەولوگيا جانە ەتنولوگيا ماگيسترى, نازارباەۆ ۋنيۆەرسيتەتى قازاق ءتىلى جانە تۇركىتانۋ كافەدراسىنىڭ وقىتۋشىسى ايدىن ءجۇنىسحانوۆتىڭ باستاماسىمەن 2020 جىلى راديوكومىرتەكتىك ساراپتاماعا جىبەرگەن.
سەمەي قالاسىنىڭ وبلىستىق تاريحي-ولكەتانۋ مۋزەيىنىڭ ديرەكتورى قايرات سابىرباي: «2023 جىلى اتالعان باسسۇيەكتىڭ عىلىمي انتروپولوگيالىق مۇسىندىك رەكونسترۋكتسياسى جاسالدى. بۇگىنگى كۇندە قىزىعۋشىلىق تانىتقان مۋزەي قوناقتارى وسى اۋماقتا تىرلىك كەشكەن تۇرعىنداردىڭ بەلگىلى ءبىر كەزەڭدەگى كەلبەتىن تاماشالاي الادى», دەيدى.
ليتۆا ەلىنىڭ استاناسى ۆيلنيۋس قالاسىنداعى فيزيكا-تەحنولوگيا عىلىمدار ورتالىعىنىڭ مەملەكەتتىك عىلىمي زەرتتەۋ ينستيتۋتىندا يادرولىق زەرتتەۋلەر ءبولىمىنىڭ اعا عىلىمي قىزمەتكەرى, زەرتحانا مەڭگەرۋشىسى جيلۆيناس ەجەرينسكيستىڭ جەتەكشىلىگىمەن زەرتتەۋ جۇرگىزىلگەن. ناتيجەسىنە, سۇيەنسەك, انتروپولوگيالىق ماتەريال جوشى ۇلىسىنىڭ ۇستەمدىك قۇرعان كەزىنە سايكەس كەلەتىنى انىقتالدى. ماتەريال ءحىىى عاسىردىڭ سوڭى ءXىV عاسىردىڭ باسىنا جاتادى. وسىدان-اق ءبىز ءسوز ەتكەن انتروپولوگيالىق نىساندى باعزى زاماندا عۇمىر كەشكەن بابالاردىڭ باسسۇيەگى دەپ توپشىلاۋعا بولادى. بىزدىڭشە, بۇل باسسۇيەكتى ابدەن زەرتتەپ بولعان سوڭ كونە قورىمنىڭ بىرىنە جەرلەگەن دۇرىس.
اباي وبلىسى
