سەمەي قالاسىندا كەيىنگى جىلدارى «Camca.kz» كومپانياسىنىڭ ونىمدەرىنە سۇرانىس ارتىپ تۇر. 30 ادام قىزمەت ەتەتىن كاسىپورىن ۇلتتىق تاعامداردى ۇسىنۋمەن بىرگە اراب, وزبەك, ۇيعىر حالقىنىڭ سامسالارىن دا ساتادى. جاس كاسىپكەر ايجان بوتباەۆانىڭ بۇل بيزنەسى پاندەميا كەزىندە باستالعان. سول كەزدە جۇكتىلىگى مەن بالا كۇتىمىنە بايلانىستى دەمالىستا بولعان ايجان ءوز قولىنان شىققان تاعامداردى جاقىن-جۋىق, كورشى-قولاڭعا ۇسىنادى.
دايىنداعان ونىمدەرى بىرتىندەپ دۇكەن سورەلەرىنەن ورىن تاپتى. كاسىپپەن كاسىبي تۇردە اينالىسۋعا كۇيەۋى قولداۋ بىلدىرگەن.
«مەن بۇعان دەيىن وسكەمەن قالاسىنداعى تابيعي رەسۋرستار باسقارماسىندا جۇمىس ىستەدىم. كارانتين كەزىندە ازىرلەگەن تاعامدارىمنان ءدام تاتىپ كورگەن كورشىمىز زور العىسىن ءبىلدىردى. قۋانىشىمدى جاسىرا الماي جولداسىممەن بولىسكەن ساتتە, ول دا ماقتاۋ لەبىزىن جەتكىزدى. ءسويتىپ, كۇن ساناپ كاسىپ اشۋ يدەياسىنا ءبىر تابان جاقىنداي تۇستىك», دەيدى ايجان بوتباەۆا.
داۋلەت ەكەۋى ەندى ۇيلەرىنەن تىس جەردە كاسىپ جۇرگىزۋگە كىرىسەدى. ءار ساعات سايىن ساتىپ الۋشىلاردىڭ سانى ءوسىپ, ولاردىڭ جوعارى تالابى مەن تالعامىنان شىعۋ ءۇشىن ءوندىرىس ساپاسىن ءاردايىم نازاردا ۇستايدى. تاعامدار دايىندالاتىن تسەحتا ساپانىڭ اۆتورلىق ستاندارتتارى ساقتالعان. ساپاسىن ۇنەمى جەتىلدىرىپ وتىرۋمەن قاتار وبەكتيۆتى جاعدايلارعا بايلانىستى وزگەرتەتىنىن دە تىلگە تيەك ەتتى. تاعام ازىرلەنەتىن رەتسەپتۋرانى وزگەرتۋمەن بىرگە ەستەتيكانىڭ دا ماڭىزدى ەكەنى راس.
«كۇيەۋىم بيزنەستى قالاي دۇرىس جۇرگىزۋ كەرەگىن ۇنەمى ۇيرەنەدى. پروگرەسسيۆتى ەلەمەنتتەردى ەنگىزۋگە قۇشتار. مىسالى, تسەحتا ءبارى جاپوندىق «كايدزەن» فيلوسوفياسىنا سايكەس ۇيىمداستىرىلعان. بۇل – بيزنەس-ۇدەرىستەردى جاقسارتۋعا, تيىمدىلىكتى ارتتىرۋعا جانە وپەراتسيالاردى ورىنداۋعا كەتەتىن ۋاقىتتى قىسقارتۋعا باعىتتالعان باسقارۋ ءادىسى. قاراپايىم تىلمەن ايتقاندا, ءبارى قاتاڭ تۇردە باقىلاۋعا الىنعان», دەيدى ايجان اسقارقىزى.
قازىر «Camca.kz» كومپانياسى ءوز كليەنتتەرىنىڭ وتىنىشىنە وراي اسسورتيمەنتتى كەڭەيتىپ ۇلگەرگەن. مۇندا ەندى وڭدەلگەن تاعامدار مەن دايىن تاعام تۇرلەرى ۇسىنىلادى. ءدامى ءتىلى ۇيىرەتىن ەت قوسىلعان جانە ءتاتتى پيروگ, سالات, ىستىق ءارى بۋفەت تاعامدارى ساتىپ الۋشىلار كوڭىلىنەن شىعىپ جاتىر. وتكەن جىلدىڭ جەلتوقسان ايىنان باستاپ بالالارعا ارنالعان اس ءمازىرى ءوز ماقساتىنا جەتتى دەۋگە بولادى. بروككولي مەن تاۋىق ەتىنەن جاسالعان كوتلەتتەر قازىردىڭ وزىندە ءتيىمدى باعادا حالىق پايداسىنا جاراپ جاتىر.
كاسىپكەرگە الداعى ۋاقىتتا ءوز ءىسىن ەمىن-ەركىن دوڭگەلەتۋ مەن دامىتۋ ءۇشىن مەملەكەتتىك باعدارلاما ارقىلى 5 ملن تەڭگە كولەمىندە گرانت ءبولىنىپ وتىر. بيزنەستى قولداۋ ماقساتىنداعى قارجىنى يگەرۋدەن بولەك, جاڭا جۇمىس ورىندارىن اشىپ, ساتىلىم اياسىن ۇلكەيتۋ باعدارى كوزدەلىپ وتىرعانىن ايتادى كاسىپكەر.
اباي وبلىسى
