ىرىكتەۋ سايىسى اياقتالعان تۇستا باق وكىلدەرىنە بەرگەن سۇحباتىندا نورا: «وليمپياداعا قاتىسۋدى بالاۋسا شاعىمنان ارماندادىم. ماعان سونداي مۇمكىندىك بەرىپ, داڭعىل جول اشىپ بەرگەن قازاق ەلىنە ءدان ريزامىن. بىلتىر مەنىڭ نارەستەلى بولعانىمدى بىلەسىزدەر. قازىر بالام ءبىر جاسقا تولدى. دەكرەتتىك دەمالىسىمدى تەز اياقتاپ, تورتجىلدىقتىڭ باستى دوداسىنا تىڭعىلىقتى دايارلاندىم. ويتكەنى جاۋاپكەرشىلىكتىڭ جۇگىن جان-تانىممەن سەزىندىم. قازىرگى كەزدە بارشا قازاقستان حالقى مەنەن جۇلدە كۇتىپ وتىر. سولاردىڭ سەنىمىن اقتاۋ ءۇشىن ەش ايانبايمىن», دەپ اقتارىلا سويلەدى.
ۇلتتىق كوماندامىزدىڭ ساپىنداعى تاعى ءبىر كەنيالىق لەگيونەر دەيزي دجەپكەمەي 10-ورىن الىپ, جارىستى مەرزىمىنەن بۇرىن اقتادى. بىراق ول ءالى 10 000 مەترلىك قاشىقتىققا جۇگىرەدى. بالكىم, دەيزي سول سايىستا ءتاۋىر ناتيجە كورسەتەر. سونداي-اق 200 مەترگە جۇگىرۋدە ولگا سافرونوۆانىڭ دا ۇزدىكتەر قاتارىنان كورىنۋگە مۇمكىندىگى بار. وليمپيادانىڭ اشىلۋ سالتاناتىندا اسلانبەك شىمبەرگەنوۆپەن بىرگە تۋ ۇستاپ شىققان تانىمال سپورتشى ىرىكتەۋ سىنىندا 8-ورىندى يەمدەندى. ۋاقىتى – 23,58 سەكۋند. ەندى ولگا جۇبانىش باسەكەسىنە قاتىسادى. ال ەليزاۆەتا ماتۆەەۆا مەن نادەجدا دۋبوۆيتسكايا (بيىكتىككە سەكىرۋشى), اسەم ورىنباي مەن ەدۋارد ەششەنكو (ستەند اتۋشى), دانيل مۇساباەۆ (باتۋتتا سەكىرۋ), تاعى باسقا دا سپورتشىلار ءوز جانكۇيەرلەرىن جەرگە قاراتتى.
كەشە گرەك-ريم كۇرەسى شەبەرلەرى ءوز باسەكەلەرىن باستادى. العاشقى بولىپ بوزكىلىمگە ەڭ جەڭىل سالماقتاعى ايدوس سۇلتانعالي مەن اسا اۋىر سالماقتاعى ءالىمحان سىزدىقوۆ شىقتى. ايدوس قىرعىزستاننىڭ ماقتانىشى جولامان شارشەنبەكوۆپەن ايقاسسا, ءالىمحان رۋمىنيانىڭ بەتكەۇستارى الين چۋراريۋمەن كۇش سىناستى. بۇگىن «كلاسسيكتەردىڭ» جارىسى جالعاسادى. الداعى كۇندەرى ءبىز ايەلدەر كۇرەسى مەن ەركىن كۇرەس شەبەرلەرىنىڭ تارتىسىن تاماشالايمىز.
P.S. پاريج وليمپياداسىنىڭ جالپى كوماندالىق ەسەبىندە اقش قۇراماسى العا شىقتى. امەريكالىقتاردىڭ قورجىنىندا 19 التىن, 26 كۇمىس جانە 26 قولا مەدال بار. ولاردى قىتاي وكشەلەپ كەلەدى. اتالعان ەلدىڭ وكىلدەرى 19 التىن, 15 كۇمىس جانە 11 قولانى ولجالادى. ۇزدىك ۇشتىكتى فرانتسيا تۇيىندەپ تۇر. جارىس قوجايىندارى 12 التىن, 14 كۇمىس جانە 18 قولانى ەنشىلەدى. سونداي-اق توپ-10 كوماندانىڭ قاتارىندا اۋستراليا (12+11+8), ۇلىبريتانيا (10+12+15), وڭتۇستىك كورەيا (10+7+7), جاپونيا (9+5+10), يتاليا (7+10+5), نيدەرلاند (6+5+4), گەرمانيا (5+5+2) قۇرامالارى بار. بۇل تىزىمدە قازاقستان 29-ورىندا تۇر. وتانداستارىمىز ازىرگە 1 التىن, 1 كۇمىس, 2 قولانى قاناعات تۇتىپ وتىر.
