وسى ورايدا اتىراۋ وبلىسىندا بىرنەشە سپورت الاڭىن پايدالانۋعا بەرۋ كوزدەلىپ وتىر. اتىراۋ قالالىق قۇرىلىس ءبولىمى جوبالاۋ-سمەتالىق قۇجاتتاما سەكتورىنىڭ مەڭگەرۋشىسى ارمان ابدولوۆتىڭ ايتۋىنشا, دامبى, تالقايراڭ, المالى ەلدى مەكەندەرىندە سپورت جانە ويىن الاڭدارى پايدالانۋعا بەرىلگەن. ەندى گەولوگ, بالاۋسا, ەلشىبەك, سارىقامىس, بايتاق, وركەن, جەرۇيىق, بىرلىك, سارىوزەك, كوكارنا شاعىن اۋداندارىندا سپورت جانە ويىن الاڭدارىن سالۋ جوسپارلانىپتى. بۇل نىسانداردىڭ قۇرىلىسى جاقىندا باستالادى.
«قازىر اتالعان نىسانداردىڭ جوبالاۋ-سمەتالىق قۇجاتتاماسى جاسالدى. كونكۋرس وتكىزىلىپ, قۇرىلىستى جۇرگىزەتىن بەس مەردىگەر مەكەمە انىقتالدى. اتالعان شاعىن اۋدانداردا فۋتبول, باسكەتبول, ۆوركاۋت الاڭدارى سالىنادى. ءۆانداليزمنىڭ الدىن الۋ ءۇشىن قۇرىلىسقا جوعارى ساپالى ماتەريالدار پايدالانىلادى. جوسپارعا سايكەس بۇل الاڭدار قازاندا قولدانىسقا بەرىلەدى», دەدى ا.ابدولوۆ.
ءوڭىردىڭ بىرنەشە اۋدانىندا وسىنداي نىسانداردىڭ قۇرىلىسى قولعا الىنعان. ماسەلەن, يندەر اۋداندىق قۇرىلىس ءبولىمىنىڭ باسشىسى دارىن ءىلياسوۆتىڭ دەرەگىنە سۇيەنسەك, جاڭادان 6 سپورت الاڭىنىڭ قۇرىلىسى باستالدى. ونى جىل سوڭىنا دەيىن پايدالانۋعا بەرۋ جوسپارلانىپ وتىر.
«يندەربور كەنتىندەگى كوكتەم جانە م.اۋەزوۆ اتىنداعى ورتا مەكتەپتىڭ اۋلاسىندا سپورت الاڭدارى سالىنىپ جاتىر. جوبا بويىنشا وندا شاعىن فۋتبول, باسكەتبول جانە ۆولەيبول الاڭدارى, ۆوركاۋت پەن جاتتىعۋ الاڭى قاراستىرىلدى. الاڭدارعا جارىق جۇيەسى جۇرگىزىلىپ, ارنايى بەينەباقىلاۋ كامەرالارى ورناتىلادى. مۇنداي الاڭداردىڭ قۇرىلىسى ەلتاي, كوكتوعاي, اققالا, قۇرىلىس اۋىلدارىندا سالىنىپ جاتىر», دەيدى د.يلياسوۆ.
ال قىزىلقوعا اۋدانىنىڭ اكىمى قانات ءازمۇحانوۆتىڭ ايتۋىنشا, كەيىنگى جىلدارى بۇقارالىق سپورتتى دامىتۋ باعىتىندا جۇيەلى جۇمىستار جۇرگىزىلىپ كەلەدى. بيىل بۇل اۋداندا 11 سپورت الاڭى پايدالانۋعا بەرىلەدى. ماسەلەن, قاراباۋ, كوزدىعارا, ويىل, جامبىل, تاسشاعىل, تايسويعان اۋىلدارىندا سالىنىپ جاتقان سپورت الاڭدارىنىڭ قۇرىلىسى جىل سوڭىنا دەيىن اياقتالادى. ال ميالى اۋلىندا – 3, ساعىز اۋىلىندا 2 جاڭا سپورت الاڭىنىڭ قۇرىلىسى باستالادى.
«اۋداندا كەيىنگى جىلدارى بۇقارالىق سپورتتى دامىتۋ باعىتىندا جۇيەلى جۇمىستار جۇرگىزىلىپ, جاڭا سپورت الاڭدارى كوپتەپ سالۋدى قولعا الدىق. سپورت الاڭدارىنىڭ جوباسىندا فۋتبول, جاتتىعۋ الاڭدارى, بالالار ويىن الاڭى, دەمالىس ورىندارىن سالۋ قارالعان», دەيدى ق.ءازمۇحانوۆ.
ماقات اۋداندىق قۇرىلىس ءبولىمىنىڭ باسشىسى ابىلقايىر قادىروۆتىڭ پىكىرىنشە, جاس بۋىننىڭ دەنساۋلىعىن جاقسارتۋعا سەپتىگى تيەتىن الاڭداردى كوبەيتۋ جوسپارلانىپتى. بيىل بايگەتوبە جانە №402 تەمىرجول بەكەتىندە ويىن الاڭدارى اشىلىپتى. ەندى تاعى دا 8 ويىن الاڭى پايدالانۋعا بەرىلەدى.
ونىڭ مالىمەتىنشە, قازىر دوسسور كەنتىندە بالالارعا ارنالعان ويىن جانە امبەباپ سپورتتىق ويىندار الاڭدارى سالىنىپ جاتىر. سونداي-اق بايگەتوبە اۋلىندا 4 ويىن الاڭى, ماقات كەنتىندە ويىن جانە سپورت الاڭىنىڭ قۇرىلىسى قولعا الىنىپ وتىر. بۇل الاڭدار جوسپارعا سايكەس تامىز ايىنىڭ اياعىندا قولدانىسقا بەرىلەدى. ال ماقات كەنتىندە ءۇش ويىن جانە سپورت الاڭىن سالۋ ءۇشىن مەردىگەر مەكەمەلەر انىقتالعان. قازىر كەلىسىمشارت جاسالىپ جاتىر. سونداي-اق تاعى ەكى الاڭ سالۋ ماقساتىندا كونكۋرس جاريالاندى.
«سپورت الاڭدارىنىڭ جوباسى ءارتۇرلى نۇسقادا جاسالدى. نەگىزىنەن بالالارعا ارنالعان ويىن, سپورتپەن شۇعىلدانۋعا ارنالعان قۇرىلعىلارمەن جابدىقتالعان الاڭدار بولادى. فۋتبول الاڭدارى مەن دەمالىس ورىندارى بار. كەيبىر ۇلكەن الاڭداردا كەلۋشىلەرگە ارنالعان اۆتوتۇراق قاراستىرىلدى», دەپ حابارلادى ءا.قادىروۆ.
يساتاي اۋدانىنداعى ح.ەرعاليەۆ اۋلىندا 50 ورىندىق سپورت كەشەنى سالىنىپ جاتىر. قامىسقالا اۋىلدىق وكرۋگىنىڭ اكىمى رافيعات تاجيدەنوۆانىڭ دەرەگىنە قاراعاندا, كەشەننىڭ اۋماعى 800 مەتردەن اسادى. 4 مىڭنان اسا تۇرعىن تىركەلگەن اۋىل بالالارى اتالعان نىساندا سپورتتىڭ بىرنەشە تۇرىمەن شۇعىلدانۋعا مۇمكىندىك بار. ويتكەنى نىساندا بالالار قىزىعاتىن شاعىن فۋتبول, ۆولەيبول, بوكس, كۇرەس جانە جاتتىعۋ زالى بولادى. سونداي-اق كەشەن اۋلاسىندا باسكەتبول الاڭى قاراستىرىلىپ وتىر.
«جوبانىڭ قۇنى – 395 ملن 500 مىڭ تەڭگە. اۋىل تۇرعىندارى, اسىرەسە بالالار مەن جاستار وسىنداي دەنەشىنىقتىرۋ-ساۋىقتىرۋ كەشەنىن كوپتەن كۇتىپ ءجۇر. بۇل كەشەن اۋىل تۇرعىندارىنىڭ سۇرانىسىمەن سالىنىپ جاتىر. ەندى تۇرعىنداردىڭ سالاماتتى ءومىر سالتىن ۇستانۋىنا زور مۇمكىندىك جاسالعالى وتىر», دەدى ر.تاجيدەنوۆا.
دەگەنمەن كەشەن قۇرىلىسىندا ازداعان كەشەۋىلدەۋ بار. ويتكەنى كوكتەمدە تابيعي سيپاتتاعى توتەنشە جاعدايدىڭ جاريالانۋىنا بايلانىستى جۇمىس توقتاپ قالعان. قازىر قۇرىلىس جۇمىسى قايتا قارقىن الدى. مەردىگەرلىككە تاڭدالعان HCK MBM Construction جشس اتالعان نىساننىڭ قۇرىلىسىن قىركۇيەك ايىندا اياقتاۋدى جوسپارلاپ وتىر.
اتىراۋ وبلىسى
