بۇل فوتونىڭ اۆتورى كىم, قاي جىلى ءتۇسىرىلدى, ناقتى بىلمەيمىز. الايدا نۇرتاس وڭداسىنوۆ قىزمەت بابىمەن اقتوبەگە وبلىسىنداعى شىعاناقتىڭ اۋلىنا بارىپ, ەكەۋىنىڭ تارى ءوسىپ جاتقان القاپتا كەزدەسكەنىن انىق بايقايمىز. ەكى ازاماتتىڭ ءبىر-بىرىنە جىلى ءىلتيپات ءبىلدىرىپ, ك ۇلىمسىرەپ تۇرعان ءساتىن ءفوتوتىلشى قالت جىبەرمەگەن. بىراق ول بۇل سۋرەتتىڭ جىلدار وتكەننەن كەيىن قۇندى جادىگەرگە اينالاتىنىن سول كەزدە سەزبەگەن بولار.
بيىل 120 جىلدىعىن اتاپ ءوتىپ وتىرعان نۇرتاس وڭداسىنوۆتىڭ ءومىرى, قىزمەتى, قايراتكەرلىگى كوزىقاراقتى قاۋىمعا جاقسى تانىس. ال كەيىنگى جاس بۋىن شىعاناق بەرسيەۆتىڭ ەسىمىن بىلە بەرمەيدى. اقتوبە وبلىسىنىڭ ويىل اۋدانىندا ومىرگە كەلگەن مايتالمان تارى ءوسىرۋشى باسقارعان زۆەنو ۇزاق جىلدار بويى شولەيتتى ايماقتىڭ اۋا رايىنا قاراماستان تارىدان مول ءونىم العان. دالىرەك ايتقاندا, 1939 جىلى تارىنىڭ ءار گەكتارىنان 25,5 تس ءونىم السا, 1940 جىلى – 155,8 تس, 1941 جىلى – 165 تس, 1942 جىلى – 175 تس, 1943 جىلى 201 تس ءونىم جيناعان. مۇنداي جوعارى ناتيجەگە ول جانقيارلىق ەڭبەگىنىڭ ارقاسىندا عانا ەمەس, تارى تۇقىمىن كۇتىپ-باپتاپ, ەگىستى دەر كەزىندە جۇرگىزىپ, ءونىمدى ىسىراپسىز جيناۋ ارقىلى قول جەتكىزگەن. سونداي-اق شىعاناق بەرسيەۆ ەكىنشى دۇنيەجۇزىلىك سوعىس كەزىندە اسكەري ۇشاق جاساۋ ءۇشىن مەملەكەت قورىنا قوماقتى قارجى اۋدارىپ, ءوز تابىسىنان تارى وتكىزگەن. ونىڭ ءومىرى مەن ەڭبەگىن كورنەكتى جازۋشى عابيدەن مۇستافين «شىعاناق» رومانىنا ارقاۋ ەتسە, نەمىس دراماتۋرگى بەرتولد برەحت «تارى ءوسىرۋشى» اتتى داستان جازعان. ءبىر سوزبەن ايتقاندا, قانداي بيىككە كوتەرىلسە دە, قازاقى مىنەزىنەن, قاراپايىمدىلىعىنان اينىماعان قوس تۇلعانىڭ بەينەسى ساقتالعان سۋرەتتىڭ ۋاقىت وتكەن سايىن قۇنى ارتا تۇسەرى انىق.
