پايدالانۋعا بەرىلگەن نىسان ءىشىن م ۇلىكپەن تولتىرۋ دا – ماڭىزدى مىندەت. قازىر وڭىردەگى وسىناۋ قاجەتتىلىكتى «الاتاۋ پروگرەسس كز» جشس وتەپ وتىر. 2009 جىلى قۇرىلعان كومپانيا وسى ۋاقىتقا دەيىن ءوندىرىستى دامىتۋ جانە وندىرىستىك قۋاتتىلىقتى ارتتىرۋ باعىتىندا اۋقىمدى جۇمىستار اتقاردى. ءوندىرىس اۋماعى 20 مىڭ شارشى مەترگە, ال قۇيىلعان ينۆەستيتسيا كولەمى 4 ملرد تەڭگەگە جەتتى. كاسىپورىن 100-دەن اسا ادامدى جۇمىسپەن قامتىپ وتىر.
گەرمانيا, قىتاي جانە رەسەيدەن جەتكىزىلگەن زاماناۋي تەحنولوگيالارمەن جابدىقتالعان كاسىپورىندا جوعارى ساپالى ستاندارتتارعا ساي جيھازدار وندىرىلەدى. جوبالاۋ جانە ءوندىرۋ كەزەڭدەرىندە جيھازدىڭ ىڭعايلىلىعى مەن ساپاسىنا ايرىقشا كوڭىل بولىنەدى. «الاتاۋ پروگرەسس كز» وقۋشى مەن مۇعالىم ۇستەلىن, ورىندىق, شكاف جانە ارنايى جيھاز شىعارۋمەن اينالىسادى.
كاسىپورىن باسشىسى بەرىك جيەنباەۆ زاۋىتتا وندىرىلەتىن مەكتەپ جيھازى تاپسىرىس بەرۋشىلەر تاراپىنان جوعارى باعالانىپ, سۇرانىسقا يە ەكەنىن ەرەكشە اتادى. 2023 جىلدىڭ قورىتىندىسىندا كاسىپورىننىڭ ءوندىرىس كولەمى 2 ملرد تەڭگەنى قۇراعان.
«جايلى مەكتەپ» ۇلتتىق جوباسىنىڭ شاپاعاتىن بيزنەس وكىلدەرى دە سەزىنىپ جاتىر. سەبەبى قۇرىلىس قارقىن الىپ, وندىرىلەتىن ونىمدەرگە سۇرانىس ەسەلەپ ارتتى. سونىڭ ناتيجەسىندە وتكەن جىلدىڭ تابىسىن بيىل جارتى جىلدا ورىندادىق. وسى جوبا اياسىندا وبلىستا 17 مەكتەپپەن كەلىسىمشارت جاسالدى. ءبىزدىڭ «Altamir» برەندتىك جيھازدارىمىزعا وزگە وڭىرلەردەن دە تاپسىرىس تۇسەدى. مەكتەپ جيھازدارىنىڭ ساپالى ءارى زاماناۋي, ەكولوگيالىق تازا ونىمنەن وندىرىلۋىنە, سونداي-اق وقۋشى جاسى مەن بويىنا ساي كەلۋىنە باسا كوڭىل بولىنەدى», دەدى كاسىپورىن باسشىسى.
وڭىرگە ىسساپارمەن كەلگەن ءماجىلىس دەپۋتاتى ماكسيم ءروجيننىڭ ايتۋىنشا, «جايلى مەكتەپ» جوباسىمەن سالىناتىن مەكتەپتەردىڭ ىشكى جابدىعىنا 100 پايىز وتاندىق ءوندىرىستىڭ ءونىمى قولدانىلۋعا ءتيىس.
«سايكەسىنشە, زاماناۋي جيھاز دا بارلىق قاۋىپسىزدىك تالابىنا سايكەس بولۋى شارت. كەيىنگى كەزدە ءونىم وندىرۋدە وتاندىق ءونىمنىڭ ۇلەسى ارتىپ كەلەدى. دەگەنمەن ونىڭ كولەمىن ۇلعايتۋ جانە دايىن ءونىمدى ساتۋ اۋماعىن كەڭەيتۋ باعىتىندا ءالى دە اۋقىمدى جۇمىس ىستەۋ قاجەت. ويتكەنى ەكونوميكانىڭ نەگىزگى بولىگى بولاتىن جەڭىل ونەركاسىپتىڭ مىسىن يمپورت باسىپ تۇر. ءبىز ءوز تاراپىمىزدان وتاندىق ءونىم ءوندىرۋشى كاسىپورىندارعا كومەكتەسۋگە دايىنبىز», دەيدى دەپۋتات.
قاراساي, جامبىل اۋداندارىنىڭ تۇرعىندارىن تۇراقتى ەڭبەكپەن, ماردىمدى جالاقىمەن قامتاماسىز ەتىپ وتىرعان ءوندىرىس وشاعىنا بىلىكتى مامان تارتۋ دا – كاسىپورىن ساياساتىنىڭ ماڭىزدى ءبىر تارماعى. بۇگىندە كادر تاپشىلىعىنىڭ الدىن الۋ ءۇشىن اۋدان ورتالىعىنداعى كاسىپتىك كوللەدجدەرمەن مەموراندۋم جاسالىپ, جاس مامانداردى ەڭبەككە تارتۋ جانە شەتەلدىك زاماناۋي قۇرىلعىلاردى باسقاراتىن وپەراتورلىقتى وقىتىپ, مەڭگەرتۋ ىستەرى جۇيەلى جولعا قويىلىپ كەلەدى.
«Altamir» مەتالل وڭدەۋ تسەحىندا جۇمىس ىستەگەنىمە 15 جىل بولدى. تسەحقا كەلگەن مەتالل الدىمەن قيىلىپ, سودان كەيىن ءيىلىپ, سوڭعى ساتىسىندا دانەكەرلەنەدى. مۇندا ءوز ىسىنە جاۋاپتى ءارى تاجىريبەسى تولىققان 40 ادام ەكى اۋىسىمدا جۇمىس ىستەيمىز. ەڭبەكاقىمىز تۇراقتى تولەنەدى. ەڭبەك قاۋىپسىزدىگىن ۇنەمى جادىمىزدا ۇستايمىز», دەيدى تسەح بريگاديرى ءاليحان ابزال ۇلى.
«جايلى مەكتەپ» ۇلتتىق جوباسى اياسىندا ەلىمىزدە 369 مەكتەپ سالۋ كوزدەلسە, بيىل سونىڭ 217-سىنە تاپسىرىس بەرىلگەن. جاڭا مەكتەپتەردى وتاندىق ونىممەن قامتاماسىز ەتۋدىڭ باستى ماقساتى – كاسىپكەرلەردى قولداي وتىرىپ, جەرگىلىكتى حالىقتى جۇمىسپەن قامتىپ, ءال-اۋقاتىن ارتتىرىپ, تۇرمىسىن جاقسارتۋ.
الماتى وبلىسى
