اسكەري جيىنعا اباي, پاۆلودار جانە شىعىس قازاقستان وبلىستارىنان ازاماتتار قاتىسىپ, جاۋىنگەرلىك دايارلىقتارىن پىسىقتادى. ولار ءبىر اي بويى اسكەري ماماندىقتىڭ قىر-سىرىنا تاعى ءبىر مارتە ءۇڭىلىپ, وقۋ-جاتتىعۋ جيىنىن وتكىزەدى. ەل قورعاۋدا اۋە قورعانىسىنا قارسى ارەكەت ەتەتىن زەنيتتىك ديۆيزيوننىڭ الاتىن ورنى ەرەكشە. اسكەري مىندەتتىلەر جيىنىنا قاتىسۋشىلار وسى زەنيتتىك ديۆيزيونعا ءتۇسىپ, بىلىمدەرى مەن اسكەري شەبەرلىكتەرىن شىڭدايدى. تەوريالىق ءبىلىم الۋمەن قاتار تاجىريبە جۇزىندە, ياعني اسكەري تەحنيكانى ءىس-جۇزىندە اتۋ جاتتىعۋىن قولعا الادى.
اباي گارنيزونىنا قاراستى 35411 اسكەري ءبولىمىنىڭ زەنيتتىك ديۆيزيونى قۋاتتى قارۋ-جاراق پەن ۇرىس تەحنيكاسىنا يە اسكەري قۇرىلىمداردىڭ ءبىرى. وسى اپتادا اسكەري مىندەتتىلەردىڭ جيىنىنا قاتىسىپ جاتقان جۇزگە جۋىق جاۋىنگەر وسى قۇرىلىم قاتارىندا بولىپ, اتۋ جاتتىعۋلارىنا قاتىستى. اسكەري مىندەتتىلەر ءۇشىن زۋ-23-2 جانە زسۋ-23-4 زەنيتتىك قوندىرعىلاردان اتۋ العاشقى تاجىريبە بولدى. تاجىريبەلىك جاتتىعۋدا تاكتيكالىق ءىس-قيمىلدارعا, قارۋدى شەبەر جانە ءتيىمدى پايدالانا بىلۋگە, بۇعان قوسا قاۋىپسىزدىك شارالارىن قاتاڭ ساقتاۋعا باسا نازار اۋدارىلدى.
اياگوز قالاسىنان شاقىرىلعان اسىل بولاتحان ۇلى اسكەري مىندەتتىلەردىڭ جيىنىنا العاش رەت قاتىسىپ وتىر. اتالعان جيىنعا ءوز ەركىمەن كەلىپ, جاۋاپكەرشىلىك جۇگىن تەرەڭ سەزىنگەن ول وسىنداي شارالاردىڭ بەرەرى مول ەكەنىنە توقتالدى.
«جيىننىڭ جوعارى دەڭگەيدە ۇيىمداستىرىلعانى بايقالىپ تۇر. زۋ-23-2 زەنيتتىك قۇرىلعىسى ارقىلى اتىپ كوردىم. زەنيتتىك قۇرىلعى – اۋە جانە جەردەگى نىسانالاردىڭ كوزىن جويۋعا ارنالعان قۋاتتى قارۋ. اسكەري مىندەت جۇكتەلگەن ادامدار وسىنداي جيىنعا قاتىسا وتىرىپ, وزدەرىنىڭ بىلىكتىلىگىن كوتەرەرى انىق. اسكەري پوليگونعا بەيبىت كۇندەردە عانا جينالايىق», دەيدى اسىل بولاتحان ۇلى.
ديۆيزيون كومانديرى, پودپولكوۆنيك تيمۋر تۋحمەتوۆتىڭ ايتۋىنا قاراعاندا, جاتتىعۋ بارىسىندا اۋە شابۋىلىنا قارسى قورعانىس بولىمشەسىنىڭ زەنيتشى-اتقىشتارى زۋ-23-2 قوندىرعىلارىنان شارتتى قارسىلاستىڭ اۋە نىسانالارىن ىزدەۋ جانە ونى زاقىمداۋ, جويۋ بويىنشا جاۋىنگەرلىك اتىس مىندەتتەرىن جوسپارعا ساي ورىنداعان. زەنيتتىك زىمىران كەشەندەرى شاعىن كولەمدى نىسانداردى انىقتاۋ جانە ولاردى تانۋ بويىنشا العا قويىلعان جاتتىعۋلاردى جۇزەگە اسىرعان. سونىمەن بىرگە ماڭىزدى نىسانداردى اۋە قارسىلاستارىنىڭ سوققىلارىنان قورعاۋ بويىنشا بىرنەشە جاتتىعۋ ءوز مارەسىنە جەتكەن.
زۋ-23-2 زەنيتتىك قوندىرعىسى تومەن بيىكتىكتى اۋە نىسانالارىمەن – اۋە شابۋىلىنىڭ زاماناۋي قۇرالدارىمەن كۇرەس جۇرگىزۋگە, سونىڭ ىشىندە ۇشاقتارمەن, تىكۇشاقتارمەن, قاناتتى زىمىراندارمەن جانە قاشىقتىقتان باسقارىلاتىن ۇشاتىن اپپاراتتارمەن ۇرىس جۇرگىزۋگە قولايلى. وزدىگىنەن جۇرەتىن زەنيتتىك قوندىرعى زسۋ-23-4 – زەنيتتىك ارتيللەريانىڭ ۇرىس ماشيناسى جالپى كوزدەۋ مەحانيزمدەرى مەن اتىستى باسقارۋ اسپاپتارى بار ءبىر نەمەسە بىرنەشە اۆتوماتتى زەڭبىرەكتەن تۇرادى. وزدىگىنەن جۇرەتىن زەنيتتىك قوندىرعى كوبىنەسە كىشى بيىكتىكتەگى اۋە نىسانالارىن جويۋعا ارنالعان.
سونىمەن قاتار جەر ۇستىندەگى نىسانالاردى جويۋ ءۇشىن دە قولدانىلۋى مۇمكىن. اسكەري تەحنيكا راديولوكاتسيالىق جۇيە, ەسەپتەۋ قۇرالدارى جانە سەزگىشتىگى جوعارى اسپاپتارمەن جابدىقتالعان. بۇل قۇرىلىمدار مەن اسپاپتار 20 شاقىرىمعا دەيىنگى قاشىقتىقتاعى اۋە نىسانالارىن تابۋعا, زەڭبىرەكتەردىڭ اۆتوماتتى كوزدەۋىن ورىنداپ, ءتورت شاقىرىمعا دەيىنگى بيىكتىكتەگى نىسانالار بويىنشا اۋا رايىنىڭ كەز كەلگەن جاعدايلارىندا, ءبىر ورنىندا جانە ءجۇرىپ كەلە جاتىپ پارمەندى اتىستى جۇرگىزۋگە مۇمكىندىك بەرەدى.
جوعارىدا اتالعان اسكەري وقۋ-جاتتىعۋ بارىسىندا جيىنعا قاتىسۋعا نيەت بىلدىرگەن اسكەري مىندەتتەمەلەرى بار ازاماتتار وسى قۇرىلعىلاردىڭ سىرىن ۇعىپ, ءبىلىمىن جەتىلدىرىپ, شىڭدالىپ قايتادى.
اباي وبلىسى
