ەندى ارنايى وقۋ ورنى سۋ شارۋاشىلىعى مەن يرريگاتسيا جۇيەسى ءۇشىن جوعارى بىلىكتى كادرلاردى تۇراقتى تۇردە دايارلايدى. بۇل – قۋانتارلىق جاعداي. ءبىر جاعىنان, عالىمدارعا ۇلكەن جاۋاپكەرشىلىك جۇكتەلىپ وتىر. الداعى ۋاقىتتا گيدروتەحنيكالىق قۇرىلىستاردى جوبالاۋ جانە پايدالانۋ بويىنشا سالالىق مامانداردىڭ تاپشىلىعى جويىلاتىنى ءسوزسىز. بۇل مەملەكەت باسشىسىنىڭ سۋ ماماندارىنىڭ مارتەبەسىنىڭ جوعارىلاتۋ بويىنشا جاساعان باتىل, ءارى ءتيىمدى قادامىنىڭ ارقاسى. پرەزيدەنتتىڭ سۋ رەسۋرستارى مەن يرريگاتسيا مينيسترلىگىن قۇرۋى, ەلىمىزدەگى سۋ سالاسىنداعى قوردالانعان ماسەلەلەردى شەشۋگە, سالانى دامىتۋعا ۇلكەن سەرپىلىس بەردى.
قازىرگى كەزدە ەلىمىزدە جاڭادان 20 سۋ قويماسىن سالۋ, 15 سۋ قويماسىن جانە 14 مىڭ شاقىرىمنان استام يرريگاتسيالىق كانالدى رەكونسترۋكتسيالاۋ جۇمىستارى باستالدى. ءار وڭىرگە سۋ ۇنەمدەۋ جۇيەلەرى ورناتىلعان ەگىس القاپتارىن ۇلعايتۋ, سۋ ۇنەمدەۋ تەحنولوگيالارىن قامتۋ ارقىلى سۋ ۇنەمدەۋ جۇمىستارى قولعا الىندى.
مينيسترلىكتىڭ مالىمەتتەرىنە سۇيەنسەك, ەلىمىزدىڭ سۋ رەسۋرستارىن قورعايتىن باسسەيندىك ينسپەكتسيا قىزمەتكەرلەرىنىڭ سانى 1,5 ەسە كوبەيىپ, جالپى شتات سانى 242 ادامعا جەتىپ, رەسپۋبليكانىڭ ءاربىر وبلىس ورتالىعىندا باسسەيندىك ينسپەكتسيا بولىمدەرى اشىلىپ وتىر.
بۇگىنگى تاڭدا ەلىمىزدىڭ سۋ سالاسىندا 10 مىڭعا جۋىق ادام ەڭبەك ەتەدى ەكەن. سالا ماماندارىنىڭ ەڭبەكاقىلارى ورتا ەسەپپەن 25%-عا كوتەرىلدى. سۋدى زاڭسىز پايدالانۋ جانە سۋ تۇتىنۋدى ەسەپكە الۋ دەرەكتەرىن بۇرمالاۋ فاكتىلەرىن جويۋ, سونداي-اق سۋ قورى ايماقتارى مەن نىساندارىندا زاڭسىز شارۋاشىلىق قىزمەت ماسەلەلەرىن رەتتەۋ ءۇشىن مينيسترلىكتە جاڭا سۋ رەسۋرستارىن رەتتەۋ, قورعاۋ جانە پايدالانۋ جونىندەگى كوميتەت
قۇرىلدى.
مىنە, جوعارىدا ايتىلعان اۋقىمدى جۇمىستاردى اتقارۋعا بىلىكتى, ءبىلىمدى كادرلار قاجەت. بۇل كادرلار ۇلتتىق مارتەبە بەرىلگەن جاڭا ۋنيۆەرسيتەتتە دايىندالماق. ۋنيۆەرسيتەتتە «سۋ شارۋاشىلىعىن باسقارۋ جانە اۆتوماتتاندىرۋ», «مەليوراتسيا جانە گيدروتەحنولوگيا», «ەكولوگيا جانە اكۆامادەنيەت» جوعارى مەكتەپتەرى بولاشاق مامانداردى دايىندايدى. جاڭا ۋنيۆەرسيتەتتە بۇرىنعى سۋ سالاسىنا قاتىستى ءبىلىم بەرۋ باعدارلامالارىمەن قوسا جاڭادان اشىلعان «مەليوراتيۆتىك جۇمىستاردى مەحانيكالاندىرۋ», «گيدروەنەرگەتيكا», «سۋ شارۋاشىلىعىنىڭ ەكونوميكاسى», «سۋ ديپلوماتياسى» سياقتى ءبىلىم بەرۋ باعدارلامالارى بويىنشا ماماندار دايارلانادى. سونىمەن قاتار جاستار «بولاشاق» باعدارلاماسىمەن «گيدروگەولوگيا», «سۋ رەسۋرستارى» جانە «سۋ قاۋىپسىزدىگى» ماماندىقتار بويىنشا شەتەلدە ءبىلىم الادى.
سونداي-اق ۋنيۆەرسيتەتتە جوعارى جانە جوعارى وقۋ ورنىنان كەيىنگى ءبىلىم بەرۋ سالاسىنداعى سۋ باعىتى بويىنشا «تاشكەنت يرريگاتسيا ينجەنەرلەرى جانە اۋىل شارۋاشىلىعىن مەحانيكالاندىرۋ» ۇلتتىق زەرتتەۋ ۋنيۆەرسيتەتىمەن قوس ديپلوم بەرۋ بويىنشا ءبىلىم بەرۋ جۇزەگە اسادى.
ۋنيۆەرسيتەت «مەليوراتسيا جانە سۋعارمالى ەگىنشىلىك», «گيدروتەحنيكالىق قۇرىلىس جانە قۇرىلىمدار» باعىتتارىندا دوكتورانتتار دايارلايدى. عىلىمي دارەجەسى بار جاس عالىمداردى دايىنداۋ ماقساتىندا 8D074 – «سۋ شارۋاشىلىعى», 8D086 – «سۋ رەسۋرستارى جانە سۋدى پايدالانۋ» باعىتتارى بويىنشا ديسسەرتاتسيالىق كەڭەستەر جۇمىس ىستەيدى.
2008 جىلى مەملەكەتتىڭ اۋىلدىق ەلدi مەكەندەرگە جۇمىس iستەۋگە جانە تۇرۋعا كەلگەن دەنساۋلىق ساقتاۋ, بiلiم بەرۋ, الەۋمەتتiك قامسىزداندىرۋ, مادەنيەت, سپورت جانە اگروونەركاسىپتىك كەشەنى سالاسىنداعى ماماندارعا الەۋمەتتiك قولداۋ كورسەتۋ ماقساتىندا قابىلدانعان «ديپلوممەن اۋىلعا» جوباسىنا سۋ سالاسىنىڭ ماماندارى ەنگىزىلدى.
ياعني اۋىلدىق ەلدى مەكەنگە بارعان سۋ مامانىنا جۇمىسقا ورنالاسقان جاعدايدا 100 ايلىق ەسەپتىك كورسەتكىش كولەمىندە بىرجولعى كوتەرمە جاردەماقى, ال تۇرعىن ءۇي سالۋ نەمەسە ساتىپ الۋ ءۇشىن 1500 ايلىق ەسەپتىك كورسەتكىشتەن اسپايتىن كولەمدە 15 جىلعا دەيىنگى مەرزiمگە جىلدىق 0,01 % سىياقى مولشەرلەمەسىمەن بيۋدجەتتىك نەسيە الادى. 2024-2025 وقۋ جىلىنا ۋنيۆەرسيتەتكە 245 (210 ورىن باكالاۆرياتقا, 20 ورىن ماگيستراتۋراعا, 15 ورىن دوكتورانتۋراعا) ماقساتتى ءبىلىم گرانتى ءبولىندى.
الداعى ۋاقىتتا دا بىلىكتى كادرلار دايىنداۋدا ۇلتتىق ۋنيۆەرسيتەتتە ۇكىمەتتىڭ قولداۋىمەن اۋقىمدى ىستەر اتقارىلاتىنىنا سەنىمدىمىز.
بىلىكتى مامان – سۋ شارۋاشىلىعى سالاسىنىڭ باستى بايلىعى. سوندىقتان دا سۋ ۇنەمدەۋ تەحنولوگيالارىن ەنگىزۋگە, قاجەتتىلىكتەردى قاناعاتتاندىرۋ ءۇشىن سۋدىڭ از مولشەرىن پايدالانۋعا مۇمكىندىك بەرەتىن قولدا بار سۋ رەسۋرستارىن ۇتىمدى پايدالانۋعا, گيدروتەحنيكالىق قۇرىلىستاردى سالۋ جانە توزۋ ماسەلەسىن شەشۋگە, وزەن-كولدەردىڭ ەكوجۇيەسىن ساقتاۋعا قابىلەتتى مامانداردى دايىنداۋدا ۇلتتىق ۋنيۆەرسيتەتتىڭ بەدەلى جوعارى بولماق.
كەنجەعالي شيلىبەك,
تەحنيكا عىلىمدارىنىڭ
كانديداتى
